Ўғлидан қайтар албат,
Гар отага тош отса ким,
Қон йиғлар келса навбат,
Ота кўзин ёш этса ким.

Топган пули буюрмагай,
Ишлари ҳам ҳеч юрмагай,
Яхши кунларни кўрмагай,
Ота бошига мушт урса ким.

Ҳақ дебон хотин сўзини,
Босса гар ота юзини,
Қорни тўймас ҳеч ўзини,
Миннатли ошин берса ким.

Товуқдай титгани гўнг,
Бўлиб иши келмас ўнг,
Фойда йўқ ўтгандан сўнг,
Йиғласа ёш тўкса ким.

Кимдан ота рози эмас,
Аллоҳ уни бандам демас,
Жаннат эшиги очилмас,
Қанча савоб иш этса ким.

Унга Ҳақнинг муруввати,
Бўлмас Расул шафоъати,
Кетгай куйиб охирати,
Ота айбин фош этса ким.

Йилда борсин Каъба бекор,
Зор йиғласин тавба бекор,
Эл ҳам дегай ул навбаҳор,
Ота кўнглин ғаш этса ким.

Беш вақт намозли бўлса ҳам,
Қанча етимлар боқса ҳам,
Хох ким дуолар қилса ҳам,
Ўтмас падаркуш бўлса ким.

Аллоҳим кечар хатосин,
Қадрига етиб отасин,
Ҳамда меҳрибон онасин,
Пойларига бош урса ким.

Қорёғди падар ҳурматин
этса, берсин Ҳақ давлатин,
Икки дунё саодатин,
Ота кўнглин хўш этса ким.
        ҚОРЁҒДИ ШОИР,
                 Жейнов шаҳарчаси.