So‘nggi yillarda o‘zbek ijtimoiy tarmoqlarida diniy radikallar, ularning dunyodan to‘liq uzilgan jamiyatlar, hech bo'lmaganda shunday muhitli oila yaratish istagi haqidagi fikrlar borgan sari ko‘proq uchramoqda. Xo'sh, bu fenomen, bunday dunyoqarashli kimsalar faqat O'zbekistonga, O‘zbek jamiyatiga xosmi? Yo‘q, bunday qatlam barcha zamonlarda va barcha jamiyatlarda mavjud bo‘lgan.
Bunga yaqqol misol "Talaba" kitobi muallifi, Tara Vestover katta bo‘lgan oiladir. Uning otasi hukumatdan ochiqdan-ochiq nafratlanadi, maktab bolalarning "miyasini yuvib", dindan uzoqlashtirish uchun, shifoxonalar Xudoga shak keltirish uchun o'ylab topilganiga ishonadi. Shu sababli ham 7 farzandining to'rttasida na tug'ilganlik guvohnomasi, na biron-bir shifoxonadagi tibbiy qaydlar mavjud. Ular yuridik jihatdan mavjud emas. Kichiklari umuman maktabga bormagan, katta farzandlarini bo‘lsa uyda o'qitish sharti bilan maktabdan chiqarib oladi. Bularning hammasi uzoq o'tmishda emas, balki o'zimizning 90-yillarda, dunyoning eng rivojlangan mamlakatlaridan birida ro‘y berganini aqlimiz qabul qilishi qiyin.
Shunday sharoitda katta bo‘lgan Tara, bolaligi, o‘sha davr bayon qilingan memuar asari bo'lmish "Talaba"ni yozayotgan vaqtida endigina 30 ga kirgan va allaqachon tarix fanlari bo‘yicha doktorlik darajasiga ega edi. Maktablarda o'qishga tish-tirnog‘igacha qarshi bo‘lgan oilada tug'ilgan Tara qanday qilib 30 ga ham kirmasdan Garvard bitiruvchisi va doktorlik darajasi egasiga aylanib qoldi?
Bu haqidagi hikoyani uning o‘z og'zidan eshitamiz, to‘g‘rirog‘i o‘qiymiz.
@kitobxonyigit
