#Ziyorat

"Hazor nur" obod qadamjoga aylanadi

Shundan soʻng tuman hokimi A.Fayzilloyev ziyoratchilar hamrohligida "Hazor nur" qadamjosiga bordi.

Rivoyatlarga koʻra,

Moliki Ajdar ismli bir sarkarda bu yerda islom dinini targʻib etadi hamda katta qoʻrgʻon qurdiradi.
Keyinchalik u kengayib, aholi bu yerda oʻrnasha boshlaydi.
Dushmanlar bu joyning daragini eshitib, bosib olishga urinadi. Biroq bir necha marta urinishlardan soʻng ham maqsadlariga erisha olishmaydi. Aygʻoqchi qilib bir kampirni yuborishadi. Qoʻrgʻon atrofidagi suvloqdan suv olayotgan bir juvonni gapga solgan kampir undan bu yerni qanday qoʻlga kiritish va sarkardani yengish sirini bilib oladi.

Aytishlaricha, Moliki Ajdar avliyosifat kishi boʻlib, uni hatto kamon oʻqi ham oʻldira olmagan emish. Uning ming nafar zobitlari boʻlib, ular tanasiga oʻq teshib oʻtmaydigan qandaydir sirli yogʻ surib yurisharkan.
Xullas, bu sirlardan voqif boʻlgan dushman sarkarda namoz oʻqiyotgan paytda qalʼaga hujum qilib, askarlarni qirib tashlaydi. Bu voqeadan soʻng sirlarni oshkor qilgan haligi yosh kelinni sarkarda duoibad qiladi. Shundan juvon toshga aylanadi. Xabarni yetkazgan kampirni sarkarda oʻldiradi.

Mahalliy aholining aytishicha, qadamjodagi mingta qabr,  kelintepa degan tepalikdagi inson shakliga oʻxshab ketuvchi tosh, oʻsha yerdagi gʻor ichidagi ulkan qabr, kampirtepa tepaligi va undagi ikkiga boʻlingan toshlar ana shu rivoyatdan soʻzlaydi goʻyo. "Hazor nur" deyilishining sababi esa mingta qabrdan nur taralib turishida ekan.

Hokim bu yerning tarixi bilan bogʻliq rivoyatlarni tinglab, ziyoratchilarning fikrlariga quloq tutdi.

Bu kabi tarixiy maskanlarning ahamiyati, ichki turizmni rivojlantirishda sayyohlar uchun qulay shart sharoit yaratish xususida oʻz fikrlarini aytib oʻtdi.

✍️Shofirkon tumani hokimligi axborot xizmati