Файзбоғ (ТемурМалик)

Россиянинг урушдаги йўқотишлари қарийб миллион нафарни ташкил этмоқда — Британия разведкаси

Украинада жанг қилаётган Россия армиясининг йўқотишлари 950 минг нафарга (ҳалок бўлган ва яраланганлар) етди. Бу ҳақда Буюк Британия Мудофаа вазирлиги ҳарбий разведкаси хабар берди.

Вазирлик ҳисоб-китобларига кўра, 2025 йилнинг дастлабки тўрт ойида Россия армияси тахминан 160 минг кишини йўқотган.

“Агар бу суръат сақланиб қолса, 2025 йил шахсий таркибдаги йўқотишлар бўйича Россия учун урушдаги энг оғир йил бўлади”, дейилади Британия Мудофаа вазирлиги баёнотида.

Британия ҳарбийларининг таъкидлашича, юқори даражадаги ҳар кунлик йўқотишларга қарамай, Россия бу йил Украина ҳудудларининг муҳим қисмларини эгаллашга эриша олмаган.

Бунгача Халқаро стратегик тадқиқотлар институти (IISS) Россия армиясининг уруш бошидан буён йўқотишларини 800 минг кишига баҳолаган эди. “Forbes” нашрининг ҳисоб-китобларига кўра, ҳозирги ҳужум суръати ва йўқотишлар сақланиб қолса, Россия армиясига ҳали эгалланмаган 490 минг квадрат километр (Украинанинг 81 фоизи) ҳудудни забт этиш учун 230 йил керак бўлади. Бу жараёнда эса тахминан 101 миллион нафар россиялик ҳарбий ҳалок бўлиши мумкин.

🔥 @fayzboguz

Путин ҳар доим “сиёсий вориси” ҳақида ўйлашини, аммо якуний танловни Россия халқи қилиши кераклигини айтди

Россия президенти бу ҳақда “Россия 1” телеканалида эфирга узатилган “Россия. Кремль. Путин. 25 йил” ҳужжатли фильмида айтиб ўтди.

"Мен доим шу ҳақда ўйлайман. Аммо, охир-оқибат, танлов халқ, рус халқи, фуқаролар, сайловчиларга боғлиқ", —деди президент.

Путин, шунингдек, ҳар бир эҳтимолий номзоднинг салоҳиятини доимий равишда кўриб чиқаётгани ва баҳолаётганини айтди. Давлат раҳбари халқ ишончига эга бўлмаган одамнинг бирор жиддий иш қилиш имконияти бўлмаслигини таъкидлади.

"Мамлакат барқарорлиги, унинг тараққиёти ва хавфсизлигини таъминлайдиган шарт-шароит бўлиши учун жуда муҳим шарт бор, бу халқнинг мамлакат олий мансабдор шахсларига бўлган ишончи. Лекин бу ишончга эришиш учун, албатта, самарали ва ҳалол меҳнат қилиш, фуқароларимиз аҳволини яхшилаш зарур", — дея фикр билдирди президент.

🔥 @fayzboguz

Бугун АҚШда яшаш имконини берувчи Green Card дастури натижалари эълон қилинади

3 май куни Тошкент вақти билан 21:00 да АҚШнинг Хилма-хиллик дастури – кўплаб мамлакатлар фуқароларига ушбу давлатга кўчиб бориш имконини берувчи Green Card (DV-2026) натижалари чиқади. Дастурнинг 2026 йилги мавсумига 2024 йил 2 октябрдан 7 ноябригача аризалар қабул қилинган эди.

Унга ариза топширган шахслар dvprogramm.state.go веб-сайти орқали натижаларни билиб олиши мумкин. АҚШ DV-2026 Green Card учун 55 мингта квота ажратган.

АҚШ ҳукумати томонидан эълон қилинган Green Card дастури ҳар йили дунёнинг кўплаб мамлакатларидан минглаб одамларга Қўшма Штатларга келиб яшаш орзусини рўёбга чиқариш имкониятини беради. Green Card одатда 10 йилга берилади, унга эга бўлгандан сўнг 5 йил ўтгач, АҚШ фуқаролигини олиш учун ариза бериш мумкин.

