G’alati elat, bu g’alati el bu,
Niyyati bo’lakcha, amali mavxum,
Bu eldan Buxoriy chiqishi mumkin,
Lekin g’ariblikda yashashga maxkum,

G’alati elat bu, g’alati el bu,
Tushunib bo’lmaydi asrorlarini,
Mashrabni osadi va orqasidan,
Yig’lab o’qib yurar ash’orlarini,

G’alati elat bu g’alati el bu,
Botini chirkinlik, zohiri sodda-
O’tgan kunlarini yozgan o’g’lini,
Bilmay otib qo’yar Yunusobodda,

G’alati elat bu, g’alati el bu,
Timsox ko’z yoshidan bitmish lug’ati,
Ibn Sinoni-yu Ulug’begini,
O’zi tug’adi va o’zi bo’g’adi,

G’alati elat bu, g’alati el bu,
Tushunib bo’lmaydi sira ham, aytsam.
Bir jarlik ko’raman yo’l oxirida,
Oldinga yur, deydi orqaga qaytsam.

G’alati elat bu, g’alati el bu,
Buyuklik sharafdir, biroq o’y surmang.
Tag’in, dardlarini eshitayin deb
Boburni sira ham uyg’ota ko’rmang!!!

©Xayrulla Hamidov