Do‘stlik tumanida pilla topshirish ishlari jadal sur’atlarda davom etmoqda

Joriy yilda Do‘stlik tumanida pillachilik sohasida yuqori natijalarga erishish maqsadida keng qamrovli ishlar amalga oshirilmoqda. Ushbu hududda jami 1667 quti ipak qurti boqilib, pilla yetishtirish bo‘yicha aholining keng qatlami jalb etilgan. Tumandagi pillakorlar oldiga 100 tonna xom ashyo yetishtirish vazifasi qo‘yilgan bo‘lib, bu reja to‘liq amalga oshishi kutilayapti.

Ipak qurti boqish ishlari asosan tumandagi 6 ta mahallada joylashgan fermer xo‘jaliklari va xonadonlar tomonidan olib borilmoqda. Ayniqsa, kasanachi ayollarning bu jarayondagi ishtiroki muhim ahamiyat kasb etmoqda. Ular nafaqat o‘z oilalariga iqtisodiy yordam ko‘rsatmoqda, balki mamlakat iqtisodiyotiga ham hissa qo‘shmoqdalar.

Umumiy hisobda pillachilik mavsumi doirasida 4500 nafar fuqaro doimiy va mavsumiy mehnatga jalb etilgan. Bu esa ularga bir yillik mehnat stajiga ega bo‘lish, shuningdek, pensiya ta’minoti va ijtimoiy himoyada barqarorlikni ta’minlash imkonini bermoqda.

Yetishtirilgan xom pilla tumandagi "Do‘stlik pilla" MCHJ hamda "Silk Ekspert Processing" mas’uliyati chek4langan jamiyati tomonidan belgilangan tartibda xarid qilinmoqda. Pilla topshirgan har bir fuqaroga kilogrammi uchun 40 000 so‘mdan haq to‘lab berilmoqda. Bu esa aholi uchun qo‘shimcha daromad manbai hisoblanadi.

Ayni paytda pilla topshirish jarayonlari jadal sur’atda davom etmoqda. Har bir pillakor o‘zi boqqan qurtdan yetarlicha hosil olish, sifatli pilla yetishtirishga alohida e’tibor qaratayotir. Tuman hokimligi, mas’ul idoralar va tadbirkorlar o‘rtasidagi hamkorlik tufayli jarayon samarali kechmoqda.

Shu bilan birga, tumanda pillachilikni yanada rivojlantirish, uni eksportbop darajada qayta ishlash va yangi ish o‘rinlari yaratish bo‘yicha ham aniq chora-tadbirlar belgilangan. Kelgusida pillachilik tarmog‘i nafaqat iqtisodiy, balki ijtimoiy ahamiyatga ega yo‘nalishlardan biriga aylanishi kutilmoqda.

📲 Jizzax.uz sayti sahifalariga aʼzo boʼling:👇

Telegram|jizzaxviloyatihokimi|Facebook|YouTube|Instagram|ok.ru|@jizzaxuz_bot|X|