#Шеърий лаҳзалар...
Кечинма

Тошкент гўзал, Тошкент бетакрор,
Баҳри баҳор, кўркамсан пойтахт.
Сенда қайтмас ёшлик изи бор,
Сенда қолган излаганим бахт.
Чиройингга ҳеч тегмасин кўз,
Кенглигингда кўнглим ҳаваси.
Етмаяпти таърифингга сўз,
Юрак зарбда армонлар саси..
Соғинаман бағрингда ўтган,
Хушбахт, ғамсиз, эрка дамларни.
Энди ёшлик ўтмишга кетган,
Кипригимга осиб намларни...
Сенда доим ҳаприқади дил,
Таниш чеҳраларни излайди.
Аммо нетай нотанишлар мўл,
Бефарқлик кўп... Кўнгил музлайди.
Келгим келмас бориб қолганда,
Эсдаликлар қувончи аро.
Соғинчларим ўлчов олганда,
Юрагимда титрар Бухоро...

19-20 ноябрь 2021 йил.
Моҳигул НАЗАРОВА