Ancha boʻldi,
Sheʼrlar yozmadim,
Hayratlarim tugmaydi meva.
Ich-ichimla yigʻlaydi kimdir,
Yozilmagan sheʼr kabi beva.

Ancha boʻldi,
Sendan darak yo'q,
Noma kelmas, suvratlar yigʻlar.
Xotiramning bogʻlaridan jim
Kulgularing hidlari kelar.

Ancha boʻldi,
Xolim parishon,
Ahvolimning ahvoli xarob.
Aytilmagan so'z kabi giryon,
Sarxush qilmas ming yillik sharob.

Ancha boʻldi,
Yuragim boʻm-bosh,
Vayronadir, xuvillar qasr.
Umidlarim koʻrayotir tush,
Ilinjlarim kul boʻlgan asir.

Ancha boʻldi,
Yashamay qo'ydim,
Osmonidan kechdi ruhiyat.
Oʻzimdagi oʻzimdan toʻydim,
Balolarga qoldi muhabbat.

Ancha boʻldi...
Ancha boʻldi,
Yomgʻir yogʻmaydi,
Tong otmaydi, quyosh botmaydi,
Ancha boʻldi...
Bu dunyo karaxt...
Ancha boʻldi yer aylanmaydi.

©️ Farida Afroʻz

Qalbdalik ❤️