🔥 @fayzboguz

Ўзбекистон Россиядаги фуқароларининг ҳуқуқлари бузилаётгани бўйича хавотир билдирди

2 май куни Ўзбекистон ташқи ишлар вазири ўринбосари Бобур Усмонов Россия элчиси Олег Малгинов билан учрашув ўтказди.

Учрашувда Ўзбекистон томони Россия томонининг эътиборини РФда Ўзбекистондан келган меҳнат муҳожирларининг ҳуқуқлари бузилиши ва уларга нисбатан қўпол муомала ҳолатлари ҳақидаги кўпайиб бораётган хабарларга қаратди, дея хабар бермоқда ТИВ матбуот хизмати.

“Бундай ҳолатлар Россия ҳудудида меҳнат фаолияти олиб бораётган Ўзбекистон фуқароларининг ҳуқуқ ва эркинликларини бузиш ҳисобланиши, бу ҳуқуқ ва эркинликлар эса яшаб турган мамлакат қонунчилиги асосида таъминланиши лозимлиги таъкидланди.

Шу муносабат билан, кўтарилган масалани синчковлик билан ўрганиш ва Ўзбекистон томонининг хавотирларини Россия Федерациясининг тегишли ваколатли органларига етказиш зарурлиги алоҳида қайд этилди”, – дейилади хабарда.

Аввалроқ Ташқи ишлар вазирлиги Ўзбекистоннинг мингдан ортиқ фуқароси Россия томонидан ёлланиб, Украинадаги урушга жалб этилгани ҳақидаги маълумотлар ваколатли органлар томонидан ўрганилаётганини маълум қилганди.

🔥 @fayzboguz

Олий суд Пайариқ ҳокимининг таъқиби ортидан қамалган тадбиркорни озод қилди

Самарқанд вилояти Пайариқ туманида тадбиркорнинг мулки суднинг ҳал қилув қарори кучга кирмасдан ичидаги техникалари билан бирга бузиб ташланган эди. Бу ҳақда «Kunuz» сайти ўз материалида хабар бермоқда.

“Туман ҳокими, прокурори ва бошқа масъуллар манзилга боришган, автогрейдерни бинога тираб қўйган, ҳоким ҳайдовчига “Бос! Тозала!” дея топшириқ берган. Фуқарога бинодаги техникаларини олиб чиқиш имконият ҳам берилмаган, ўз мулкини ҳимоя қилишга қаратилган ҳаракатлари учун ҳуқуқбузарга чиқарилиб, 10 суткага қамаб қўйилган”, дейилади мақолада.

Ушбу ҳолатда оиланинг яна уч аъзоси ҳам жиноят ишлари бўйича Пайариқ туман судининг 2025 йил 23 апрелдаги қарорига асосан МЖтКнинг 194-моддаси (ички ишлар органлари ходимининг қонуний талабларини бажармаслик) билан айбланиб, 750 минг сўмдан 1 млн 875 минг сўмгача жаримага тортилган.

Мазкур иш 1 май куни Олий судда тафтиш тартибида қайта кўриб чиқилди ва қуйи судларнинг қарорлари ўзгартирилди.

Жумладан, Ислом Қобиловнинг ҳаракатларида МЖтКнинг 183-моддасида назарда тутилган ҳуқуқбузарлик аломатлари мавжуд эмаслиги сабабли МЖтКнинг 271-моддаси 1-бандига асосан (маъмурий ҳуқуқбузарлик ҳодисаси ёки аломати йўқ бўлса) иш юритишдан тугатилди. Ислом Қобиловга МЖтКнинг 34-моддаси тартибида 750 минг сўм жарима жазоси тайинланиб, дарҳол қамоқдан озод қилиниши белгиланди.

Бундан ташқари, Олий суд қарори билан Қобиловнинг отаси Тошпўлат Қобиловга тайинланган 1 млн 875 минг сўм, аёли Гўзал Ўроловага тайинланган 750 минг ва укаси Баҳром Раимовга тайинланган 1 млн 125 минг сўм маъмурий жарималар камайтирилиб, ҳар бирига 375 минг сўмдан жарима қўлланилиши белгиланди.

