AKAM SIZ

Siz bor yashab yuribman kamsiz,
Mening foydam uchun hakamsiz.
Men tanigan dunyoda hamma
Akalarning zoʻri akam siz.

Oilamiz gʻamin yeb yashar,
Baxtimizga jonini toʻshar.
Yurishlari dadamga oʻxshar,
Akalarning zoʻri akam siz.

Bir toʻshakda ulgʻaygan edik,
Bir tovoqdan birga osh yedik.
Eng zoʻri biz boʻlamiz dedik,
Akalarning zoʻri akam siz.

Menga toshin otmagan odam,
Yiqilsam jim yotmagan odam.
Meni sira sotmagan odam,
Akalarning zoʻri akam siz.

Oqibati doim bilingan,
Jonim kuysa joni tilingan...
Topganini menga ilingan,
Akalarning zoʻri akam siz.

Bolalikdan menga qaygʻurgan,
Yelkasida koʻtarib yurgan.
Yoshligimdan yonimda turgan,
Akalarning zoʻri akam siz.

(Yuragimning qoʻri akam siz,
Onamning gʻamxoʻri akam siz.
Men tanigan dunyoda hamma
Akalarning zoʻri akam siz)

✍ Odilbek Qodirov

❤️ 𝗞𝗮𝗻𝗮𝗹 | 𝙾𝚍𝚒𝚕𝚋𝚎𝚔 𝚀𝚘𝚍𝚒𝚛𝚘𝚟