Abdulaziz Ahmad | Blog

Bugun biroz kayfiyatim yo‘q, oshxonada bir narsalar qilib yuribman...

Bir tarafda idish-tovoqlarning taraq-turuqlari, bir tomoni buyurtma kelyapti, baliq pishiryapmiz, ish endi boshlanyapti...

Birdan xayolimga she’r o‘qish kelib qoldi va shartta diktofonni yoqib, ovozimni yozib, montaj qilib tashladim :)

Shovqinlarga rozi bo‘lasiz, eshitib ko‘ringlarchi qani😁

@Ijoddardi

Tengdoshim, akam, ukam, eng so‘nggi imkoniyatdan foydalanib bo‘lsa ham dunyo kezishga, dunyoqarashingizni kengaytirishga harakat qiling...

Oilangiz bilan ketsangiz, nur ustiga a’lo nur. Bu siz va siz yashayotgan mamlakatga faqatgina foyda keltiradi.

Bor-budingizni tikib, qarz-havola qilib bo‘lsa ham dunyoni ko‘rishga intiling, aslo afsuslanmaysiz, Xudo xohlasa!

Bizdan misol, halittan qancha go‘zal xotiralarimiz bor, ayolim farzandlarimizga ertak emas o‘zimiz bosib o‘tgan hayotimizni hikoya qilib beradi, nasib bo‘lsa!

Ha, qiynalasiz, oson bo‘ladi deb hech kim va’da bermayapti. Lekin bu qiyinchiliklar vaqti kelib sizga qancha xulosa, tajriba berishini tasavvur ham qilolmaysiz...

Qo‘rqmang, mehnatdan hech kim o‘lmagan, bir yo‘l ko‘rsatadi O‘zi, qiyin vaziyatlarda qanday yechim topishni o‘rganasiz hech bo‘lmasa, to‘g‘ri niyat bilan harakat qilsangiz bas, eng yorug‘ kunlaringiz hali oldinda...

Muhimi, dunyoni ko‘lmakdan iborat deb o‘ylaydigan oltin baliqchaga aylanib qolmang...

@Ijoddardi

Instagramda Batumidagi hind oshxonasining reklamasi chiqib qoldi, Gruziyadagi xotiralar esga tushib ketdi...

Turkiyaga endi kelgan paytlarimizda hujjat ishlarini tushunmasdan o‘zimizcha Batumiga chiqish-kirish qilgandik.

Bir umrga tatigulik sayohat bo‘lgan o‘ziyam, ko‘rgan-kechirganlarimizni shu yerda batafsil muhrlab qo‘yganman.

Xullas, kechki payt dengiz bo‘yida aylanib, gruzin milliy taomlaridan Xinkali va Xachapuri yeyishni o‘ylab, oshxona qidirib yurgandik.

Yo‘limizdan gruzin alifbosidek jingalak harflarda yozilgan oshxona chiqdi. Ichkariga kirib qarasak, ofitsiantdan tortib oshpazlarigacha hindlar ekan. Boya ayni o‘sha joyning reklamasi chiqdi yonimdan.

Sitora birdan ketamizga tushib qoldi, ha desam, hindlar pishirgan ovqatlarning videosini ko‘p ko‘rganman, judayam pala-partish, gigiyenaga to‘g‘ri kelmaydigan qilib pishirishadi, degandi😂

Videoni qayta ulashyapman, bu ko‘ngil yana sayohat istaydi-vey. Lekin baliq pishirish kerak :)

@Ijoddardi

Yuqoridagi video sifatli chiqishida ularning o‘rni beqiyos!

Yaxshiyam ayasi ikkalasini o‘zim bilan “syomka”ga olib chiqibman, yo‘qsa bilmadim, holim ne kechardi.

Ular yordam bermaganida men hayotda bu videoni ololmasdim, montaj ham qilolmasdim, keyin kanalga chiqarolmasdim umuman.

Rahmat sizlarga, yaxshi odamlar, yaxshiyam sizlar bor!

P.s. Xullas tushundingizku, shu postni chiqarmasam bo‘lmasdi, kechga uyga kirishim bor😂

@Ijoddardi

Yuring, mahallamizni aylantirib kelaman

Ankara, Yenimahalle, Varlık mahallasidan kichik reportaj. Boshlanishiga yomon chiqmadi menimcha, bunaqa roliklarni hali ko‘paytiramiz, nasib!

Mana shu joylarda yashaymiz, shukr, uyimizga hamma narsa yaqin, yaxshi lokatsiyadan ijara uy topolganmiz vaqtida.

Tomosha qiling, fikrlar bo‘lsa, izohlar ochiq, yozing, gurunglashamiz.

Maroqli tomosha!

@Ijoddardi

Hozir Turkiyada ishlash istagidagi insonlar soni anchayin ortgan...

Har kuni kamida 2-3 kishi ish masalasida yozadi, bilet olganman Anqaraga, falon sanada boraman, kanalingizni hozir topdim, deydiganlar ham bo‘ldi orada.

Do‘stlar, bu yerda maosh unchalik baland emas, deyarli o‘zimizdagidek. Ish bosimi va ishchilarga qilinadigan real vaziyatni postlarimdan o‘qib olsangiz bo‘ladi, hech narsani yashirayotganim yo‘q.

O‘zimdan misol, kelishimdan oldin O‘zbekistonda 3 ta ishim bor edi: “Yoshlar ovozi” gazetasida jurnalist/SMM menejeri, Maktabgacha ta’lim vazirligi matbuot xizmati va hozir yopilib ketgan xususiy nashrda masofadan muxbirlik qilardim.

Bundan tashqari, qo‘shimcha onlayn ishlarim bor edi, kopirayterlik qilardim, pulga maqola yozib berardim, tahrir ishlari...

Oyiga +/- daromadim 13-15 million so‘m orasida edi. Bir muammo, ko‘pincha vaqtida pulimni ololmasdim, maoshlar ko‘p kechikardi yoki umuman haqqingizni bermay ketishardi...

Hozir ham qaytib borsam, Xudo xohlasa, yo‘limizni topib ketamiz. Begona yurtda, umuman boshqa sohalarda rizqimizni topib yurgan yerimizda o‘zimizda ish topishga umuman qiynalmayman, nasib bo‘lsa!

Turkiyada hozir hujjatlarim bor holatimda oyligim 28 ming lira, dam olishsiz ishlaganim uchun yana 4 ming lira qo‘shiladi. Jami 32 ming liraga ishlayman, izn qo‘llanmayman, shu holatda ham 1000$ gayam yetmaydi bu pul...

Hujjati yo‘q vatandoshlarimiz Turkiyadagi Asgeri ücret (eng kam oylik ish haqi - 22 ming lira) ga 12 soat ishlashmoqda, uzoq yillardan beri bir joyda ishlayotganlar yoki juda katta restorandagilar 26-27 ming lira olishlari mumkin.

Do‘stlar, har yerning o‘z tosh-tarozi bo‘ladi, konsalting firmalari yoki tanishlaringizning og‘iz ko‘pirtirib aytadigan havodagi summalariga ishonmang!

O‘zbekistonda harakat qilmagan odam chetga kelib ham birini ikki qilolishi qiyin, mehnatdan qochmasangiz, yo‘l-yo‘riqni bilsangiz, o‘zimizda ham bu yerdagi pulni bemalol topa olasiz...

@Ijoddardi