Файзбоғ (ТемурМалик)

Ўзбекистон фуқароси 5 млн долларга Сеулнинг элит турар жой комплексидан квартира сотиб олди

Жанубий Кореянинг Сеул шаҳридаги машҳур Banpo Xi турар жой комплексида жойлашган 244㎡ квартира 7,4 млрд вонга (тахминан 5 млн 94 минг доллар) сотилди, дея хабар берди маҳаллий Choson.biz нашри. Тўлов нақд пулга амалга оширилган. Бу ушбу ҳудуддаги энг юқори транзакция бўлган.

Қайд этилишича, ҳашаматли харид 41 ёшли Ўзбекистон фуқароси А. томонидан ўтган йилнинг ноябр ойида амалга оширилган. Харидорнинг манзили сифатида Тошкентдаги “Корея-Ўзбекистон анъанавий тиббиёт клиникаси” кўрсатилган. Унинг шахси ҳақида аниқ маълумот йўқ.

Banpo Xi жами 3410 та турар-жойдан иборат катта мажмуа бўлиб, бу ердаги хонадонларда Жанубий Кореянинг бир қатор бой ва машҳур инсонлари яшайди.

🔥@fayzboguz

Ўзбекистонлик муҳожирлар орасида Россияга йўл олаётганлар 57 фоизгача камайган — Жаҳон банки ҳисоботи

Жаҳон банки “Олдинга йўл: Европа ва Марказий Осиё минтақасида муваффақиятли миграцияни қўллаб-қувватлаш” номли ҳисоботини тақдим этди.

Қайд этилишича, 2020 йилда Қозоғистондан чиқиб кетган 4 миллион муҳожирнинг деярли учдан икки қисми Россияга, чорак қисми эса Германияга ишлашга борган.

Қирғизистон ва Тожикистондан бўлган муҳожирларнинг Россия иқтисодиётига боғлиқлиги бундан ҳам юқори. 2023 йил ҳолатига кўра, тожикистонлик ва қирғизистонлик меҳнат муҳожирларининг 80 фоиздан ортиғи Россияга йўл олган.

Ўзбекистонлик муҳожирлар оқими кўпроқ диверсификацияланган: 57 фоизи Россияда, 15 фоизи Қозоғистонда ва 10 фоизи Украинада ишлайди. Кейинги ўринларда АҚШ ва Европа турмоқда.

2024 йил ҳолатига кўра, меҳнат муҳожирларининг пул ўтказмалари Тожикистон ялпи ички маҳсулотининг 45 фоизини ташкил этди – бу нисбий маънода дунёдаги энг юқори кўрсаткичдир. Қирғизистонда пул ўтказмаларининг ЯИМдаги улуши 24 фоиз, Ўзбекистонда эса 14 фоизни ташкил этди.

Ҳисоб-китобларга кўра, Ўзбекистонга пул ўтказмалари бўлмаса, мамлакатдаги камбағаллик даражаси 9,6 фоиздан 16,8 фоизгача ошиши мумкин.

Жаҳон банки, шунингдек, Украинадаги уруш бошлангандан кейинги кўрсаткичларга эътибор қаратди. Россияда ҳарбий сафарбарлик эълон қилингач, атиги 1 ой ичида ўзбекистонлик муҳожирлар сони 15 фоизга, 2022 йилнинг охирги уч ойида эса умумий 36 фоизга қисқарган.

🔥@fayzboguz

Залужний: «АҚШ Кремл режими томон кўпроқ қадам ташламоқда»

Украина қуролли кучлари собиқ бош қўмондони Валерий Залужний пайшанба куни Лондонда бўлиб ўтган хавфсизлик конференциясида нутқ сўзлар экан, Доналд Трампнинг янги маъмурияти ташқи сиёсатини танқид остига олди.

«Россия ва ёвузлик ўқи дунё тартибини бузишга уринаётган бир пайтда, Вашингтон Кремл режими томон тобора кўпроқ қадам ташламоқда», — деди у.

