ЯШАШГА ИНТИЛ

Яшашга интил, юрак,
Тўрт томонинг қадрдон.
Умидларинг зўр қаср,
Деворларинг сабрдан.

Ортга эмас, олдга боқ,
Тоғлар турар бош эгиб.
Орзуларинг бўйлари,
Осмонга турар тегиб.

Нега маҳзун боқяпсан,
Авжи гуллар чоғингда.
Очилмоқни истайди,
Қанча гуллар ... боғингда.

Оғир келса ташвишлар,
Авра, дилинг хушлаб қўй.
Ният томонга кўпмас,
Битта қадам ташлаб қўй.

Кураш деган майдонни,
Шаҳдинг билан ўраб қўй.
Дўст-у душман барига,
Майли, омад сўраб қўй.

Яшашга интил, юрак,
Умрим кулиб уйғонсин.
Ҳатто тошлар тирилиб,
Бахтлиман деб тўлғонсин.