Muallim — buyuk kashfiyotchi. Bu qutlugʻ soʻzining maʼnosi ilm beruvchi, taʼlim beruvchi, oʻrgatuvchi demakdir. Jizzax Politexnika instituti dotsenti Sharof Xudoyorov doim izlanishda. Ustoz degan moʻtabar kalomni oqlab kelayotgan sanoqli ilm fidoyilaridan.

U Gʻallaoroldagi M.A.Muqimiy nomli 2-oʻrta maktabni “Oltin medal” bilan tugallab, 1982-yilda Toshkent politexnika institutiga oʻqishga kiradi. Oliy oʻquv yurtida tahsil olish barobarida Toshkent shahar hunar-texnika bilim yurtida ham oʻqib, tokarlik kasbini egallaydi. Talabalik yillarida Toshkent qurilish texnikumi laboratoriyasida, Toshkent traktor zavodida tokar, nazoratchi mexanik boʻlib ishladi. Bilimlarini ishlab chiqarishda qoʻllay olish malakasini oʻzlashtirdi.

Institutni tugatib Gʻallaorol taʼmirlash ishlab chiqarish korxonasiga injener diagnostik vazifasida ish boshlaydi. Keyinchalik tumandagi Mashina-traktor parkida muhandis, rahbar kezlarida faoliyatining gurkiragan davrlari boshlanadi. Ishlab chiqarishni ilm-fan yordami bilan rivojlantirish uning yagona orzusi edi.

Gʻallaorol MTPda gʻallaga suspenziya sepadigan qurilma ishlab chiqarish loyihasining boshida turdi. Oʻsha paytlarda suspenziya samolyotlar orqali sepilardi. Bu dehqonlar daromadining bir qismini “yulib” ketardi. Sharof Xudoyorov boshchiligida tayyorlangan qurilma Zarbdor tumanida sinovdan oʻtkazilib, uni keng ishlab chiqarish yoʻlga qoʻyildi.

Keyinchalik mashina-traktor parklariga xorijdan “Magnum”, “Keys” kabi boshqa texnikalar olib kelindi. Ularga tirkaladigan kultivatorlar ham aynan, Gʻallaorol MTPsida ishlab chiqarildi.

Hozirgi kunda oliy oʻquv yurtlarining ilmiy-texnik bazasi mustahkamlanib, yangi gʻoyalar ustida ishlash uchun barcha sharoitlar yaratilmoqda. Shuning uchun Sharof Xudoyorov 2009-yilda Jizzax politexnika institutining “Transport vositalarini ishlatish” kafedrasiga assistent boʻlib ishga joylashadi. 2012-yilda “Yer usti transport tizimlari” kafedrasida katta oʻqituvchi boʻlib ishlaydi.

Talabalarga fan sirlarini singdirish barobarida ilmiy ishlarini ham davom ettirdi. Hozirgacha 70 dan ortiq ilmiy-uslubiy ishlari, maqolalarga mualliflik qildi. Dasturlash ishlari uchun 34 ta patent guvohnomasini oldi.

Sharof Xudoyorovning boʻsh payti deyarli yoʻq. Qachon qarasangiz daftariga qandaydir mexanizmlarni chizib, hisob-kitobini qilib yuradi. Davrning oʻzi yangi gʻoyalar ustida ishlashni talab etib turganda, ustozlar shogirdlariga ibrat boʻlishi kerak degan tamoyil Sharof Xudoyorovning shioriga aylangan. Kreativlik uning hayotiga koʻp yangiliklar olib kirdi. Xalqaro loyihalarda ishtirok etib, Buxarest universitetida xalqaro Highvec loyihasi dasturi boʻyicha malakasini oshirdi. 2024-yilda tajribasi va izlanuvchanligi hisobiga dotsent ilmiy unvoni berildi. U “Urugʻlarni havo oqimida tozalaydigan qurilmaning konstruktiv oʻlchamlari va ish rejimlarini asoslash” mavzusida tadqiqotlar olib bordi. Joriy yilda texnika boʻyicha falsafa doktori ilmiy ishini himoya qildi.

Izlanuvchi inson qandaydir yangilik yaratgan, jamiyatga foydasi tekkan vaqtni dam deb biladi. Lekin yuzlab muhandislarga ustozlik qilgan, qishloq xoʻjaligi, qurilish, transport sohalarining rivojiga katta hissa qoʻshgan, ilm-fan taraqqiyotini qoʻllab-quvvatlayotgan Sharof Xudoyorovning har bir kuni qadrlidir. Bugun ustoz hayot kitobiga oʻzining 60 yoshini zarhal harflar bilan yozmoqda. Koʻpming sonli mushtariylarimiz nomidan uni qutlugʻ yoshi bilan muborakbod etamiz.