Ҳозирда мамлакатнинг Буюк Британиядаги элчиси лавозимида фаолият олиб бораётган Залужний Вашингтоннинг позицияси ўзгариши натижасида НАТО ўз мавжудлигини йўқотиши мумкинлигини ҳам тахмин қилди. У Москванинг кейинги нишони «Европа бўлиши мумкинлиги» ҳақида огоҳлантирди.

Шу билан бирга, Залужний ўз нутқи давомида разведка маълумотлари алмашинувидаги пауза, шунингдек, Россиянинг Украинадаги тажовузини қораловчи БМТ резолюциясига Американинг қарши чиққани «бутун дунё учун жиддий чақириқ» эканини айтди.

Валерий Залужний ҳозирда Украинанинг энг машҳур сиёсатчиси, у энг юқори рейтингга эга ва сайловлар бўлган тақдирда президент бўлиш имкониятига эга.

АҚШнинг юқори мартабали амалдорлари сўнгги кунлар ва ҳафталарда Украинага президентлик сайловлари кераклигини, кўпроқ келишувчан раҳбар сайланганда Киев Россия ва АҚШ талабларига ён бериши мумкинлигини бир неча бор таъкидлади. Аммо Залужнийнинг бундай баёнотлари Украинада президент алмашган тақдирда ҳам ҳозирги мавжуд сиёсат ўзгармаслигини намойиш этмоқда.

🔥@fayzboguz

Ўзбекистонда кўчмас мулк сотуви бўйича Жиззах ва Навоий биринчи ўринларда. Тошкентда уйлар нархи пасайган

Ўзбекистонда 2025 йилнинг дастлабки ойида кўчмас мулк олди-сотди шартномалари 25,5 мингтани ташкил этиб, ўтган йилга нисбатан 17,4 фоизга ўсди. Бу ҳақда Иқтисодий тадқиқотлар ва ислоҳотлар маркази маълум қилмоқда.

Қайд этилишича, иккиламчи бозорда Сурхондарё, Жиззах ва Фарғона вилоятларида нархлар ўсиши кузатилган бўлса, Тошкент шаҳрида нархлар деярли ўзгармади – бироқ пойтахтда йиллик ҳисобда уйлар нархлари 2,3 фоизга пасайди.

"Энг сезиларли ўсиш Жиззах вилоятида қайд этилиб, сотувлар 44 фоизга ошган, шунингдек, Навоий вилоятида 36 фоизга ўсган. Тошкент шаҳри кўчмас мулк бозори умумий ҳажмининг 28 фоизини ташкил этиб, битимлар сони 18 фоизга ўсган", дейилади таҳлилда.

🔥@fayzboguz

«Хавотирга ўрин йўқ». Кадастр агентлиги Тошкент ерларини хитойликлар хусусийлаштириб олаётгани ҳақидаги хабарларга муносабат билдирди

Ижтимоий тармоқларда сўнгги кунларда Тошкент шаҳрида Хитой фуқаролари кўпайгани, шаҳар ҳудудининг катта қисмини сотиб олаётгани, шу сабабли кўчаларда хитой тилидаги турли баннер ва рекламалар пайдо бўлиб қолгани ҳақида хабарлар тарқалди. Фойдаланувчилар пойтахт ерлари хитойлик бизнесменларга бериб юборилаётганидан хавотирлар билдирган.

Кадастр агентлиги мазкур ноаниқлик фонида муносабат билдирди ва уларни «нотўғри хабарлар» деб атади. Ташкилот Ер кодексининг 17-моддасида чет эллик фуқаролар ва юридик шахслар, фуқаролиги бўлмаган шахслар, чет эл инвестициялари иштирокидаги корхоналар ер участкаларига фақат ижара ҳуқуқи асосида эга бўлиши мумкинлиги белгиланганини эслатди.

Агентликнинг таъкидлашича, ижарага берилган ерни хусусийлаштириб олишади, деб ваҳимага тушмаслик лозим. «Хавотирга ўрин йўқ. Чет элликларга ер хусусийлаштириб берилмайди», — деб ёзди ташкилот.

