O'zbekiston kasaba uyushmalari Federatsiyasining Farg'ona viloyat Kengashi | Rasmiy kanal

Farg‘onada ham “Butunjahon bolalar mehnatiga qarshi kurashish kuni”ga bag‘ishlangan tadbirlar tashkil etildi

Maʼlumki, Xalqaro mehnat tashkiloti va O‘zbekiston kasaba uyushmalari Federatsiyasi hamkorligida har yili 12-iyun – “Butunjahon bolalar mehnatiga qarshi kurashish kuniga bag‘ishlangan tadbirlar tashkil etiladi.

Xususan, shunday tadbirlar Farg‘ona shahrida joylashgan 300 nafar bolalarni qamrab olgan “Xumo” hamda 100 nafar bolalarni qamrab olgan Farg‘ona tumanida joylashgan “Tong” bolalar sog‘lomlashtirish oromgohlarida “Taraqqiyot aniq, ammo qilinadigan ishlar ko‘p: keyingi sayi-harakatlarni tezlashtiraylik!” shiori ostida o‘tkazildi.

O‘tkazilgan tadbirlarda O‘zbekiston kasaba uyushmalari Federatsiyasining Farg‘ona viloyat Kengashi raisi o‘rinbosari Lolaxon Ahmedova, viloyat kengashining bo‘limi mudiri Tursunali Karimov, Gʻanijon Payziyev, viloyat hamda tarmoq kasaba uyushmalari mutaxassislari ishtirok etdilar.

Tadbirlarda yoshlarga mazkur sananing mohiyati interaktiv usullar orqali tushuntirib berildi. Jumladan, Xalqaro mehnat tashkilotining tashabbusiga ko‘ra har yili 12-iyun barcha davlatlarda Butunjahon bolalar mehnatiga qarshi kurashish kuni sifatida keng nishonlanishi, joriy yil mazkur sanaga bag‘ishlangan tadbirlar butun dunyo bo‘ylab “Taraqqiyot aniq, ammo qilinadigan ishlar ko‘p: keyingi sayi-harakatlarni tezlashtiraylik!” shiori ostida o‘tkazilayotganligi hamda mamlakatimizda bola huquqlarining ta’minlanishi to‘g‘risidagi slaydlar yordamida batafsil ma’lumotlar berilib, tematik videoroliklar namoyish etildi.

Shuningdek, tadbir dasturiga asosan oromgohda turli sohalarda yuqori natijalarni qo‘lga kiritib kelayotgan soha vakillari bilan uchrashuv va mahorat darslari, qo‘shiq va she’rlar “Hamma joyda bolalar mehnatiga barham berish harakatlarini tezlashtiraylik!”  shiori ostida rasm chizish tanlovlari va sportning stol tennisi, shaxmat, shashka kabi turlari bo‘yicha musobaqalar o‘tkazilib, yakunda oromgohlarda dam oluvchilarning badiiy chiqishlari tashkil etildi.

Tadbir so‘nggida faol ishtirokchilar va musobaqa g‘oliblari O‘zbekiston kasaba uyushmalari Federatsiyasi Farg‘ona viloyat Kengashining Diplomlari va esdalik sovg‘alari bilan taqdirlandilar.

Bunday tadbirlar Fargʼona viloyatida faoliyat yuritayotgan barcha stasionar bolalar sog‘lomlashtirish oromgohlarida ham tashkil etildi.

O‘zbekiston kasaba uyushmalari Federatsiyasining Farg‘ona viloyati Kengashi.

Facebook | Telegram | Sayt