* * *
Мен уйғонсам,
уйим уйғонган бўлади.
Ошхонада чой қўяётган бўлади уйим,
“Кўчага
дори ичмасдан
чиқиб кетмасин”, деб ташвишланаётган бўлади.
“Кайфияти кўтарилсин” деб
бирор қизиқ гап тайёрлаётгандир эҳтимол.
Ҳа, яна кийимларимни ҳам
дазмоллаб қўйган.

Уйим - бу тўрт девор эмас,
Уйим - жиҳозлар, буюмлар, китоблар эмас.
Уйим – мана шу аёл.
Унинг исми - Раъно.
Кўнглим ёришмоғини истасам,
такрор-такрор айтаман
унинг исмини.

Эллик йилки,
шу уйимни
кўчадан
соғиниб
қайтганим-қайтгандир.

Усмон Азим
08.05.2016.

https://t.me/UsmonAzimijodi