🔥@fayzboguz

Трамп Украинага ҳарбий ёрдамни вақтинчалик тўхтатиб қўйди

АҚШ президенти Дональд Трамп Украинага ҳар қандай ҳарбий ёрдам беришни тўхтатишни буюрди ва Овал кабинетдаги тортишувдан сўнг президент Володимир Зеленскийга босимни кучайтирди. Бу ҳақда Bloomberg ва CNN хабар бермоқда.

"Президент тинчликка эътибор қаратаётганини аниқ кўрсатди. Ҳамкорларимиз ҳам шу мақсадга содиқ бўлиши керак. Биз можарони ҳал қилишга ёрдам беришига ишонч ҳосил қилиш учун ёрдамимизни тўхтатмоқдамиз ва қайта кўриб чиқмоқдамиз. Ёрдам Трамп Украина раҳбарияти тинчликка интилишини намойиш қилаётганига ишонч ҳосил қилмагунча тўхтатилади", — дея CNN Оқ уйнинг исми ошкор этилмаган вакили сўзларини келтирди.

АҚШ президентининг миллий хавфсизлик бўйича маслаҳатчиси Майкл Уолтцнинг айтишича, Россия билан тинчлик музокаралари бошланса, Трамп Украинага ёрдамни қайта тиклаши мумкин.

Зеленский билан 2 март куни Лондондан учиб кетишидан олдин суҳбатлашган BBC News журналисти Лаура Кюнсберг Украина етакчиси Оқ уйда содир бўлган воқеалар учун Трампдан узр сўраш ниятида эмаслигини, бироқ АҚШ билан фойдали қазилмалар бўйича келишув имзолашга тайёрлигини айтди. Зеленский, шунингдек, Украина тинчлик тарафдори эканини ва уруш тезроқ тугашини исташини, аммо келажакда Россиянинг эҳтимолий ҳужумидан ҳимояланиш учун хавфсизлик кафолатларига муҳтожлигини бир неча бор айтган.

🔥@fayzboguz

6 март куни метан заправкалар фаолияти босқичма-босқич йўлга қўйилиши айтилди

Энергетика вазирлиги 6 март, соат 09:00 дан бошлаб метан заправкалар фаолияти босқичма-босқич йўлга қўйилишини маълум қилди.

Қайд этилишича, март ойининг дастлабки кунларида Ўзбекистонда ҳаво ҳарорати кескин тушиб, табиий газ истеъмолининг ортиши ва газ қувурларида босимнинг пасайишига сабаб бўлган. Мазкур ҳолатда биринчи навбатда аҳоли ҳамда ижтимоий соҳа объектларини табиий газ билан таъминлашга устуворлик қаратилган ва автомобилларга газ тўлдириш компрессор шохобчалари фаолияти вақтинчалик тўхтатилган.

«Ўтган кунлар мобайнида олиб борилган тезкор чора-тадбирлар натижасида қувурларда газ босими нормаллаштирилди. Бу эса метан заправкалар иш фаолиятини тиклаш имконини яратди», — дейилади хабарда.

Вазирлик келтирилган ноқулайликлар учун истеъмолчилардан узр сўрайди.

🔥@fayzboguz

АҚШ Россияга нисбатан санкцияларни юмшатиши мумкин

Қўшма Штатлар президенти Доналд Трамп маъмурияти Давлат департаменти ва Молия вазирлигига Россияга нисбатан юмшатилиши мумкин бўлган жорий санкциялар рўйхатини тайёрлашни топширди. Бу ҳақда Reuters агентлиги хабар бермоқда.

Reuters агентлиги Трампнинг Москва билан муносабатларни яхшилаш ва Украинадаги урушни тўхтатиш ниятлари фонида рўйхат лойиҳасини Россияга қарши «санкцияларни юмшатиш режаси» деб атади. Агентлик манбаларига кўра, АҚШ вакиллари яқин келажакда режалаштирилган музокаралар доирасида ушбу рўйхатни Россия расмийлари билан муҳокама қилади.