🔥 @fayzboguz

Рус қўшинлари сафида Украинага қарши жанг қилаётган ўзбекистонликлар ҳақида эълон қилган “Хочу жить” лойиҳаси троллар ҳужумига учради

Маълум қилинишича, “Хочу жить” лойиҳасининг Telegram ва Facebook'даги постлари остида бир вақтда ва деярли бир хил мазмундаги изоҳлар пайдо бўла бошлаган. Изоҳлар орасида “рўйхат – сохта, бу маълумот – тасдиқланмаган”, “Ўзбекистон ҳеч қачон ўз фуқароларига бошқа давлат армияси сафида жанг қилишга рухсат бермаган бўларди” кабиларни кўриш мумкин.

"Шу билан бир вақтда бизга ўзларини “кўнгиллилар” деб таништирган шахслар мурожаат қилиб, постни ўчиришни талаб қила бошладилар. Улар бу “ноқонуний” ва “норасмий маълумот” эканини айтишди.

Бундан ташқари, биз билан Ўзбекистон оммавий ахборот воситаларидан бири боғланди, улар ҳам ёлланма жангарилар рўйхати ҳақидаги хабарни чоп этган эди. Нашр вакилларининг айтишича, уларга ҳам ўзини “Ўзбекистон расмийлари” деб таништирган номаълум шахслар томонидан шунга ўхшаш талаблар билан мурожаатлар бўлган", дейилади “Хочу жить”нинг Telegram каналида чоп этилган хабарда.

Лойиҳа вакилларига кўра, Қозоғистон, Қирғизистон, Тожикистон ва Беларус фуқароларининг урушга ёлланиши ҳақидаги бошқа хабарлар бундай реакция уйғотмаган.

"Биз Россия армиясидаги 106 та мамлакатдан бўлган ёлланма жангарилар ҳақида ишончли маълумотларга эгамиз. Эълон қилаётган рўйхатларимиз Россия Қуролли кучлари қўмондонлигидаги инсайдерлардан олинган маълумотларга асосланади. Уларнинг ишончлилиги журналистлар ва ҳуқуқ фаоллари томонидан бир неча бор тасдиқланган", дейилади “Хочу жить” хабарида.

Троллик қилишда пешқадаммиз. Расмийларга бирон бир хабарга раддия бериш қандай бўлиши тўғрисида ликбез ўташ керакка ўхшайди. Худди шу троллар бир неча кундан буён менинг ҳам шахсий аккаунтимни тинч қўймай ёзиб ётишибди. Ёлғон ахборот тарқатганлар қандай жазога дучор бўлишлари мумкинлигини ҳам эслатиб қўйишяпти, бироқ, муаммо шундаки, «Хочу жить» лойиҳаси тарқатган хабар ёлғонлиги борасида ҳали ҳеч бир ўзбек расмийси баёнот эълон қилгани йўқ. Сукунат эса мана шундай оқибатларга олиб келяпти.

🔥 @fayzboguz

Ўзбекистонда ўртача номинал иш ҳақи биринчи чорак якунига кўра қарийб 5,8 млн сўмни ташкил этди, бу ўтган йилнинг шу даврига нисбатан 18% кўп

2025 йилнинг январь-март ойларида Ўзбекистонда инфляцияни ҳисобга олмаганда ўртача ҳисобланган номинал иш ҳақи бир йилда (2024 йилнинг шу даврига нисбатан) 18% ошди — 4,91 миллион сўмдан 5,796 миллион сўмгача, дейилади Миллий статистика қўмитаси ҳисоботида.

Йиллик инфляция (10,3%) ҳисобга олинганда иш ҳақининг реал ўсиш суръати 7,7% ни ташкил этди.

