O'zbekiston Respublikasi Davlat bojxona qo'mitasining rasmiy axborot kanali

Божхоначилар вагондаги тош плиталар орасига 7,5 млрд сўмлик сигарет яширилганини фош қилишди

Божхона қўмитасининг тезкор тузилмалари томонидан Давлат хавфсизлик хизмати ҳамда Бухоро вилояти божхона бошқармаси ходимлари билан ҳамкорликда ўтказилган тезкор тадбирларда йирик миқдорда – 155 минг қутидан зиёд тамаки маҳсулотларини ноқонуний олиб киришга уриниш бартараф этилди.

Тезкор тадбирда тадбиркорлик субъектларидан бирининг номига келтирилган ҳамда тезкор кузатувга олинган темир йўл вагони Тошкент шаҳридаги божхона омборларидан бирида кўрикдан ўтказилди.

Йўл-юк кузатув ҳужжатларига кўра, вагонга травертин плиталари ортилган бўлиб, кўрик давомида ушбу тошлар орасида моҳирлик билан яширин бўшлиқ ҳосил қилингани фош бўлди. Қаранг-ки, мазкур бўлмаларга зарқоғозга ўралган 51 дона қоғоз қутилар яширилган экан.

Ушбу қутилар белгиланган тартибда ва холислар иштирокида очиб кўрилганида, уларнинг ичида 76 минг 500 қути тамаки маҳсулотлари яширилгани фош бўлди.

Тезкор тадбир Бухоро вилоятида ҳам давом эттирилди. Тезкор тузилмалар ходимлари “Хўжадавлат” темир йўл чегара божхона пости вакиллари билан биргаликда айнан ушбу тадбиркорлик субъекти номига келтирилган яна бир вагонни кўздан кечиришди.

Қаранг-ки, ушбу вагонга ҳам худди юқоридаги каби травертин плиталари орасига зарқоғозга ўралган 91 дона қоғоз қутилари яширилгани фош бўлди.

Мазкур қутиларда ҳам Ўзбекистон Республикасининг акциз маркаси билан қадоқланмаган, сифатини ва табиийки божхона расмийлаштирувини ҳам тасдиқловчи ҳужжатлари бўлмаган 79 минг 90 қути сигарет борлиги аниқланди.

Шундай қилиб юқоридаги тезкор тадбирлар давомида ҳуқуқбузарлардан олиб қўйилган 155 минг 590 қути тамаки маҳсулотлрининг умумий қиймати дастлабки ҳисоб-китобларга кўра 7,5 млрд сўмдан ошмоқда.

Товарларни божхона назоратидан яшириш эвазига юк эгалари давлат бюджетига ундириладиган 2,2 млрд сўмлик божхона тўловларидан қочишни кўзлашган эди.

Ҳозирда мазкур ҳолатлар юзасидан божхона органлари томонидан жиноят иши қўзғатилди.

Эслатиб ўтамиз, республикамиз божхоначилари йил бошидан буён аниқланган 132 та божхона қонунбузилиши ҳолатларида қиймати 13 млрд сўмдан зиёд 300 минг қути тамаки маҳсулотларининг божхона чегаралари орқали ноқонуний олиб ўтилиши ва ички ҳудуддаги яширин айланмасига чек қўйишди.

"Долзарб бир ойлик": Янгибозорда иқтисодий ва ижтимоий ислоҳотлар ўрганилмоқда

Давлатимиз Раҳбарининг маҳаллаларда томорқалардан самарали фойдаланишни ташкил этиш орқали аҳоли бандлиги ва даромадларини ошириш бўйича ишларни янада жадаллаштиришга қаратилган тегишли фармойишига биноан жойларда “долзарб бир ойлик” сафарбарлиги эълон қилинган.

Сафарбарлик доирасида республикамиздаги вазирлик ва идоралар раҳбарлари юртимиз бўйлаб маҳалаларда амалга ошириладиган иқтисодий-ижтимоий тадбирларга масъул қилиб бириктирилди.