Айни пайтда АҚШ расмийлари Россиянинг алоҳида юридик ва жисмоний шахсларига, жумладан бир неча олигархларга нисбатан санкцияларни бекор қилиш бўйича таклифлар тайёрламоқда. Вашингтон санкцияларни юмшатиш эвазига айнан нимани талаб қилиши номаълумлигича қолмоқда, дея қайд этади Reuters. Агентликнинг қўшимча қилишича, айрим санкцияларни бекор қилиш фақат АҚШ Конгресси розилиги билан рўй бериши мумкин.

🔥@fayzboguz

Ўзбекистонда давлат хизматчилари даромадини декларациялашга оид қонун қабул қилиниши мумкин

Шавкат Мирзиёев давлат хизматчилари даромадини декларациялашга оид қонунни қабул қилиш вақти-соати келганини айтди. Унинг фикрича, бу борада жамоатчилик фикри жуда муҳим.

Мутасаддиларга тез фурсатда ушбу қонун лойиҳасини жамоатчилик муҳокамасига қўйиб, 1 апрелгача киритиш топширилди.

Шунингдек, ноқонуний бойлик орттириш учун жавобгарлик масаласини ҳам ўйлаб кўриш зарурлиги таъкидланди. Қайд этилишича, қонунчиликка ноқонуний бойлик орттириш ҳақида модда киритилиши мумкин. Унга кўра, давлат хизматчиси декларация қилган даромадига мос келмайдиган мол-мулкини қаердан олганини исботлаши керак бўлади.

Миллий кенгаш, парламентнинг коррупцияга қарши курашиш қўмиталари ушбу масала юзасидан халқаро андозаларга мос таклифларни ишлаб чиқишга чақирилди.

🔥@fayzboguz

Зеленскийни Лондонда анча яхши кутиб олишди. Бу ерга йиғилган Европа (ва Канада) лидерлари унга кўпроқ ёрдам беришни ваъда қилдилар. “Тарихдан биламиз, агар Европада нотинчлик бўлса, бу барибир бизнинг қирғоқларимизгача келади”, деди Британия Бош вазири Кийр Стармер. У Украинага 5 мингта ҳаво мудофааси тизимларини сотиб олиши учун 1,6 млрд фунт унинг тасарруфида бўлишини айтди. Десертига Зеленский Қирол Чарлз билан учрашувга чиқиб кетти.

Стармер дипломатияни яхши эплайди, ҳарқалай адвокат ва прокурор ролларида олдин судларда кўп гапирган, Лейбористлардаги бўлинишлардан фойдаланиб партия тепасига чиқиб олиш учун ҳам у дипломатияни кенг қўллаган. Шу сабаб бўлса керак, журналистлар Европа ва АҚШнинг Украинага ёндошувларидаги контрастга эътиборни қаратишга қанча уринишмасин, Стармер уларни дипломатик ракеткаси билан уриб қайтарди ва Америка ҳақида салбий фикр билдиришдан тийилди. “Америка барибир керак бу жараёнда”, каби ярашув оҳангидаги баёнотлари ёпиқ эшиклар ортидаги гаплардан фарқ қилишини ҳамма билиб турибди - бугун йиғилган лидерлар орасида Трампнинг ишончсизлиги ҳақида кўп ҳазил-мутойиба бўлган бўлса, ажабмас (айниқса Трудо гапни қотиради).

Европа, кўп ҳарбий таҳлилчилар фикрида, Россияга бемалол тенг кела олади, бунга шубҳа йўқ - Франция ва Британияда атом бомбалари ҳам бор. Лекин, мудофаага харажатни ошириш керак ва бу нозик масала. Мудофаага пул дарахтда ўсмайди - у қаердандир келиши керак: тиббий соҳа, ижтимоий ҳимоя, янги қурилишлар камайиб, солиқлар оширилиши керак бўлади. Бундан эса ҳеч ким ютмайди. Фақат урушни истаган одам ютади.

