Qalbdalik 🦢

Ichikdim. Sog‘indim seni, shekilli,
Tongim rangi sariq, xasta kunduzim.
Ixrab quyosh chiqar, o‘qchib oy sho‘rlik,
Osima –
Sen kimning qizi!

Ko‘rpaga burkansam, ko‘rpa ilvirar,
Yostiqqa yopishsam, ilvirar yostiq.
O‘y menga sig‘maydi, uy menga sig‘mas,
bosiriq – bosiriq...

Zirillar borlig‘im yursam, yo‘l ko‘nmas,
Qoyaga tirmashsam, puchmayar qoya.
Qarg‘asam, qarg‘ishim duoga o‘xshar,
voooya...

Ichikdim. Sog‘indim seni, shekilli,
Xo‘rligim keltirar g‘alati gina.
Nimaga odamlar shod, xurram, mamnun,
Bizlar odammasmi,
Osima?!

©Abduvali Qutbiddin

Qalbdalik ❤️

* * *

Odamlar aytganiga yurmadim,
Taqdirda turmoqni uqtirdim oʻzimga:
Daraxt oʻstirmadim, uy qurmadim,
Sheʼr qurdim,
daraxtlar oʻstirdim soʻzimdan.

Davrlar toʻfoni tegramda beshafqat,
Qancha toshlarini boshimga urdi.
“Men ham odamman”, deb, takrorladim faqat –
Soʻzdan taqdir qurdim.

Olamga qaradim:
dunyo qavat-qavat –
Ana, yurak dunyo, ana, qorin dun…
Men oyoq tiradim:
or-nomus ham bir davlat –
Shaʼn talashdim insonlar uchun.

Tuproqqa choʻktirdim har bir soʻzimni,
Har satrimni azobga taratdim…
“Biz ham odammiz”, deb,
toʻrt taraf urdim oʻzimni –
Dunyoda koʻngil yaratdim.

Tangriga intildim takroru takror –
Har ilhomda yangicha tanishuv.
Soʻzdan taqdir qurdim,
kechir, parvardigor,
Qoʻlimdan kelgani shu,
qoʻlimdan kelgani shu…

Usmon Azim

Qalbdalik 🦢

Faqat tunda o'zimiz bo'lamiz...

Faqat tunda o'zimiz bo'lamiz.
Tundagina o'zimiz bilan qolamiz.
Parchalarimizni bir joyga jamlaymiz.
Singan, yo'q, parchalagan stakan kabi...
Tongdachi?! Yo'q, tongda begonamiz
o'zimizga, o'zimizdan narimiz tongda.
Quyosh chiqqanida ko'chaga chiqish kerak.
Odamlar yuziga tabassum bilan qarash kerak.
Soxta mulozamat kerak odamlarga.
Xomush bo'lsang, "nega, nimagalar" ko'payadi.
Odamlarni noo'rin savollaridan qoshich uchun
kulib turish kerak, yoqmasa ham
bosh qimirlatib, tasdiqlab turish kerak.
Kunda ko'zlar ko'p bo'ladi,
tunda ham, ammo ular ko'ngilga yaqin-ku.
Nima zarari bor axir u ko'zlarni....
Kunduz begonamiz o'zimizga
Faqatgina tunda o'zimizni topa olamiz.
Sog'inamiz tunda, kunduz sog'ina olmaymiz.
Tunda o'ylaymiz, kunduz o'ylolmaymiz, bandmiz.
tunda ko'zguga yaxshiroq
qarash mumkin bo'ladi, axir.
Tunda yig'lash mumkin bemalol.
Hech kim ko'rmaydi, savol bermaydi
hech kim tunda, tunda yolg'iz bo'lamiz.
Ammo, bu yolg'izlik kundagi odamlar to'la
ko'chalardan yolg'izroq emas.
Hech yo'q soxta emas.
O'zimiz bo'lamiz tunda. Odamlarsiz.
Bir o'zimiz va xotiralarimiz.
Tongda ishga borish kerak bo'ladi.
Tunda tong otmasa hammasi yaxshi bo'ladi.
Tunda kulish mumkin, o'zi bilan
suhbatlashish mumkin-ku, axir.
Tunda hayollarga erk berish mumkin.
Kunda hammayoq g'ala-g'ovur
Jidab bo'lmaydi kunning yolg'izligiga.
Ammo, tunda ming yil qolish mumkin-ku.
Tundan tashqari barchasi yolg'ondek
ko'rinadi menga, tunsiz nima bo'lardi
dunyoda?! O'ylayman tunda.

Faqat tundagina o'zimizni yo'qotganimizdan
afsuslanmaymiz. Nima yo'qotganimizni bilib tursakda...
Tundagina yoziladi, kunduz yozib bo'lmaydi, axir.
Kunda savollar ko'p, tunda ham.
Ammo kundagi savollarning yolg'izligidan
tunniki yaxshiroq. Hech yo'q iliqroq bo'ladi
tundagi savollar. Tunda qaytamiz yuragimizga.
Tunda yashaganlarimiz asl o'zimiz.
Tunda, yostiqqa bosh qo'yib o'ylaganlarimiz
bizniki, xolos. Kunda birga bo'laveramiz hamma bilan...
Kundagi qah-qahalardan yolg'izroq emas
tunning jimjitligi. Tunning sokinligi ko'ngilga yaqin-ku.
Faqat va faqat tunda o'zimni topa olamiz.
Tundan tashqarida barchasi yolg'on.
Odamlar bilganlari kundagilar.
Tundagilar hech kim bilmagan o'zimizdir...


