Husan Tangriyev I Rasmiy kanal

Сурхондарёда супургилар дастагига яширилган 612 кг. "гашиш" гиёҳвандлик воситасини олиб киришга уриниш фош қилинди!

Ўзбекистон Республикаси Божхона қўмитаси ҳамда Давлат хавфсизлик хизмати Чегара қўшинлари билан ҳамкорликда йирик миқдордаги гиёҳвандлик воситаларини республикамизга олиб киришга бўлган навбатдаги уриниш бартараф этилди.

2025 йил 9 февраль куни Сурхондарё вилояти божхона бошқармасининг “Айритом” чегара божхона пости орқали республикамиз ҳудудидан транзит тарзида ўтиш учун кириб келган юк автотранспорт воситасини белгиланган технологик схема асосида божхона ва чегара назоратидан ўтказиш жараёнида мазкур автотранспорт воситасига ортилган 13,5 тонна оғирликдаги супурги ходимларнинг диққатини тортди.

Шундан сўнг мазкур автотранспорт воситаси “Айритом” чегара божхона постига туташ ҳудуддаги “Термиз” ташқи иқтисодий фоалият божхона пости тасарруфидаги божхона омборига келтирилиб, ундаги товарлар тўлиқ божхона кўригидан ўтказилди.

Аниқланишича, юк автотранспорт воситасига 180 та қопда супурги жўхориси ўсимлигидан тайёрланган 22 минг 500 дона хўжалик супургилари ортилган.

Мазкур супургиларни синчиклаб кўздан кечириш давомида, 2986 дона супургиларнинг дастаклари орасига айнан супурги рангига мос равишда – сариқ рангдаги скотч билан ўралган ўртача 25 см узунликдаги полиэтилен ўрамлар моҳирлик билан яширилгани фош бўлди.

Ушбу ўрамлар белгиланган тартибда ва холислар иштирокида очиб кўрилганида, уларнинг ичига ўртача 200 гр. оғирликдаги, ўткир ҳидли, тўқ жигаррангли гиёҳвандлик воситаси эканлиги маълум бўлди.

Мазкур ҳолатда 2986 дона супурги дастакларидан ажратиб олинган ўрамлардаги модда дастлабки тезкор анализ натижаларига кўра “гашиш” гиёҳвандлик воситаси бўлиб, уларнинг умумий оғирлиги 612 кг.ни ташкил қилмоқда.

Дастлабки ҳисоб-китобларга кўра, мазкур гиёҳвандлик воситасининг қора бозорлардаги нархи тахминан 16,5 млн АҚШ долларидан ошади.

Ҳозирда ҳолат юзасидан терговга қадар текширув ҳаракатлари давом эттирилмоқда.

Кеча “Бож бадал” сериалининг якуний қисми эфирга узатилди!

Ўткир сюжет, детектив, мелодрама – сериал буларнинг ҳаммасини ўзида умумлаштира олди. 2 та фасл, 24 та қисмдан иборат телеасар бир қарашда қисқа туюлиши мумкин, аммо бугун бир неча юзлаб серияда олинаётган ва маиший қолиплардан чиқиб кета олмаётган сериаллардан кўра анча савияли ва юки бор, назаримда.

Йўқ, сериал ишида бошидан охирига қадар иштирок этган, кичик эпизодларда рол ўйнаган масъул ходим сифатида эмас, оддий томошабин сифатида ёзяпман буларни.

Сериал божхона иши билан томошабинни яқиндан таништиради, тизимнинг ичига олиб киради, рақамли технологиялар замонида божхонанинг тезкор тузилмалари иши янада мураккаблашуви намоён бўлади. Айниқса, сунъий интеллектнинг криминал тўдаларга қанчалик қўл келишини айнан шу сериал илк бор катта экранга олиб чиқди!

Сериалда “Генерал” образи анча-мунча ҳаётий қилиб очиб берилди. Реал ҳаётда томошабин уларга кўп ҳам йўлиқавермайди, ҳаттоки, офицерлар ҳам улар билан фақат иш юзасидан мулоқотга киришишади. Биз уларни иш ва ҳарбий рамкадан ташқарида кўравермаганимиз сабабли ичидан ўтаётган ўй-хаёллари, изтиробларини кўп ҳам ҳис қилавермаймиз. Аммо, уларда ҳам юрак бор, инсоний ички кечинмалар бор, уйида интиқлик билан кутаётган оиласи бор, қўл остидаги минглаб зобитлар учун каттадан-катта маъсулият ҳисси бор. Сериал айни шу ҳиссиётлар оламига томошабинни олиб кира олди.

Ҳа, сериал якунланди. Аммо, унинг томошабинга берган маънавий озуқаси ва завқи ҳали кўп давом этади.

Сериални томоша қила олмаганлар учун намойиш Youtube платформасида давом этади. Ҳозирга қадар сериал янги фаслининг 3 та қисми мазкур платформага жойлаштирилди.

Божхоначилар фаолиятига бағишлаб тасвирга олинган илк сериал - "Бож бадал"нинг 2-фасли якуний қисми бугун соат 18.50 да "Zo'r TV" телеканалида намойиш қилинади!

Воқеалар ривожи қандай якун топади?

Ўтказиб юборманг!

Шу кунларда Божхона қўмитаси Раиси Сурхондарё вилоятида бўлиб, туманларда инвестиция лойиҳаларининг ҳолати ва уларни амалга оширишда юзага келаётган муаммоларни бартараф этишга қаратилган турли учрашувлар ўтказмоқда.

Хусусан, “Термиз халқаро савдо маркази” эркин савдо зонасида бир гуруҳ тадбиркорлар, инвесторлар ва ташқи иқтисодий фаолият қатнашчилари билан очиқ мулоқот бўлиб ўтди.

Таъкидлаш жоизки, мазкур зона шунчаки савдо маркази бўлибгина қолмай, нафақат Ўзбекистон-Афғонистон, балки бошқа қўшни давлатлар ишбилармон доираларининг ҳам ўзига хос бизнес мулоқот майдонига айланиб бормоқда.

Шу боисдан ҳам марказда фаолият юритаётган тадбиркорларни ўйлантираётган муаммоли масалаларига тезкорлик билан ечим топиш ҳар жиҳатдан муҳим ҳисобланади.

Мулоқотда ҳар бир тадбиркорнинг мурожаати тингланиб, аксарияти қаноатлантирилди, бир қанчасига ҳуқуқий ечимлар кўрсатилди.

Таҳлилларга кўра, Сурхондарё вилоятида қиймати 1 млрд. АҚШ долларидан зиёд бўлган 73 та инвестицион лойиҳа устида ишлар олиб борилмоқда. Шундан 12 тасини жорий йилда ишга тушириш режалаштирилган ва бунинг натижасида 1,2 мингдан зиёд янги иш ўринлари яратилиши кутилмоқда.

Божхона қўмитаси Раиси вилоятнинг Термиз, Денов, Сариосиё ва Шеробод туманларида ҳам сайёр учрашувлар ўтказиб, тадбиркорлар билан яқиндан мулоқот қилди.

Куннинг муҳим хабари!

Куала-Лумпур шаҳрида бўлиб ўтган самарали музокаралар якунида Ўзбекистон ва Малайзия ўртасида Божхона ишида ҳамкорлик ва ўзаро ёрдам тўғрисида битим имзоланди!