Xususan, Eski shahar va Markaziy dehqon bozori hududida mavjud kamchiliklarni bartaraf etish, tozalash va tartibga solish ishlari amalga oshirilmoqda.

Bozor hududini takomillashtirish va xaridorlar uchun yanada qulay muhit yaratish maqsadida bir qator chora-tadbirlar amalga oshirilmoqda.

Savdo nuqtalari atrofi ozodaligiga eʼtibor qaratilib, yoʻlaklar tozalanmoqda, sanitariya talablariga muvofiq sharoitlar yaratilmoqda.

Shu bilan birga, bozor oldida transport harakatini yaxshilash hamda piyodalar xavfsizligini taʼminlash maqsadida zamonaviy infratuzilma obyektlari barpo etilmoqda.

Ayni paytda Jizzax shahrining Mirzo Ulugʻbek mahallasida joylashgan Markaziy dehqon bozori oldida Alisher Navoiy va Hamid Olimjon mahallalarini bogʻlovchi Oʻzbekiston koʻchalari kesishmasida yer osti yoʻlagi qurilishi jadal surʼatlarda davom etmoqda.

Mazkur yoʻlak fuqarolar va savdo markaziga keluvchilar uchun qulaylik yaratish bilan birga, yoʻl harakati xavfsizligini oshirishga ham xizmat qiladi.

Shuningdek, Eski shahar dehqon bozorida ham infratuzilmani yaxshilash ishlari jadallik bilan olib borilmoqda. Bozor oldidagi yer osti yoʻlagi qayta taʼmirlanib, uning ikki tarafiga zamonaviy bekatlar barpo etilmoqda.

Mazkur bekatlar tez kunlarda foydalanishga topshirilishi rejalashtirilgan.
Mutasaddilarning maʼlum qilishicha, ushbu obodonlashtirish ishlari shahar aholisi va mehmonlari uchun yanada qulay muhit yaratishga qaratilgan.

Bozor va yoʻlaklar infratuzilmasining takomillashtirilishi savdo jarayonlarini yengillashtirish bilan birga, Jizzax shahrining umumiy qiyofasini yanada koʻrkam va zamonaviy qilib shakllantirishga hissa qoʻshadi.