Zabrdor tumanida 42 ta zamonaviy g‘alla o‘rish kombaynlari mavsumga to‘liq shay

Zabrdor tumanida 2025-yilgi g‘alla o‘rim-yig‘imi mavsumiga qizg‘in tayyorgarlik ishlari olib borilmoqda. Tumandagi mehnatsevar, tajribali dehqonlar hosildorlikni oshirish, ekinlardan yuqori va sifatli natijalar olish maqsadida muntazam sa’y-harakat qilmoqdalar.

Joriy yilda Zabrdor tumanida 20 ta fermer xo‘jaliklari uyushmasi tomonidan 13 800 gektar sug‘oriladigan yer maydonlariga boshoqli don ekinlari ekildi.

Mutasaddilar va mutaxassislar tomonidan olib borilgan ilmiy yondashuv, agrotexnik talablarga to‘liq amal qilish, zamonaviy qishloq xo‘jaligi texnikasidan samarali foydalanish orqali 35 880 tonnadan ortiq hosil yig‘ib olinishi kutilmoqda.

G‘alla yig‘im-terim mavsumini to‘liq va uzluksiz tashkil etish maqsadida “O‘zagroinspeksiya”ning Zabrdor tumanida mavjud 42 ta zamonaviy g‘alla o‘rish kombaynlari to‘liq texnik ko‘rikdan o‘tkazildi. Ularga maxsus sertifikatlar taqdim etildi va har bir texnika mavsum mobaynida xavfsiz hamda samarali ishlashi uchun barcha shart-sharoitlar yaratildi.

Kombaynlarni tayyorlash va ta’mirlash ishlariga 1 milliard so‘mdan ortiq mablag‘ yo‘naltirildi. Bu mablag‘ hisobiga eskirgan qismlar yangilanib, muhandislik va elektr tizimlari tekshirildi, yangi ehtiyot qismlar bilan ta’minlandi. Shu bilan birga, mavsumda texnik muammolar yuzaga kelmasligi uchun har bir kombayn 10 kilometr masofada amaliy sinovdan o‘tkazildi.

Mavsumni qisqa muddatda, samarali va betalofat o‘tkazish maqsadida tumanda 22 ta maxsus uyushma otradlari tashkil etildi. Bular orasida haydovchilar, texnik xizmat ko‘rsatuvchilar, logistika mutaxassislari va boshqa yordamchi xizmat xodimlari mavjud. Ular "Mexanizatorlar uyi" qoshida tashkil etilgan ko‘chma texnik xizmat guruhlari bilan hamkorlikda faoliyat yuritadi. Ushbu guruhlar g‘alla o‘rish jarayonida kombaynlardan unumli foydalanish, tezkor ta’mirlash va xizmat ko‘rsatish vazifalarini bajaradi.

Yoqilg‘i-moylash materiallari bilan ta’minlash ham mavsumning muhim yo‘nalishlaridan biri sanaladi. Bu yo‘nalishda ham tegishli ishlar amalga oshirildi — zarur zaxira yaratilib, uskunalar uzluksiz ravishda yoqilg‘i va moy bilan ta’minlanadigan mexanizmga o‘tkazildi. Bu esa g‘alla o‘rim jarayonida birortamiz kombayn faoliyati to‘xtab qolmasligini kafolatlaydi.

Ayni paytda Zabrdor tumanidagi 1 ta Don korxonasi hamda 3 ta don qabul qilish shaxobchasi ham to‘liq mavsumga tayyor holatga keltirildi. Ushbu qabul punktlarining saqlash sig‘imi 180 ming tonnadan ortiq bo‘lib, yig‘ilgan hosilni to‘g‘ri saqlash va qayta ishlash uchun barcha shart-sharoitlarga ega. Don qabul qilish, saralash va yuklash-tushirish ishlari mexanikalashtirilgan bo‘lib, har kuni minglab tonna hosilni qabul qilish imkoniyatiga ega.

Shu tariqa, Zabrdor tumanida 2025-yilgi g‘alla mavsumiga tayyorgarlik yuqori saviyada tashkil etildi. Barcha sohalarda tizimli ishlar olib borilib, mavsumda yuzaga kelishi mumkin bo‘lgan muammolarning oldi olindi.

📲 Jizzax.uz sayti sahifalariga aʼzo boʼling:👇

Telegram|jizzaxviloyatihokimi|Facebook|YouTube|Instagram|ok.ru|@jizzaxuz_bot|X|