Мени уйғотмайди соат жаранги
Мени уйғотмайди қушларнинг жанги
Қўнғироқлар ҳам уйғотолмайди.
Фақат,
Кўрпа қоқаётган қўшни келиннинг
калтак товушидан кетаман чўчиб.

Унга тикиламан парда остидан
Ногоҳ кўриб қолар ва жилмаяди
Хижолат дастидан.

Кўрпадан чанг эмас, ўрмалар овоз…
Бугун уйғотгани доимги эмас
Ғалати ғичирлаш,
ғалати товуш.
Деразам шарақлаб очилди. Кўрдим.
Беланчак.
Шамолда
тебранар
бўм-бўш.