Keldingiz... dunyoning rangi o‘zgardi,
Hamma  malikalar  quladi taxtdan.
O‘zgalar  baxt izlab yorini kutar,
Men sizni kutgandim zerikib  baxtdan...

Kuldingiz... jon  kabi yayradi bu jon,
Sochilib  ketgandim  qayta butlandim.
Sanoqda  adashdim... milyoninchi bor,
Yana  qolmoqlikka taraddudlandim.

Qattiq  tikildingiz... tezda angladim  -
Xayrlashmoq  kerak  yana  qaytadan.
(Sizga  salom  bilan borib  bo‘lmaydi,
Xayrlashib  sizga   bosaman  qadam...)

Bu  ne qismat  bo‘ldi,  bu qanday  bitik,
Bir  ko‘zim  kulguda,  biri yig‘ida.
Men sizni hech kimga o‘xshamay  sevdim,
Ketmoq  va qolmoqning  oralig‘ida...

Shuhrat  ORIF