Ҳудудлар кесимида энг юқори ўртача номинал иш ҳақи Тошкент шаҳрида сақланиб қолди. Йиллик кўрсаткичда у 22,7% (2024 йил январь-март ойидаги 22,3 фоизга нисбатан) ўсиб, 8,12 миллион сўмдан 9,89 миллион сўмга етди. Номинал ўртача иш ҳақи бўйича охирги ўринни Қашқадарё вилояти эгаллаб турибди — 3,59 миллион сўмдан 4,08 миллион сўмга (16% га нисбатан +13,7%).

Пойтахт ва ҳудудлар ўртасидаги иш ҳақи фарқи кенгайишда давом этмоқда. Хусусан, энг юқори (Тошкент) ва энг паст (Қашқадарё) иш ҳақи ўртасидаги фарқ 2,26 дан 2,42 баробарга ошди. 2022 йил охирида бу кўрсаткич 2,18 баробарни ташкил қилган, 2021 йилда — 2,06 баробар, 2020 йилда — 1,97 баробар.

Фаолият турлари бўйича энг юқори ўртача иш ҳақи ҳали ҳам банк, молия ва суғурта соҳаларида — улар йил давомида 15,85 миллион сўмгача ошган, бироқ ўсиш суръати ўзгармаган (19,8%).

Ахборот ва коммуникация соҳаси 26,8% ошди — 14,8 миллион сўмгача (2024 йилнинг биринчи чорагида ўсиш 23,5% ни ташкил этган), транспорт ва сақлаш соҳаси — 8,72 миллион сўмга (18,8% га нисбатан 16%), саноат — 6,92 миллион сўмга (19,7% га нисбатан 13,6%).

🔥 @fayzboguz

Украинанинг “Хочу жить” лойиҳаси Россия армияси сафида Украинага қарши урушаётган 1110 нафар ўзбекистонлик ёлланма жангчилар номини эълон қилди

Таъкидланишича, бу рўйхат тўлиқ эмас. Россия томонидан Украинадаги кенг кўламли урушга жалб қилинган Ўзбекистон фуқароларининг умумий сони бир неча минг кишини ташкил қилиши мумкин.

“Хочу жить” лойиҳасига кўра, урушда камида 109 нафар ўзбекистонлик ҳалок бўлган. Улардан энг ёши ҳали 21 ёшга тўлмаган, энг ёши каттаси эса 62 ёшда бўлган. Ёлланма жангчилардан бири шартнома имзолаганидан атиги саккиз кун ўтиб ҳалок бўлган.

«Ўзбекистон КХШТ (ОДКБ)даги аъзолигини тўхтатиб турган бўлишига қарамай, бу ҳукуматга ўз фуқароларининг Россия армияси сафларига ёлланишида кўз юмиб туришига халақит қилмаяпти», – дейди муаллифлар.

🔥 @fayzboguz

Тўртта партия бирлашиб, ЎзЛиДеП киритган қонунни ўтказмади

Олий Мажлис Қонунчилик палатасининг 29 апрел куни бўлиб ўтган ялпи мажлисида ЎзЛиДеП фракцияси депутатлари ишлаб чиққан — «Меҳнат кодексига хусусий сектор учун белгиланган ижтимоий мажбуриятларни эркинлаштиришга қаратилган ўзгартириш ва қўшимчалар киритиш тўғрисида»ги қонун лойиҳаси биринчи ўқишда консептуал жиҳатдан кўриб чиқилди.

Хусусий секторда ходимларни ишдан бўшатишни соддалаштириш, ўриндошлик асосида ишлаётган ходимга ишдан бўшатилгани муносабати билан компенсация тўлашни бекор қилиш кабиларни кўзда тутувчи қонун лойиҳаси рад этилди.

ЎзЛиДЕП киритган лойиҳани партиянинг барча 57 аъзоси қўллаб-қувватлаган бўлса, қолган партиялар 71 та қарши овоз билан қонунни ўтказмади. Овоз бериш жараёнида ЎзЛиДеП партиясидан бир депутат иштирок этмади, “Миллий тикланиш” партиясининг икки аъзоси бетараф қолди.

🔥 @fayzboguz

Россиянинг «Транспорт будущего» компанияси 2025 йил охиригача Ўзбекистонда фуқаролик дронларини ишлаб чиқарувчи корхонани ишга туширади

Бу ҳақда компания бош директори Юрий Козаренко «Иннопром. Марказий Осиё» халқаро саноат кўргазмасида маълум қилди.

