АЛТЫН КАССА

Ҳәр айда бир нәўбет пенен,
Пластикке түссе ақша,
Ойын- заўық, сәўбет пенен,
Өткеремиз алтын касса.

Сағынып бир- биримизди,
Арасы бир айдан асса,
Тарқатамыз- шеримизди,
Алтын касса, алтын касса.

Бас қосып ең жақын дослар,
Ҳәр айда бир кеўил хошлар,
Ҳәўижине шығар йошлар ,
Сен бәҳәне, алтын касса.

“Алаған қоллар береген”,
Нобай пул келер не деген,
Аўызбирликтен - дөреген,
Ийгиликли, алтын касса.

Пардоз берип өзимизге,
Шадлық әйлеп жүзимизге,
Сүрме яңлы көзимизге,
Болатуғын, алтын касса.

Ҳәр ай келип гелме- гезек,
Себеп пенен үйди дүзеп,
Дастурханды сондай безеп,
Қоятуғын, алтын касса.

Беккемлесип дым аралар,
Кеўил- кеўилден нар алар,
Дослық гүлшаны саналар,
Алтын касса, алтын касса.

Ақшолпан Аманияз 11.06.2024 жыл