OʻLIB BOʻLGANMAN

Sev demang sevgidan toʻyib boʻlganman,
Hasratu armonga toʻlib boʻlganman.
Koʻksi boʻsh yuraksiz yashab yuribman,
Uning toʻyi kuni oʻlib boʻlganman.

Koʻnglimda koʻtarib bir uyim dardni,
Bajarib koʻnmoqlik atalgan shartni.
Qabr toshga yozib oʻninchi martni,
Uning toʻyi kuni oʻlib boʻlganman.

Topdim deganimda qoʻydim yoʻqotib,
Sen oysan ketdingey sahroga botib.
Bir kunda ming yillik azobni totib,
Uning toʻyi kuni oʻlib boʻlganman.

Eslasam tomirda muzlaydi qonim,
Murdadek oʻtmoqda usiz har onim.
Yor yor aytilganda chiqqan bu jonim,
Uning toʻyi kuni oʻlib boʻlganman.

Sevmoq azob ekan, sevilmoq sharaf,
Koʻnglimdan vos kechdim koʻngliga qarab.
Yuribman onamning kuniga yarab,
Uning toʻyi kuni oʻlib boʻlganman.

Sen yasha, kul gulim, yuzing bogʻ boʻlsin,
Baxtli boʻl hamisha, koʻngling chogʻ boʻlsin.
Mening jonim olgan jon sogʻ boʻlsin,
Sening toʻying kuni oʻlib boʻlganman.

✍ Odilbek Qodirov

❤️ 𝗞𝗮𝗻𝗮𝗹 | 𝙾𝚍𝚒𝚕𝚋𝚎𝚔 𝚀𝚘𝚍𝚒𝚛𝚘𝚟