* * *
Бу насиҳатни Элбек бахши, жигитларга эш бўлар, дилларига тугса, яхши иш бўлар, деб, неча минг йиллар қайта-қайта айтди. Энди бундай қўшиқларни айтадиганлар йўқ. Ахир, дунё одамларни не кўйларга солмади, насиҳатни оладиган қолмади. Мана энди қариганимда, Элбекнинг шу насиҳатларини қайтариб-қайтариб айтганим-айтган. Чунки биров эшитмаса ҳам, насиҳат берадиган одатим бор.

Мард жигитлар журади-ё,
журагида пиёда,
энажони, отажони
жонидан ҳам зиёда,
товдай отанг, боғдай энанг
меҳмон турур дунёда -
таянч бўлгин, товларга ҳам,
жигит, таянч керакдир.
Отангга ҳам, энангга ҳам
сендай суянч керакдир.

Шотераклар шовуллар-о,
саратонда - шамолда,
ҳеч ким билмас, нелар бор-о
худо битган аъмолда,
жигит бўлсанг, бош кўтар-о,
дунёни тут саволга -
Банда берган саволларга,
худо берган жавобсан,
Отанг учун, энанг учун
кечалар ҳам офтобсан.

Дуоларнинг улуғи-ё
падарингнинг раъйида,
Оғажоним, жаннат, ана
энажонинг пойида,
Ота-эна иззати-ё,
яхшиларга қоида,
Омон тутгин жонингни-ё,
ҳалол егин нонингни,
Падарингни ҳурмат эт-о,
сийла энажонингни.

Бошингга иш тушганда-ё,
опа-синглинг куйинар.
Сенга айтмас, паналарда
кўз ёшлари қуйилар.
“Эгачим” деб, бир олқасанг,
неча-неча суйинар -
Опа-сингил номусинг-о,
ота-онанг орингдир,
Ору-номус, билгин, оғам,
бу дунёда борингдир.

Ака-уканг бир яйрасин –
сизга мададкорман, де,
Зўру зардан ҳайиқманглар,
ёнингизда борман, де,
Бу элнинг ҳам, бу юртнинг ҳам
хизматига ёрман, де -
Айланайин бўйингдан-о,
бу дунёга тўзимсан,
Бу дунёнинг дардларига,
оғам, малҳам ўзингсан!

Ҳалол дунё барпо бўлган
яхшиларнинг кўнглидан,
Ҳар муродинг бўлса, жургин
улуғларнинг йўлидан,
Сахий бўлгин – ҳар иш келар
саховатнинг қўлидан -
Мендан ўтар сўзимсан-о,
мендан қолар изимсан!
Мурувват ҳам ўзингсан-о,
оқибат ҳам ўзингсан!

Жураккинанг зириллайди
Дўмбиранинг торида,
Ҳали ёшсан, тўлиб-тошдинг
Ўз кўнглингнинг корида,
Иззат қилгин, қадрига ет
Бу дунёни борида -
Ақлу ҳиммат ўзингсан-о,
Меҳру қурбат ўзингсан,
Бу камбағал дунё учун
Асли давлат ўзингсан!

Усмон Азим

https://t.me/UsmonAzimijodi