Jizzax viloyati hokimligida viloyat hokimi vazifasini bajaruvchi Ulugʻbek Mustafoyev va “AVIAGEN GROUP” genetik kompaniyasi vakillari oʻrtasida uchrashuv boʻlib oʻtdi. Muzokaralar davomida Oʻzbekistonda goʻsht yoʻnalishidagi parrandalarning I tartibli naslchilik korxonasini tashkil etish masalalari muhokama qilindi.

Ushbu loyiha Oʻzbekiston Respublikasi Prezidentining 2024-yil 28-iyundagi PQ–238-son qarori asosida amalga oshirilmoqda.

40 mln dollarlik investitsiya va 100 gektar yer maydoni

Muzokaralar natijasida “AVIAGEN GROUP” genetik kompaniyasi 40 mln dollar miqdoridagi loyiha doirasida  investitsiya kiritish orqali goʻsht yoʻnalishidagi parrandalarning I tartibli galasi naslchilik korxonasini faoliyatini amalga oshirish borasida oʻz  taklifini bildirdi.

2024-yil iyun, oktyabr va 2025-yil yanvar oylarida kompaniya tomonidan Zomin tumanida loyiha uchun 100 gektar yer maydoni tanlangan. Loyihalarni amalga oshirish bosqichma-bosqich rejalashtirilgan boʻlib, AVIAGEN GROUP kompaniyasi bu borada taqdimot oʻtkazadi.

Viloyat hokimligi hamkorlikka tayyor

Uchrashuv davomida viloyat hokimi vazifasini bajaruvchi Ulugʻbek Mustafoyev “AVIAGEN GROUP” kompaniyasi vakillari tomonidan bildirilgan takliflarni oʻrganib chiqib, mazkur loyihani amalga oshirishda hamkorlik qilishga tayyor ekanligini maʼlum qildi.

Ushbu loyiha amalga oshirilishi bilan Jizzax viloyatida parrandachilik sohasi yanada rivojlanishi, oziq-ovqat xavfsizligi taʼminlanishi va yangi ish oʻrinlari yaratilishi kutilmoqda.