«Биз бозорни таҳлил қилдик ва шуни айтишимиз мумкинки, бугунги кунда ўн минглаб дронларни бозорга иқтисодий ва самарали интеграциялаш мумкин, бу эса кўпроқ рентабелликни таъминламоқда. Бу ерда Ўзбекистон Республикасида қурилаётган қўшма корхонамиз жорий йил охиригача ишга туширилади, ишлаб чиқариладиган маҳсулот ҳажми 100 миллион доллардан ортиқ бўлишини кутмоқдамиз», — деди у.

Козаренко сўзларига кўра, дронлардан фойдаланиш учун Росавиация ва Ўзбекистон Транспорт вазирлиги ҳузуридаги Фуқаро авиацияси агентлиги (ЎзАвиация) билан бир қанча ишларни амалга ошириш керак.

🔥 @fayzboguz

Қозоғистон шаҳарларида 9 май куни тантанали юришлар ўтказилишига рухсат берилмади — «Настоящее время»

Жумладан, Олмаота ҳокимлиги ҳам ушбу тадбирнинг ўтказилишига рози бўлмаган. Русийзабон аҳолининг катта қисми яшайдиган Павлодар ва Петропавловскда расмийлар тадбирни интернетга кўчириш ҳамда фронтдаги аскарларнинг суратларини махсус LED-экранларга жойлаштиришни таклиф қилган.

Тақиқни четлаб ўтишга қаратилган ҳар қандай уриниш рухсат этилмаган митинг сифатида баҳоланади ва жарима ёки ҳибсга олинишга сабаб бўлади.

Қозоғистон шаҳарларида «Ўлмас полк» охирги марта 2019 йилда ўтказилган эди. Кейин коронавирус пандемияси сабаб икки йил ташкил этилмади. 2022 йилда Россия Украинага бостириб киргач, акция ўрнини миллий рамзларга эга «Қаҳрамонларга таъзим» номли тадбирлар эгаллади.

Қозоғистоннинг янги ҳокимияти Россия пропагандасига етарли баҳо беришни бошлади. Шундай қатъият керак. Марказий Осиё Путиннинг орқа ҳовлиси эмаслигини кўрсатиб қўйиш вақти келди.

🔥 @fayzboguz

Ўзбекистон агар эмас, қачонки катта АЭС мавзусига қайтса, Россия нафақат техник, балки молиявий ва ташкилий масалалар бўйича ҳам тайёр таклифларни тақдим этади — “Росатом” директори Алексей Лихачев

Ўзбекистон президенти Шавкат Мирзиёев 28 апрел куни Тошкентда Россиянинг “Росатом” давлат корпорацияси бош директори Алексей Лихачев билан учрашди.

ТАСС мухбири билан гаплашган Алексей Лихачев Тошкент ва Москва кам қувватли АЭС қурилиши бўйича барча юридик масалаларни ҳал қилиб олганини айтди.

“Агар эмас, қачонки Ўзбекистон раҳбарияти катта АЭС мавзусига қайтса, бизда нафақат бўлажак объектларнинг шакл-у шамойили бўйича, балки шу ерда, Ўзбекистонда маҳаллийлаштириш, маҳаллий ишлаб чиқарувчилар ва катта кўламдаги ишларни ўз ичига олувчи молиявий ва ташкилий масалаларда ҳам тайёр таклифларимиз бўлади. Кам қувватли АЭС қурилиши халқаро ҳамкорлик шаклида амалга оширилади, лекин ядровий технологиялар, жумладан, реактор Россияники бўлади”, – деди Лихачев.

Эслатиб ўтамиз, президент Шавкат Мирзиёев ҳузурида ўтган йиғилишлардан бирида кичик АЭС масаласидан ташқари, катта қувватли АЭС қуришнинг техник-иқтисодий жиҳатлари ва уни барпо этиш режалари ҳам кўриб чиқилганди.

🔥 @fayzboguz