Janob Hech Kim mp3

MANGU UMID

Olam oqqanida sovuqqa toʻlib,
Yugurdim. Shavqimdan qizidi badan.
Yugurdim yurakning jahdiga koʻnib,
Oyogʻimga toʻkdi maysalar shabnam.

Shundoq kirib bordim quyosh ichiga,
Yaralish onidan shoshib, betartib.
Otashi ishondi mening kuchimga -
"Birga yonaylik" deb ayladi taklif.

Quyosh boʻlmadimmi? Oʻzimman aybdor.
"Faqat nur yashasin" - xayolga toʻldim.
Taqdirga tan berib turmadim. Oshkor
Nurni soyasidan ajratmoq boʻldim.

Bir hovuch kuldirman hozir. yov shamol
Jismimni sovurib aylar taʼjovuz.
"Soyaning borligi dunyoga malol", -
Men oʻsha gapimni aytaman hanuz.

Uchaman zarrayu zarra. Beqadr
Shuʼlalar olamga sokin quyilar.
Ortimda yugurgan soyam baribir
Meniki emasday tuyular...

✍ Usmon Azim

@JanobHechKim_Mp3

***

Osima,
Ne qilay koʼnglim ushmundoq,
Bir cheti osmonu, bir cheti tuproq.
Bir tunda podshoman ikki kishvarga,
Bir kunda zordirman bir qur nazarga.

Lipillab, lipillab boʼzardi ruhim,
Xohla porlatib qoʼy, xohla parchala,
Esiz, har tomonga urdi shukuhim,
Esiz, oʼtolmadim shum darichadan.

Osima,
Roziman, mendan asar yoʼq,
Ista, men haqimda boshqa xabar yoʼq.
Аmmo dilim erka dilingni istar,
Mendek xushxabar yoʼq,
Mendek xatar yoʼq.

Osima,
Аlarga koʼp ham inonma,
Ular qush koʼmganlar xiyobonlarga.
Qumlari zarlangan
Boʼlsa ham bordir,
Lek harom oʼrmalar tovonlarida…

Osima,
Sen haqsan,
Men tugab botdim,
Bu qissa soʼngida, shudir qasida.
Goʼzal borligʼimni maydalab sotdim,
Yoʼgʼimni qaytardim
Oʼz egasiga…

✍ Abduvali Qutbiddin

@Janob_Hech_kim_mp3

***
Tomchilarga boʻlinib kelgan
Muhabbatga roʻbaroʻ – oʻlim.
Derazamga holsiz urilgan
Koʻzyoshlaring ruhimi, gulim?

Visoldan soʻng gʻamgin va yana
Qizning yorugʻ koʻngliday – oqin –
Gullar qator tokchada ana,
Oynavandga choʻzar yaprogʻin!

Soʻng tarala boshlaydi oq ruh,
Kengayadi gʻamning sarhadi.
Kul qalbimda miltilladi choʻgʻ,
Kishanlarni uzib tashladim.

Va bagʻrimni bosdim, tomchilar
Chimchiladi, yoqdi sovuqlik.
Qay bir shoir yozganday, dilbar,
Derazadan naryogʻi yoʻqlik!

Derazadan naryogʻi, shamol
Uvvos solib chopar qaygadir.
Ey, yomgʻirda chayingan ayol,
Sevasanmi hali ham, gapir!

Bu shiddatli yogʻin ostida
Kiftlarini quchib titragan,
Etaklari shamol qasdida,
Isyon qilgan, uchib titragan,

Shu shalabbo boʻlgan tanini,
Tun izmiga topshirgan pari.
Bir otashin soʻzdan umidvor,
Ketayapti dunyodan nari!

Tomchilarga boʻlinib kelgan
Muhabbatga roʻbaroʻ – oʻlim.
Derazamga holsiz urilgan
Koʻzyoshlaring ruhimi, gulim?

Bir gulchalik qoʻl uzatmadim,
Dilgir boqdi ruhing yoshlari.
Yomgʻirlarda ivib, yuzingga
Yopishganday xuddi sochlaring!