Ушбу фармойиш ижроси юзасидан Божхона қўмитаси Раиси ўринбосари Н.Мусамухамедов Хоразм вилоятининг Янгибозор туманидаги “Гулистон”, “Катли”, “Олтинкўл” ва “Қадрият” маҳаллаларида бўлиб, туман ва маҳаллалар масъуллари ҳамда маҳаллий аҳоли билан учрашувлар ўтказди. Жойларда инфратузилмани яхшилаш, камбағалликни қисқартириш ва янги иш ўринларини яратиш бўйича амалга оширилаётган ишларни таҳлилий ўрганди.

Баҳор келиши билан мазкур маҳаллаларда ҳам аҳоли томорқа ерларини экинга тайёрлаш, суғориш тизимлари – ариқ ва зовурларни мавсумга шай ҳолатга келтириш, қудуқлар қазиш ишлари бошлаб юборилган.

Н.Мусамухамедов тик қудуқ ковлаш ва бетонлаш ишларини тезлаштириш, аҳоли томорқасидаги иссиқхоналардан унумли фойдаланиш, электр узатиш тармоқларини реконструкция қилиш, ҳудуддаги иқтисодий-ижтимоий инфратузилмани ривожлантириш лойиҳаларини кўздан кечирди. Бу йўналишдаги ишларни янада жадаллаштириш, шу билан бир қаторда сифатли тарзда амалга ошириш юзасидан масъулларга аниқ вазифа ва топшириқлар берилди.

Шунингдек, Наврўз умумхалқ байрамига тайёргарлик кўриш бўйича ҳудудларда кўкаламзорлаштириш ва ободонлаштириш ишларини ташкил этиш юзасидан ҳам зарур кўрсатмалар берилди.

Божхона қўмитаси Раисининг биринчи ўринбосари Ғ.Насиров бошчилигидаги ишчи гуруҳ Сирдарё вилояти Гулистон туманида бўлиб, “Камбағалликдан фаровонлик сари” дастури асосида амалга оширилаётган ишлар билан танишди.

Ишчи гуруҳ Гулистон туманининг Чортоқ, Аҳиллик, Соҳилобод ва Ибрат маҳаллаларида бўлиб, туман ва маҳаллалар масъуллари ва маҳаллий аҳоли билан ҳудудда инфратузилмани яхшилаш, камбағалликни қисқартириш ва янги иш ўринларини яратиш бўйича ўрганиш ишларини олиб боришди.

Хусусан, ҳудудларда томорқа ерларини суғориш учун 4 та тик қудуқлар қазиш ва 4,8 км суғориш тармоқларини бетонлаш, 9 км. узунликдаги 4 та автомобиль йўлларини таъмирлаш ҳамда 10,8 км узунликдаги электр узатиш тармоғини реконструкция қилиш ва 4 та янги трансформатор ўрнатиш бўйича жами 11,5 млрд сўмлик маблағ ажратилган.

Учрашувда, аҳолини томорқа ерларини суғориш бўйича ишлар бошлаб юборилган бетонлаш ва тик қудуқ ковлаш ишларини тезлаштириш, аҳоли томорқасидаги иссиқхоналардан унумли фойдаланиш, электр узатиш тармоғини реконструкция қилиш, ҳудудда инфратузилмани ривожлантириш, ички туризм орқали янги иш ўринларини яратиш мақсадида дарё бўйига олиб борувчи йўлларини таъмирлаш лойиҳалари яна бир бор кўриб чиқилиб, масъулларга мазкур йўналишлар бўйича аниқ вазифалар белгилаб олинди.

Шунингдек, Наврўз умумхалқ байрамига тайёргарлик кўриш бўйича ҳудудларда кўкаламзорлаштириш ва ободонлаштириш ишларини ташкил этиш юзасидан тегишли кўрсатмалар берилди.