Тор манфаатлар учун ўйлаб топилаётган нотариф тўсиқлар Трамп тарифларидан ҳам ёмонҲа,
Трамп тарифлари жуда ёмон. Ундан нафақат Америка халқи, бутун дунё зиён кўради. Халқаро савдо ва тариф қоидалари жаҳон урушларидан кейин кўрмаган синов ва чақириқларга дучор бўлади.
Трампнинг тарифлари жуда ёмон, лекин уларда ҳартугул бизнес учун аниқлик бор. Ҳар қандай АҚШга экспорт қилувчи ёки АҚШга импорт қилувчи бугун эрталабданоқ билади, энди у якунда қанча қўшимча харажатга тушишини, товар ёки хизмат қанчага қимматлашишини (қанча йўқотишини).
Лекин ёмғирдан кейинги қўзиқориндек кўпайиб бораётган ўзбекча нотариф тўсиқлар Трампча тарифлардан ҳам ёмон (балки ўхшатиш кўламга мосмасдир). Чунки импорт қилувчи билмайди бу тўсиқлардан ўтиш ва истеъмолчига товарни етказиб бериш пировардида қанчага тушади. Чунки қанақадир олигархшотир бюрократнинг хоҳиши ва тор манфаатлар буюртмаси бўйича субъектив қарор билан исталган занжирда ва исталган вақтда импорт жараёни тўхтатилиши мумкин. Ноаниқлик эса нархларни каррасига оширади.
Потираб кенгаяётган нотариф тўсиқлар яна бизни феълан 8 йил аввалги конвертация ёпиқлиги даврига қайтармоқда. Ўтган ёмон замонда ёпиқ конвертация охурга яқин бир гуруҳ манфаатдорларга ўзбекистонликларни чексиз талаш имконини бергандек, янги даврда нотариф тўсиқлар ўзларига "маҳаллийлаштирувчи" деган ёрлиқ ёпиштириб олган чайқовчиларга шундай имкониятларни тақдим этмоқда. Шунинг учун кеча фақат кондиционер, холодильник ва лифтга ишлатилган нотариф тўсиқ, бугун автомобиль, электромобиль ва памперсга ишлатилмоқда. Эртага қуёш панелига, индинга турсик ва пайпоққа ҳам ишлатилади.
Энг ёмони нотариф тўсиқларнинг тинимсиз кенгайиб бораётгани Ўзбекистоннинг ЖСТга кириши ғоясини ҳам амалда девальвацияга учратмоқда. Рақобатли бизнес ва танлов истагидаги истеъмолчиларнинг ижобий кутилмаларини ҳам йўққа чиқармоқда. Қанчалик ҳайратланарли бўлмасин, ўзбекистонликларни 30 йилдан бери талаб келаётган монополистлар ва олигархияга энди Ўзбекистоннинг ЖСТга кириши қўрқинчли эмас. Улар божларни оширмасдан туриб ҳам турли бюрократик воситалар ва дастёр шотирлар қўли билан рақобатчиларидан қутилишнинг йўлини ўрганиб олишди.
