Atorud

Keldingiz... dunyoning rangi o‘zgardi,
Hamma  malikalar  quladi taxtdan.
O‘zgalar  baxt izlab yorini kutar,
Men sizni kutgandim zerikib  baxtdan...

Kuldingiz... jon  kabi yayradi bu jon,
Sochilib  ketgandim  qayta butlandim.
Sanoqda  adashdim... milyoninchi bor,
Yana  qolmoqlikka taraddudlandim.

Qattiq  tikildingiz... tezda angladim  -
Xayrlashmoq  kerak  yana  qaytadan.
(Sizga  salom  bilan borib  bo‘lmaydi,
Xayrlashib  sizga   bosaman  qadam...)

Bu  ne qismat  bo‘ldi,  bu qanday  bitik,
Bir  ko‘zim  kulguda,  biri yig‘ida.
Men sizni hech kimga o‘xshamay  sevdim,
Ketmoq  va qolmoqning  oralig‘ida...

Shuhrat  ORIF

SOGʻINGANDA

Qancha boʻldi koʻrmaganimga,
Ey qalbimning dilbari shoir!
Qancha boʻldi birga oʻltirib,
Soʻzlashmadik dillarga doir.

Dil-chi, dilim unutib boʻlmas
Ishq qoʻshigʻi yozilgan kitob.
Xayol xiyol chertib oʻtdimi —
Topib ber deb qiladi xitob.

Ikkimizga maʼlum bir qudrat
Yillar oʻta senga tortadi.
Unutayin deymanu, faqat
Dilda uning oʻti ortadi.

Ham tabiat, ham doʻst, ham raqib,
Barchasini qoldirib dogʻda,
Koʻrishsak-u, yana tirilsa
Oʻsha oʻlgan boʻsa dudogʻda.

Yuragimning shohi deb seni,
Mayli, bu gal oʻzim tiz choʻksam.
Huzuringda baxtdan tebranib,
Ishq va sogʻinch yoshini toʻksam.

Zulfiya Isroilova

Bu dunyoning hamma gullari
Yuragimda yotibdi gullab.
Seni mushtoq kutganin bari,
Qanday beray senga tasvirlab?!
 
Izlarimni quchoqlab, chopib,
Tegrang uzra soyam ham sarson.
Agar seni olsa-yu topib,
(O, buyog'i uzun hayajon!)
 
Yuragimning kosasi ham mast,
Ishqning ta'mi tegib labiga.
Sening noming eshitib qismat,
Cho'kib ketar yurak tubiga.
 
Endi menga shart emas najot,
Endi menga xayoling -toqat.
Faqat to'xtab qolmasin hayot,
Qismatimni qutqargin faqat.
 
Yuragimni qo'y payvand etib,
Quriyotgan biror daraxtga.
Men har kuni nomingni aytib,
Qaytaraman uni hayotga.

Gulruh XUDOYOROVA

Birinchi muhabbat tip-tiniq bahor osmonidagi bulutga o'xshaydi. Pokiza, shaffof...

Me’yori bor kulgularimning,
Chegara bor hatto yo‘limda.
So‘zlaringni o‘ylab yuribman,
Ortiqcha so‘z olmay tilimga.
 
Kerak emas kutilmagan g‘am,
Kerak emas ortiqcha tilak.
Qiz bolaning armonlari ham,
Pok-pokiza bo‘lishi kerak.
 
Hamma narsa o‘zin o‘rnida,
Nolimayman. Nima desang xo‘p.
Kechir, faqat mening ko‘nglimda,
Orzularim me’yoridan ko‘p.
 
Qadamimni o‘ylab bosyapman,
Toza nafas olyapman har on.
So‘zlaringni eslab o‘syapman,
Men nomusman, axir, otajon.
 
Gulrux Xudoyorova

Yillar hatto sochdan
rangni oʻchirdi,
Husnga tashladi nursiz bir soya.
Ammo xayolingga yetmayin kuchi
Oʻzimga butunlay berdi
nihoyat.
Lekin sen choʻchima,
oʻylaringni men
Faqat oʻn sakkizda
turib eslayman,
Faqat oʻn sakkizda
yurib eslayman,
Oʻn sakkiz yoshdagi
yoʻllaringni men.

Saida Zunnunova

Bahorim, qalbimni gullatib yubor...

Fevral yolgʻondakam qovogʻin uydi.
Qolgisi kelyapti, lekin iloj yoʻq.

Shodmonqul Salom

Men seni


Men seni injitmayman
Va lekin tinchitmayman.
Charx urib, boʻztoʻrgʻayday boʻzlashim bor boshingda,
Ey sochlarin toʻlqini tun singari sim-siyoh.
Xol kabi paydo boʻlgum yonogʻing yo qoshingda,
Ey izlarin gʻubori koʻzlarimga toʻtiyo...
Saratonda sel boʻlib,
Lolazor yaratgayman.
Qahratonda yel boʻlib Gul atrin taratgayman.
Yoʻl yurib choʻllab qolsang,
Shildiragum buloqday,
Yoki dashtga yoʻl solsang,
Yastangayman oʻtloqday.
Istab qolsang soyabon,
Men darrov chinor boʻlgum.
Choʻmar boʻlsang nogahon,
Men darrov anhor boʻlgum.
Kezar boʻlsang bogʻingda,
Pichirlagum misli barg.
Kuyib sening dogʻingda,
Boʻlmasaydim juvonmarg...
Bu dunyoda hech kim yoʻq senga menday mahliyo,
Umidim bor, qaragung axiyri qiyo-qiyo...
...Nasim kabi sezdirmay,
Kiprigingga toʻqingum,
Ozor bermay bezdirmay,
Suratingga choʻqingum.
Qush boʻlib uchar boʻlsang, tarlon boʻlib quvgayman,
Togʻlarda sharsharadek gʻuboringni yuvgayman.
Har mushkul, har xatarda har balodan asragum,
Qayrilsang-qayrilmasang, oʻlguncha ardoqlagum.
Tong payti yulduz misol oq siynangda yongayman,
Yomgʻirda kamalakday yuz rangda tovlangayman.
Koʻrkingga tikilgayman to koʻzimda bor ziyo,
Oʻzing bilmaysan senda shunchalar mehrigiyo!
Men seni tinchitmayman...

Mirtemir

kafechalar, nochor kulgular,
tramvaylar shovqini aro —
va’da etib menga yog‘dular,
yuragimda sen bo‘lding paydo.

portlay dedi nogahon ko‘ksim,
ko‘zlarimga urildi quyosh.
sen nedandir og‘rinib, o‘ksib,
o‘ltirarding ko‘tarolmay bosh.

sezmas eding qo‘lingdan kitob,
tushganini yerga sirg‘anib.
qiyofangda tansiq, bexitob
tanho chiroy turardi yonib.

qo‘llaringni ushlagim keldi,
dedim: qaytdi umrim bahori.
tomirda qon yugurdi, yeldi,
boqsam: tegram so‘ngsiz zangori.

shundan buyon qarshimda olam
charx uradi gullab, ko‘karib.
…qani har kun qo‘lingga bersam
kitobingni yerdan ko‘tarib.

Usmon Azim