Uxlatmadi tonggacha qaygʻu,
Jim yigʻlashdik shum tole va man.
Oq bulutga termulib tongda,
Shivirladim, “Seni sevaman”.
🕰 13.11.2023-yil

✍ Bahodir BAHROM

@Janob_Hech_kim_mp3

Kel...
J.Rumiy

Keldim…
Umrimning teng yarmi sovrildi yoʻlda
Bu qismat maʼnisin bilmoqqa keldim.
Vujudim qaqradi, qovrildi choʻlda,
Ruhimga bir oziq olmoqqa keldim

Keldim —
Sukunat ichidan, sovib fanodan,
Ishqning otashida kuymoqqa keldim.
Qalbimga uygʻun bu koʻngil sohibin
Ruhini oʻzimda tuymoqqa keldim

Keldim, yuragimda ming savol bilan
Sochilgan ongimni qayta jamlashga.
Keldim, istihola, ming hayol bilan
Nurayotgan tanga quvvat gʻamlashga.

Keldim —
Horgandayman asli yoʻlning yarmida
Dardimga malhamday hamrohni izlab.
Keldim umidimni quchib, kamida
Holim anglaguchi dargohni istab.

Keldim,
Yuz karra buzilgan ahdlarim bilan,
Qalb toʻla anduhu baxtlarim bilan.
Qalamim changini artib, yangidan
Yoz, degan oʻzimga shartlarim bilan.

Keldim…
Ongimni qiynagan oʻylardan tolib,
Qalbimdan bir hisob soʻrmoqqa keldim
Ishq toʻla koʻnglimni kaftimda olib,
Haqqa oshiqlarni koʻrmoqqa keldim.

Keldim — ming bora yiqildim, turdim,
Tanigan dunyomdan kechmoqqa keldim
Angladim, Huzuri — talpingan yurtim,
Gʻurbat hirqasini yechmoqqa keldim.

Keldim…
Zarra men,
Ulugʻ Sen,
Biz, koʻngil insoni — Haqning hayroni,
Soʻzim-la nahringda oqmoqqa keldim.
Oshiqlar charx urgan sirlar zamoni
Adashgan oʻzimni topmoqqa keldim.

✍ Sohiba Hayot @ketdik_travel_show

@Janob_Hech_kim_mp3

Men yomg'ir ostida – shu yerdaman,
Kel...
Qarshimda bir dengiz aksimdan qo'rqar!
Sening izlaringni sohil sog'ingan
(Meni to'fonlarning qahridan qutqar...)

Men yomg'ir ostida – shu yerdaman,
Kel...
Osmon bosib ketar nigohlarimni,
To'lqinlar bag'rida kalaka qilmish –
nafasimdan paydo sabohlarimni!

Men yomg'ir ostida – shu yerdaman,
Kel...
Osmon va yer aro sarosar menman!
Sokin, g'ururdan tik vujudim ichra –
Ko'ksimda jannatiy makonim – sensan.

Tobora mavjlanar nigohimda dun,
Ummon ko'kka intiq toshib, to'ladi.
Tezroq kel,
yo'q, kelma!
Kela olmasang –
Dengiz menda halok bo'ladi!..

Dengiz... menda halok bo'ladi!

✍️ Gulnor

Koʻzlaringning rangi koʻkmidi?
Sariqmidi sochlaring, bilmam.
Chap yuzingda xoling yoʻqmidi?
Negadir hech yodimga kelmas.

Yumshoqmidi axir qoʻllaring?
Iforingdan boʻlarmidim mast?
Tutashganda men-la yoʻllaring
Hayotimga kirganmidi baxt?

Kiyimlaring chiroylimidi?
Rasomidi aqling, qomating?
Aytganmisan hech sevishingni?
Hatto shuni eslayolmadim.

Unutarkan inson barini,
Oʻlmagan jon yashayverarkan.
Oʻzga hislar, oʻzga odamlar
Koʻnglimizni aylarkan vatan.

