Taqdir inson ruhiga yuborilgan maktub📨
#TAQRIZ
33/60
Paulo Koeloning "Maktub"i o‘zining sarlavhasidayoq chuqur falsafiy ma’noni anglatadi. "Maktub" arabcha so‘z bo‘lib, "yozilgan", "belgilangan" yoki "xat" degan ma’nolarni beradi. Bu sarlavha bu hayot qadar bilan bog‘liqligi, inson boshiga tushadigan voqealarning bir sababga ega ekani haqida chuqur o‘ylashga undaydi. Koelo bu sarlavha orqali hayotning har bir bosqichi – qiyinchiliklar, o‘zgarishlar va yutuqlar – oldindan yozilgan, lekin insonning bu taqdirni qanday qabul qilishida erkinligi borligini ta’kidlaydi. "Maktub" so‘zi shuningdek, har bir hikoya o‘quvchiga yuborilgan bir xabar, ya’ni ruhiy ozuqa va hayotiy saboq sifatida talqin qilinadi.
"Maktub" Paulo Koeloning qisqa hikoyalar va aforizmlardan iborat to‘plami bo‘lib, hayotning ma’nosi, inson o‘zgarishlari va ichki kuch haqida hikoya qiladi. Kitobdagi har bir hikoya hayotiy tajribalardan ilhomlanib yozilgan va inson qalbini chuqur mulohazaga chorlaydi. Koelo oddiy va ta’sirchan til orqali insonni o‘z hayoti haqida o‘ylashga, sinovlarni rivojlanishning bir qismi sifatida qabul qilishga undaydi. Asar sevgi, sabr, kuch va o‘zgarish kabi mavzularni qamrab oladi.
"Maktub" asarining eng ta’sirli qismlaridan biri bu qurt va kapalak haqidagi hikoyadir. Ushbu hikoya hayotning sinovlari va o‘zgarish jarayonlarini ramziy ma’noda ifodalaydi.
"Qurt haqida o‘ylang: u hech narsaga yaroqsizdek tuyuladi – ojiz, zaif va himoyasiz. U yerda emaklab yuradi va atrofni tor ko‘z bilan ko‘radi. O‘zini hech qachon o‘zgarishi yoki go‘zallikka erishishi mumkin deb o‘ylamaydi. Ammo bir kun kelib, qurt to‘xtaydi va ichiga nazar soladi. Bu vaqtda odamlar uni 'endi tamom bo‘ldi' deb o‘ylashlari mumkin. Lekin bu tugash emas – bu o‘zgarishning boshlanishidir. Qurtning ichki o‘zgarishi nihoyat uni kapalakka aylantiradi. Endi u erkin uchadi, keng dunyoni ko‘radi va o‘zining haqiqiy go‘zalligini kashf etadi."
Baʼzan inson hayotida o‘zini zaif, kuchsiz his qilib, kelajakka nisbatan umidsizlik bilan qarashi mumkin. Lekin Koelo ta’kidlaydiki, bu qiyinchiliklar rivojlanish va yangi bosqichga o‘tishning ajralmas qismidir.
@nurmuhammadshoir