O'zbekiston kasaba uyushmalari Federatsiyasining Farg'ona viloyat Kengashi | Rasmiy kanal

Kasaba uyushmalarining e’tiboridan mamnun bo‘ldik

O‘zbekiston kasaba uyushmalari Federatsiyasi Farg‘ona viloyati Kengashi tomonidan o‘qituvchi va murabbiylarni qo‘llab-quvvatlash hamda ularni yaqinlashib kelayotgan 8 mart — Xalqaro xotin-qizlar kuni bilan qutlash maqsadida ularga o‘ziga xos sovg‘a tayyorlandi.

Kengash tashabbusi bilan ta’lim muassasalarida yosh avlodga ta’lim berib kelayotgan 50 nafar ta’lim fidoyilarining Toshkent shahriga sayohati, shu bilan birga, Toshkent viloyatining so‘lim maskanida joylashgan “Zarkent” sihatgohida dam olishga yuborildi. Ushbu ezgu tashabbus ta’lim jonkuyarlariga manzur bo‘ldi. Ular Marg‘ilon temiryo‘l vokzalidan Poytaxtga kuzatib qo‘yildi.

— Kasaba uyushmalarining bu taklifidan va biz o‘qituvchilarga ko‘rsatilgan e’tiboridan mamnun bo‘ldik, — deydi Beshariq tumani 13- maktab o‘qituvchisi Muhabbatxon Bozorova. — Ayniqsa, sayohatning bayram arafasida tashkil etilishi esda qolarli bo‘ldi. Tezyurar poyezdda zum o‘tmay, Toshkentga yetib keldik. Bu yerda shinam mehmonxonaga joylashdik. Ertaga poytaxtning diqqatga sazovor joylarini sayr qilishga chiqamiz.

Safar oldidan tashkil etilgan tadbirda O‘zbekiston kasaba uyushmalari Federatsiyasi Farg‘ona viloyati Kengashi raisi Erkinjon Nuraliyev mamlakatimizda o‘qituvchilarga berilayotgan e’tibor, sharafli kasb egalari har tomonlama qo‘llab-quvvatlanayotganiga to‘xtalib o‘tdi. Shuningdek, O‘zbekiston kasaba uyushmalari harakatining 120 yilligi nishonlanishi hamda kasaba uyushmasining tashkil topish jarayoni, bugungi kundagi o‘rni haqida ma’lumot berildi.

O‘zbekiston kasaba uyushmalari Federatsiyasining Farg‘ona viloyati Kengashi

Facebook | Telegram | Sayt

“Dekret”dan qaytmoqchi bo‘lgan xodimning arizasi rad etildi

Lazizaxon Qobilova “Farg‘ona xalqaro aeroporti” MCHJda 2016-yildan buyon ishlab keladi. Bu davrda u bola parvarishlash ta’tiliga chiqadi.

2024-yil noyabr oyida esa ish beruvchiga bola parvarishlash ta’tilidan ishga qaytish haqidagi ariza yozadi. Ammo negadir rahbar bunga rozi bo‘lmaydi. Huquqlari paymol bo‘layotganidan norozi bo‘lgan  L.Qobilova bir nechta vakolatli organlarga murojaat qiladi. Ammo ijobiy natija bo‘lmaydi.  

Shundan so‘ng u O‘zbekiston kasaba uyushmalari Federatsiyasining Farg‘ona viloyati Kengashiga murojaat qiladi. Kengash tomonidan uning murojaati o‘rganib chiqiladi.

Mazkur nizoli holat sudda ko‘rib chiqiladigan bo‘ldi. Sud qaroriga asosan viloyat Kengashining ish beruvchiga xodimni avvalgi lavozimiga ishga qaytarish majburiyatini yuklash to‘g‘risidagi da’vo arizasi qanoatlantirilib, Lazizaxon Qobilovani avvalgi ish joyiga tiklandi. Shuningdek, unga 17 mln. so‘mga yaqin pul mablag‘lari undirib berildi.

M.Usmonov,
O‘zbekiston kasaba uyushmalari Federatsiyasi Farg‘ona viloyati Kengashi bosh mutaxassisi.

Facebook | Telegram | Sayt

“Mahalla yettiligi”ning faollari sayohatga yuborildi

O‘zbekiston kasaba uyushmalari Federatsiyasi Farg‘ona viloyati Kengashining tashabbusi bilan xotin-qizlar muammolarini tizimli ravishda hal etish, ularni ijtimoiy qo‘llab-quvvatlashda hamda “Ayollar daftari”ning 6-bosqichini shakllantirishda faollik ko‘rsatgan “Mahalla yettiligi”ning 130 nafar faollari Toshkent va Xiva shaharlariga sayohatga yuborildi.

“Mahalla yettiligi”ning 84 nafari Toshkent shahrini sayohat qilsa, 46 nafar faollar Xiva shahrini borib ko‘radilar. Sayohat mazmunli va taassurotlarga boy o‘tishi uchun barcha sharoitlar yaratilgan. Sayohat davomida ular diqqatga sazovor joylarni tomosha qiladilar.

— Inson mehnati qayerda ulug‘lansa, ishga bo‘lgan mehri ham shunga yarasha bo‘ladi. Mana, bugun O‘zbekiston kasaba uyushmalari Federatsiyasi Farg‘ona viloyati Kengashining tashabbusi bilan qilgan mehnatimiz ro‘yobini ko‘rib, qadimiy shahar Xivaga yo‘l oldik, — deydi Qo‘shtepa tumani “Qumtepa” MFY xotin-qizlar faoli Dilrabo Roziqova. — Albatta, kasaba uyushmalarining bu e’tiboridan ko‘nglimiz tog‘dek ko‘tarildi. Kasaba uyushmalarining qo‘llab-quvvatlovi sabab bormagan, ko‘rmagan joylarimizni sayohat qilish imkoniga ega bo‘lyapmiz.

O‘zbekiston kasaba uyushmalari Federatsiyasi Farg‘ona viloyati Kengashi raisi Erkinjon Nuraliyev “Mahalla yettiligi” faollarini sayohatga jo‘natar ekan, mahalla tizimida olib borilayotgan ishlarga to‘xtalib, jamiyatimizda mahallaning o‘rni, ayniqsa, “mahalla yettiligi”ning muhim roli borligini ta’kidlab o‘tdi.

Shuningdek, sayohat avvalida bu yil O‘zbekiston kasaba uyushmalari harakatining 120 yilligi nishonlanishi hamda kasaba uyushmasining tashkil topish jarayoni, bugungi kundagi o‘rni haqida faollarga maʼlumotlar berildi.

Sayohatchilar Marg‘ilon temiryo‘l vokzalidan tantanali kuzatib qo‘yildi.

O‘zbekiston kasaba uyushmalari Federatsiyasining Farg‘ona viloyati Kengashi

Facebook | Telegram | Sayt