Ixtisoslashtirilgan ta'lim muassasalari agentligi

#xushxabar
#CIS

🤩 PREZIDENT MAKTABLARI XALQARO MAKTABLAR KENGASHI AKKREDITATSIYASIDAN MUVAFFAQIYATLI OʻTDI

CIS (Xalqaro maktablar kengashi) vakillari 2022-yildan boshlab Prezident maktablari faoliyatini oʻrganishni boshlagan edi. Oʻtgan davr davomida tashkilot tomonidan maktablarimizda oʻquvchilarga yaratilgan keng sharoitlar, taʼlim jarayonining sifatli tashkil etilgani, taʼlim muassasasi faoliyatining ochiq va shaffofligi, oʻquvchilar xavfsizligi, maktab binosining xavfsizlik talablariga javob berishi kabi jihatlar oʻrganildi.

⚡️ Oʻrganishlar natijasiga koʻra hozirda Agentligimiz tizimidagi Nukus, Toshkent, Xiva hamda Namangan shahridagi Prezident maktablari CIS (Xalqaro maktablar kengashi) akkreditatsiyasidan muvaffaqiyatli oʻtganligi toʻgʻrisidagi sertifikatlarini qoʻlga kiritdi.

Maʼlumot oʻrnida, Xalqaro maktablar kengashi a’zosi boʻlish ta’lim muassasasining xalqaro darajada tan olinganini bildiradi. Ushbu maktablarda oʻqiydigan oʻquvchilarning chet eldagi nufuzli universitetlarda toʻliq grant yutish imkoniyati oshadi.

Telegram | Facebook | Instagram | YouTube

#Farmon_ijrosi_amalda
#Bizning_shunday_oʻqituvchilarimiz_bor

PREZIDENT MAKTABLARI OʻQITUVCHILARI XALQARO TOIFAGA EGA BO‘LMOQDA

Ixtisoslashtirilgan taʼlim muassasalari agentligi tomonidan Oʻzbekiston Respublikasi Prezidentining 2024-yil 1-apreldagi PF-55 sonli “Ixtisoslashtirilgan maktablar tarmog‘ini kengaytirish va ularning faoliyatini yanada takomillashtirish chora-tadbirlari to‘g‘risida”gi farmoni ijrosi doirasida tizimli ishlar olib borilmoqda.

Xususan, Agentlik tizimidagi taʼlim muassasalarida faoliyat olib borayotgan mahalliy o‘qituvchilarning xalqaro toifaga ega boʻlishlariga alohida eʼtibor qaratilayotgani samarasida xalqaro taʼlim dasturlari sertifikatlarni qo‘lga kiritgan o‘qituvchilar qamrovi kengaymoqda.

Nukus shahridagi Prezident maktabining kompyuter ta’limi fani o‘qituvchisi Nurlibek Tatlimuratov, Nurafshon shahridagi Prezident maktabining fizika fani o‘qituvchisi Islom Xo‘janov va Andijon shahridagi Prezident maktabining kompyuter ta’limi fani o‘qituvchisi Ulug‘bek Abidov shular jumlasidan.

Ushbu pedagoglarimiz Kembrij xalqaro ta’lim dasturlari asosida dars beriladigan fanlarni o‘qitish bo‘yicha maxsus kurslarni muvaffaqiyatli tugatib, tegishli sertifikatlarga ega boʻldi.

Telegram | Facebook | Instagram | YouTube

#yil_sarhisobi
#tanqidiy_tahlil

IXTISOSLASHTIRILGAN MAKTABLAR FAOLIYAT SAMARADORLIGI TAHLIL QILINDI

Ixtisoslashtirilgan ta’lim muassasalari agentligida tizimdagi ixtisoslashtirilgan maktablarning 2024-yildagi faoliyat samaradorligi, Agentlik ishchi guruhi tomonidan olib borilgan oʻrganishlar tahlili hamda 2025-yildagi dolzarb vazifalarga bagʻishlangan yigʻilish boʻlib oʻtdi.

ZOOM platformasi orqali oʻtkazilgan mazkur yigʻilishda Agentlikning Jizzax, Sirdaryo, Surxondaryo hamda Qashqadaryo viloyatlarida joylashgan ixtisoslashtirilgan maktablarning rahbar xodimlari ishtirok etdi.

Yigʻilishda taʼlim samaradorligi, bitiruvchilarni oliy ta’lim muassasalari, milliy va xalqaro sertifikatlar imtihonlariga tayyorlash, o‘quvchilarni kasbga yo‘naltirish, ota-onalar bilan hamkorlikni kuchaytirish, fuqaro murojaatlari bilan ishlash singari qator masalalarga alohida eʼtibor qaratildi.

Oʻquv jarayonida sun’iy intellektga asoslangan raqamli ta’lim platformasi (Cerebry) dan foydalanish masalasi ham yigʻilish kun tartibidan o‘rin olib, ayni yo‘nalishda monitoring yuritib borish va o‘quvchilarning bilimlari natijalaridan kelib chiqib qoʻshimcha kurslar va toʻgaraklar tashkil etish yuzasidan chora-tadbirlar belgilandi.

