***
Сенсан севарим, хоҳ инон, хоҳ инонма,
Қондир жигарим, хоҳ инон, хоҳ инонма.

Ҳижрон кечаси чархи фалакка етар, эй моҳ,
Оҳи саҳарим, хоҳ инон, хоҳ инонма.

Ҳаққоки қилич келса бошимга, эшикингдин,
Йўқдир гузарим, хоҳ инон, хоҳ инонма.

Усрук кўзинг ашколина, ҳар гоҳ назар этсам,
Қолмас хабарим, хоҳ инон, хоҳ инонма.

Яқуб бикин кўп йиғидин қолмади сенсиз,
Нури басарим, хоҳ инон, хоҳ инонма.

Ой юзунгга кўз солгали ўзга киши бирла,
Йўқтир назарим, хоҳ инон, хоҳ инонма.

Ишқ ўтида Лутфий юзи олтунни ёшурди,
Эй сиймбарим, хоҳ инон, хоҳ инонма.

Лутфий (1366–1465)

Уланиш учун: https://t.me/ijod_bustoni