DUNYOGA BERILIB KETGANLAR

Zoʻr kabi koʻrinib ketganlar,
Pul topib kerilib ketganlar.
Bu dunyoga hamma musofir,
Dunyoga berilib ketganlar.

Aytganing qilmagan nafs daydi,
Bir umr holinga qoʻymaydi.
Toʻymaydi hech qachon toʻymaydi,
Dunyoga berilib ketganlar.

Mol topar goh yulib, goh talab,
Tirikning goʻriga gʻisht qalab.
Tuproqda yotibdi qanchalab,
Dunyoga berilib ketganlar.

Yoʻllari qolmadi chopmagan,
Qoʻllari qolmadi qopmagan.
Pul topib halovat topmagan,
Dunyoga berilib ketganlar.

Oʻzicha tanxoyu zoʻr ekan,
Lek hali pishmagan gʻoʻr ekan.
Hayotni anglamas koʻr ekan,
Dunyoga berilib ketganlar.

,,Qoʻllarim osmonga yetadiʼʼ,
Deb pinxon hitoblar etadi.
Tobutga mingashib ketadi,
Dunyoga berilib ketganlar.

✍ Odilbek Qodirov

❤️ 𝗞𝗮𝗻𝗮𝗹 | 𝙾𝚍𝚒𝚕𝚋𝚎𝚔 𝚀𝚘𝚍𝚒𝚛𝚘𝚟