© Abu Umayr

Qalbdalik ❤️

* * *
Yuragimni qanday
Yaratding, Egam?

Oʻzga dard sigʻmaydi
Sogʻinchdan boshqa.

Faqat sheʼr yozsamu,
Seni oʻylasam...

Aylanib boryapman
Bir tomchi yoshga.

Usmon Azim

Qalbdalik ❤️

* * *
Ayriliq oʻtida
lablarim qurishdi,
soʻzsiz qoldim
sogʻinch talvasasida.

Bir kelsang boʻlardi.

Yolgʻonlar
va haqiqatlar kerak emas,
tasalli soʻzlar ham
izlama.

Bu uzun hijronda
sendan boshqa
hamma narsa yoʻqoldi.

Faqat, ayt,
oʻylarimdagi seni,
tushlarimdagi seni –
sendan topamanmi?

Bir kelsang boʻlardi.

Hech boʻlmasa,
tushlarimdagi
oʻzingni bir koʻrmoq uchun
bir kelsang boʻlardi.

Usmon Azim

Qalbdalik ❤️

* * *
Yoʻlaklar chetida
qatordir archa,
Sarvlar tizilgandir,
gullar tortgan saf.
Sen bilan qiyin bir suhbat qurgancha,
Bu sensiz chorbogʻda yuribman yigʻlab.

Koʻngilchan tasalli daraxtlarda moʻl:
Qushlari, shamoli, soya-salqini... –
Ammo sensizlikda yoʻqdir taskin yoʻl -
Oʻkirib yigʻlashdan oʻzga talqini.

Gulu daraxtlarga dardim aytmadim,
Ularga sargʻaymoq nechun sogʻinay?
Menga nechuk bunday Sogʻinch qoldirding,
Dunyoning eng goʻzal gʻussa bogʻiday?

Usmon Azim

Qalbdalik - ishq tilidagi bir manzil 😶

Kuzak xonamgacha bostirib keldi.
Tashqariga chiqdim. Xazondan qochib.
Umrim tugayapti. Kelgin. Kel endi.
Yov yenggan shaharday yuragim ochiq.

Kuz bog'lar boshiga ne ish solmadi,
Ana, daraxtlarning so'ngaklari - cho'p...
Senga aytadigan so'zim qolmadi,
Senga aytadigan jimliklarim - ko'p...

Usmon Azim

Qalbdalik 🍂

HIJRONNING GULI

Orzular, orzular, miskin orzular,
Tegramda aylanur quyosh misoli.
Sogʻinch timdalaydi, yurak ezilar,
Oʻtmishda sangʻiydi koʻngil visoli.

Narxsiz yakun topdi qalbim savdosi,
Samodan yangradi qaygʻuli farmon -
Kun sayin koʻkarar hijron novdasi,
Bahorning isiga oʻxshaydi armon.

Bir xato ayladim, bir boʻldi koʻrlik,
Bir bilmay buzildi azaliy sarhad.
Boshqa sevmayman, deb yuragim shoʻrlik
Hajr qogʻoziga yozmoqda tilxat.

Baxtsizlik haqida ajib qasida,
Oʻh, tinglab dilginang topmoqda huzur,
Achchiq taqdirimning roʻparasida
Mingʻillab sheʼr oʻqib, kulyapman bazoʻr...

Ha, shunday kunlarga tashlab ketding sen,
Osmonu zaminga butkul yotdirman.
Endi anglab bildim – asiringman men,
Sen shod boʻlgan kuning men ham shoddirman.

Mayli, oxirgacha magʻrur turasan,
Shunaqa kibrli sevgining yoʻli.
Va lekin bir kuni oʻlsam, koʻrasan –
Tuprogʻimdan unggay hijronning guli...

©️ X.H

Qalbdalik ❤️

Qorongʻu tushdi.
Ish ishxonalarda qoldi.
Oshxonada qozon qaynagan.
Stolda achchiq-chuchik.
Shiftda chiroq-kichkina quyosh porlaydi.
Gangur-gungur suhbat.
Kulgu yangraydi. Gangur-gungur...
Xatto telikka hech kim qaramas.
Uy baxt bilan toʻla.
Baxtga ham xech kim eʼtibor bermaydi.
Bu eʼtiborsizlikdan negadir kattarar baxt.
Bu eʼtiborsizlikdan negadir yana charaqlar.
Xullas, uy baxt bilan toʻla.
Ammo uni hech kim koʻrmaydi.

Xuddi shunday!
Baxt yoʻqligida koʻrinadi, xolos.
Yoʻqligida esa tushlarga kiradigan baxtning
Surati esa mana bunday; qozon qaynayabdi,
Shiftda mittigina quyosh.
Gangur-gungur, gangur-gungur...
Kulgu yangraydi.

Usmon Azim

Qalbdalik