Shuningdek, ixtisoslashtirilgan maktablarda boʻsh ish oʻrinlariga xodimlarni ishga qabul qilayotganda malaka talablariga rioya qilish, manfaatlar toʻqnashuviga yoʻl qo‘ymasdan belgilangan tartibga muvofiq mehnat munosabatlarini oʻrnatish taʼkidlandi.

Qolaversa, ijro intizomi, shaxsiy tarkibga oid hujjatlarni rasmiylashtirishda amaldagi qonunchilikka qat’iy rioya qilish, davlat xaridini tashkil qilishning huquqiy va tashkiliy asoslari, moliyaviy mablagʻlardan oqilona foydalanish, ochiqlik va shaffoflik, korrupsiyaga yoʻl qoʻymaslik masalalariga jiddiy e’tibor qaratish lozimligi qayd etildi.

Agentlikning 2025-yildagi (KPI) eng muhim samaradorlik ko‘rsatkichlari loyihasi ishlab chiqilgan bo‘lib, unda belgilangan vazifalardan kelib chiqib, ixtisoslashtirilgan maktablarning eng muhim samaradorlik koʻrsatkichlarini belgilab olish hamda shu asosida tegishli ishlarni amalga oshirish kerakligi koʻrsatib oʻtildi.

Yig‘ilishda Agentlik direktori tomonidan tegishli mas’ullarga ixtisoslashtirilgan maktablarning faoliyat samaradorligini yanada oshirish yuzasidan zarur koʻrsatma va topshiriqlar berildi.

Ixtisoslashtirilgan maktablar faoliyat samaradorligi tahliliga bagʻishlangan yigʻilishlar boshqa hududlar kesimida ham boʻlib oʻtadi.

Telegram | Facebook | Instagram | YouTube

#Farmon_ijrosi_amalda
#Akademik_bilan_mahorat_darsi

ASTRONOM-KASHFIYOTCHI OLIMDAN MAHORAT DARSI

Ixtisoslashtirilgan taʼlim muassasalari agentligi tizimidagi Mirzo Ulugʻbek nomidagi  ixtisoslashtirilgan maktabida OʻzFA Astronomiya instituti direktori, akademik Shuhrat Egamberdiyev bilan mahorat darsi tashkil qilindi.

Muloqotda akademik oʻquvchilarga Oʻzbekiston tarixida astronomiyaga oid tadqiqotlarning ildizlari eng qadimgi davrga borib taqalishi, shuningdek oʻrta asrlar davrining buyuk mutafakkirlari Muhammad al-Xorazmiy, Ahmad Fargʻoniy, Abu Rayhon Beruniy, ayniqsa Mirzo Ulugʻbekning matematika va astronomiyaning rivojlanishiga qo‘shgan ulkan hissasi jahon hamjamiyati tomonidan e’tirof etilgani haqida soʻzlab berdi.

Sh.Egamberdiyev Mirzo Ulugʻbek nomidagi ixtisoslashtirilgan maktabining tashkil etilish tarixiga ham alohida toʻxtalib, ayni jarayonda davlatimiz rahbarining tashabbus va koʻrsatmalari mustahkam poydevor boʻlganini alohida taʼkidladi.

Mirzo Ulugʻbek nomidagi ixtisoslashtirilgan maktabi Oʻzbekiston Respublikasi Prezidentining 2017-yil 14-sentyabrdagi "Mirzo Ulugʻbek nomidagi ixtisoslashtirilgan maktabni va "Astronomiya va aeronavtika" bogʻini tashkil etish toʻgʻrisida"gi qaroriga koʻra, iqtidorli yoshlarning astronomiya va aeronavtika faoliyati sohasidagi milliy va umumjahon ilm-fanining yangi yutuqlarini oʻrganish va oʻzlashtirishga boʻlgan intilishini rivojlantirish, yoshlarni aeronavtika fani va texnika asoslarini egallashi uchun shart-sharoit yaratish maqsadida tashkil etilgan.

Shuningdek astronom olim, mamlakatimiz va jahondagi tadqiqotlar, yangi kashfiyotlar, ixtirolar, zamonaviy observatoriyalar haqida qiziqarli ma’lumotlar bilan oʻrtoqlashdi.

Ma’lumot oʻrinda, akademik Sh.Egamberdiyev mamlakatimizda astronomiya fani rivojiga katta hissa qoʻshgan. 150 dan ortiq ilmiy maqolalar (80 dan ziyodi nufuzli xalqaro ilmiy jurnallarda chop etilgan) muallifi. Uning rahbarligida Maydanak observatoriyasida “Samarqand” sayyorasi kashf etilgan, oʻta-yangi yulduz chaqnashi hodisasi aniqlangan.

Telegram | Facebook | Instagram | YouTube