Husan Tangriyev I Rasmiy kanal

Божхоначилар вагондаги тош плиталар орасига 7,5 млрд сўмлик сигарет яширилганини фош қилишди

Божхона қўмитасининг тезкор тузилмалари томонидан Давлат хавфсизлик хизмати ҳамда Бухоро вилояти божхона бошқармаси ходимлари билан ҳамкорликда ўтказилган тезкор тадбирларда йирик миқдорда – 155 минг қутидан зиёд тамаки маҳсулотларини ноқонуний олиб киришга уриниш бартараф этилди.

Тезкор тадбирда тадбиркорлик субъектларидан бирининг номига келтирилган ҳамда тезкор кузатувга олинган темир йўл вагони Тошкент шаҳридаги божхона омборларидан бирида кўрикдан ўтказилди.

Йўл-юк кузатув ҳужжатларига кўра, вагонга травертин плиталари ортилган бўлиб, кўрик давомида ушбу тошлар орасида моҳирлик билан яширин бўшлиқ ҳосил қилингани фош бўлди. Қаранг-ки, мазкур бўлмаларга зарқоғозга ўралган 51 дона қоғоз қутилар яширилган экан.

Ушбу қутилар белгиланган тартибда ва холислар иштирокида очиб кўрилганида, уларнинг ичида 76 минг 500 қути тамаки маҳсулотлари яширилгани фош бўлди.

Тезкор тадбир Бухоро вилоятида ҳам давом эттирилди. Тезкор тузилмалар ходимлари “Хўжадавлат” темир йўл чегара божхона пости вакиллари билан биргаликда айнан ушбу тадбиркорлик субъекти номига келтирилган яна бир вагонни кўздан кечиришди.

Қаранг-ки, ушбу вагонга ҳам худди юқоридаги каби травертин плиталари орасига зарқоғозга ўралган 91 дона қоғоз қутилари яширилгани фош бўлди.

Мазкур қутиларда ҳам Ўзбекистон Республикасининг акциз маркаси билан қадоқланмаган, сифатини ва табиийки божхона расмийлаштирувини ҳам тасдиқловчи ҳужжатлари бўлмаган 79 минг 90 қути сигарет борлиги аниқланди.

Шундай қилиб юқоридаги тезкор тадбирлар давомида ҳуқуқбузарлардан олиб қўйилган 155 минг 590 қути тамаки маҳсулотлрининг умумий қиймати дастлабки ҳисоб-китобларга кўра 7,5 млрд сўмдан ошмоқда.

Товарларни божхона назоратидан яшириш эвазига юк эгалари давлат бюджетига ундириладиган 2,2 млрд сўмлик божхона тўловларидан қочишни кўзлашган эди.

Ҳозирда мазкур ҳолатлар юзасидан божхона органлари томонидан жиноят иши қўзғатилди.

Эслатиб ўтамиз, республикамиз божхоначилари йил бошидан буён аниқланган 132 та божхона қонунбузилиши ҳолатларида қиймати 13 млрд сўмдан зиёд 300 минг қути тамаки маҳсулотларининг божхона чегаралари орқали ноқонуний олиб ўтилиши ва ички ҳудуддаги яширин айланмасига чек қўйишди.

🌸🌺🌼 Байрамингиз муборак, азиз аёллар! 🌼🌺🌸

Аёл — оила ва жамият устуни, ҳаётимизнинг файзи ва кўрки!

Божхона қўмитасида “8 март – Халқаро хотин-қизлар куни” муносабати билан байрам тадбири бўлиб ўтди.

Тадбирда Божхона қўмитаси раҳбарияти божхона органларида хизмат қилиб келаётган фидоий ва жонкуяр аёлларни самимий табриклаб, халқ фаровонлиги ва мамлакатимизнинг иқтисодий хавфсизлигини таъминлашда ҳамда соҳада эришилаётган ютуқларда уларнинг муносиб ўрни борлиги таъкидланди.

Ҳозирда божхона органларида 400 нафардан зиёд аёллар эркаклар билан елкама-елка туриб, мамлакатимизнинг иқтисодий хавфсизлигини таъминлаш йўлида хизмат қилиб келмоқдалар. Жумладан, уларнинг 31 нафари раҳбарлик лавозимларига тайинланган.

Тизимдаги аёлларнинг 300 нафардан зиёди бевосита божхона постларида хизмат машаққатларини матонат билан енгиб фаолият юритиб келмоқдалар.

Божхоначи аёлларнинг хизмати Давлатимиз Раҳбари томонидан ҳамиша муносиб эътироф этиб келинмоқда. Сўнгги йилларда 3 нафар аёл ходим юксак давлат мукофотлари билан, 4 нафари “Мўътабар аёл”, 1 нафари эса “Маънавият фидойиси" кўкрак нишонларига муносиб кўрилди.

Тадбирда Божхона қўмитаси Раисининг буйруғи билан бир гуруҳ аёл ходимлар навбатдан ташқари махсус унвонлар, эсдалик нишонлари, қўл соатлари ва фахрий ёрлиқлар билан тақдирланишди.

Бу галги тадбирнинг ўзига хос яна бир жиҳати шундаки, тизимда гендер тенгликни таъминлаш борасида амалга оширилаётган чора-тадбирлар ҳамда узоқ йиллардан бери божхона соҳасида хизмат қилиб келаётган аёл ходимлар ҳақида “Божхоначи аёлларга эҳтиром” ҳамда “Аёллари эъзозланган тизим” китобларининг тақдимоти ҳам ўтказилди.

Байрам тадбири Божхона институти ансамбли хонандалари иштирокидаги концерт дастурига уланиб кетди.