Esaverib umr shamoli
Xotirani tuproqqa belar.
Lekin isming tushsa yodimga
Nega doim yigʻlagim kelar?

Koʻzlaringning rangi koʻkmidi?..

✍ Ilhom Salimov

@JanobHechKim_Mp3

IRODA

Fasl tanlamaymiz. Hammasi bahor,
Qovjiraydi faqat yolg‘on-yashiqlar.
Biz abadiy nekbin. Mangu umidvor.
Biz – ko‘ngli sovishni bilmas oshiqlar.

Qishlar va bahorlar, yozlar va kuzlar
Biz uchun barobar yangroq torlardir.
Yerga yog‘a olmay yongan yulduzlar
Bizlar qalovini topgan qorlardir.

Tog‘dek toqatlardan mo‘miyodek sirqib,
Do‘stlarga atalgan dil rozlarimiz.
Qanotimiz po‘lat. Hech bo‘lmas qirqib.
Jaranglab turadi parvozlarimiz.

✍ Matnazar Abdulhakim

@JanobHechKim_Mp3

OʻZBEKLARGA

Muzlar erib bitdi. Uygʻonmading sen.
Bahor oʻtib ketdi. Uxlayverding dong.
Yoz nuri nayzadek yelkangdan oʻtdi –
Turmading. Kuz keldi. Jigarim, uygʻon.

Bulutlar ortidan koʻrindi tulpor,
Uygʻondi tuproqning tagida ilon.
Vahimaga tushib ogʻzin ochdi gʻor,
Boʻrilar uygʻondi. Kel, sen ham uygʻon.

Bir parcha non uchun, qultum suv uchun
Dildirab shukrona aytasan nolon –
Qulni ham boqqaylar ish bersin deya.
Eslagin. Oʻylagin. Bexosdan uygʻon.

Kimga ovoz berding – oʻzing boʻlib gung,
Kim sening nomingdan soʻzlayur yolgʻon?!
Agar uxlayversang – tugamas bu tun,
Qachon sen uygʻonsang – otajakdir tong.

Uygʻonmogʻing uchun ne qilay, aytgin,
Yigʻlayin, kulayin – nima qilayin?!
Mayli, kerak boʻlsa, men berayin jon,
Uygʻon. Uygʻonganing koʻrib oʻlayin...

✍ Najmiddin Ermatov

@JanobHechKim_Mp3

Yana qaytib keldim. Chang to‘zgan
Yo‘limizni sog‘indim, ona.
Tom ustida maysalar o‘sgan
Uyimizni sog‘indim, ona.

Aziz dargoh ostonasida
Sizni qalbim bilan quchayin,
To‘yib-to‘yib sopol kosada
Muzdek quduq suvin ichayin.

Har bir narsa yaqindir menga,
Har bir narsa menga qadrdon.
Qarab qoldingizmi yo‘limga
Issiq nonlar uzib tandirdan?..

Koyimangiz meni bu safar,
Unutdi, deb uyni, dalamni,
Ne chora bor, dil yonsa agar,
Dil sog‘insa turkiy olamni...

O, qishloqning munis chiroyi...
Achchiq piyoz to‘g‘rayin o‘zim.
Dil sog‘inib yig‘laydi doim
Hozir, mayli, yig‘lasin ko‘zim.

Targ‘illanib bormoqda osmon,
Oppoq hidga to‘lmoqda bag‘rim.
Aytingiz-chi, bormi sog‘-omon
Shahlo ko‘zli mening targ‘ilim?

Og‘ushimda zangori sezgi,
Kiprigimda suyuq hayajon.
Ko‘zlarimda yumaloq sevgi,
Salomatman men ham, onajon.

Qaytib keldim yana. Chang to‘zgan
Yo‘limizni sog‘indim, ona.
Tom ustida maysalar o‘sgan
Uyimizni sog‘indim, ona.

✍ Rauf Parfi