Innova toʻplam

Bugun fizika fanidan bo‘lib o‘tgan attestatsiya savollari yuzasidan vazirlik mas’ullari hamda bir guruh o‘qituvchilar bilan uchrashdik.

Haqiqat bahsda tug‘iladi, deganlaridek, biz ham 4 soatga yaqin qizg‘in muhokama qildik. Urushdik, talashdik, yarashdik, ayrim joylarida yakdil xulosaga kelishdik, ayrim masalalarda umuman kelisha olmadik — xullas, hammasidan bo‘ldi. Muhokama videosini 2-3 kun ichida e’lon qilishga harakat qilamiz.

Bugungi uchrashuvga vaqt va mablag‘ sarflab uzoq-yaqindan kelgan barcha o‘qituvchilarga o‘z minnatdorligimni bildiraman hamda shunday insonlar bilan tanishganimdan juda xursandman. Ular fizika fanining haqiqiy fidoyilari ekan. Shunaqa ustozlar bor ekan, Xudo xohlasa, farzandlarimiz ishonchli qo‘llarda.

O‘z navbatida jamoatchilik fikrini inobatga olib, taklifimizga yo‘q demagan va savollar muhokamasi uchun barcha sharoitlarni yaratib bergan vazirlik rahbariyatiga ham tashakkur aytaman.

Umumiy xulosam shu bo‘ldiki, asosiy muammo baribir o‘zaro muloqot va kommunikatsiya yo‘qligidan chiqmoqda. Bir tomon yetarlicha ma’lumot bera olmayapti, boshqa tomonda tushunmovchilik ko‘paymoqda. Bu bo‘yicha hali qilinadigan ishlar ko‘p.

Masalan, vazirlik mas’ullari hozirgacha fizika fanidan attestatsiyada 71% o‘qituvchi 70 balldan baland natija qayd etganini aytdi. Bu ilgari e’lon qilinmagan raqam edi, ko‘pchilik hayron qoldi va hatto ishonmadi. Shu kabi muhim ma’lumotlar o‘z vaqtida aytilsa, yaxshi bo‘lardi.

Yurtimizda fizika fanining shuncha jonkuyarlari bor ekan, ularning boshini bir yerga qovushtirish va doimiy faol muloqot olib boradigan hamjamiyatga aylantirish lozim. Vazirlik bu bo‘yicha kerakli amaliy ishlarni olib borsa, faqat va faqat foyda bo‘lar edi. Asosiysi borliqni o‘rgatuvchi eng qiziq va muhim fan bo‘lgan fizikaga qiziqish o‘quvchi yoshlar orasida ham ortardi.


🔘 @xushnudbekuz

Yechimlari
@Innova_physics

Test boshlandi