Ибрат Сафо

🔥@fayzboguz

Korzinka супермаркетлар тармоғи асосчиси, тадбиркор Зафар Ҳошимов ёзмоқда:

"Бугун тонгда саҳарликка туриб, Вашингтонда Оқ Уйда содир бўлган кўнгилни хира қилган тортишувни кўрдим.

Президент Трамп ва вице-президент Венс, икки кишилашиб, мана уч йилдирки ўз ватани мустақиллиги ва территориал даҳлсизлигини агрессордан ҳимоя қилиб келаётган довюрак украин президентига таъналар отиб, унинг мамлакати ва халқини “заиф ва иложсиз”, “ўйнайдиган картаси йўқ”, деганча уни мажбурлаб, ҳеч қандай кафолатсиз ўзлари учун “тинчлик” деб номлаб олган, аслида эса тажавузкорга ён берадиган оташкесим келишувига кўндирмоқчи бўлишди.

Уч йил олдин қуролли агрессияга қандай жасурлик билан қаршилик кўрсатган бўлса, бу гал ҳам ушбу оғзаки ташланишга президент Зеленский мардлик ва матонат ила қаршилик кўрсатди.

Жанжални кўриб қилган бир неча хулосаларим:

- Трамп Украина урушини барқарор тугатиш масаласини ҳал этмаяпти, у жуда тор маънода, ўзи берган “мен келган куним Украинада урушни тўхтатаман” деган хомхаёл ваъдасини бажардим деб, сайловчиларига юзаки кўз-кўз қиладиган оташкесимни тақдим этмоқчи;

- Трамп Украина учун бу каби тинчлик ўрнатиш таслим бўлиш билан баробар эканини кўра олмаяпти, ёки тан олгиси келмаяпти;

- Трамп Оқ уйдаги жанжал ва ундан олдинги бўлган изоҳлари билан ўзини ва умуман олганда АҚШни Россия-Украина тўқнашувида ишончли воситачи мақомидан тушириб қўйди. Воситачи бу даражада очиқ бир тарафлама бўлмайди;

- Трамп учун бу музокара кенг маънода ташқи сиёсат мезони эмас, аксинча, ички сиёсат учун қурол. Ҳар икки сўзида Трамп дунё олдиндаги уруш ва тинчлик масалаларини ҳал қилиш билан эмас, балки қайта ва қайта ўзининг АҚШ ичидаги сиёсий рақиблари, собиқ президентлар ва, хусусан, демократларга тош отиш учун баҳона сифатида фойдаланяпти;

- Ўзини энг мохир музокарачи, деб биладиган Трамп, музокара олиб боришда энг элементар жойларида жуда қўпол хатоларга йўл қўймоқда. Масалан, баҳс жараёнида ҳатто барча куч унинг тарафида бўлса-да, қарши тарафни камситиб, ён беришга мажбурлаш, унинг иззат нафсига тегиб, ўз хоҳишини ўтказиш кўп ҳолларда акс натижага олиб келади. Тескариси, ҳамма карта Трампнинг қўлида бўлса-да, рақибга камида битта карта қолдириши керак эди, унинг рақибининг обрў-иззати (dignity) картасини тортиб олишга уруниши жуда катта хато бўлди. Ҳар холда бизни музокаралар бобида шундай ўқитишган эди.

Шу жумлаларни ёзаётган пайтимда Трамп твиттерда Зеленскийни унга Оқ Уй Овал хонасида беҳурматлик қилганликда айблади. Аксинча, мен бу ерда учрашув мезбонлари меҳмонга нисбатан қўпол ва ҳурматсизлик, миннат қилиш ва камситиш аломатларини кўрдим.

Зеленскийга нисбатан эса, мардлиги, довюраклиги ва ҳеч қандай куч олдида ўз ватани манфаатларидан чекинмаслигини яна бир бор намойиш этгани учун ҳурматим яна бир карра ошди. Зеленский, бири ерини, иккинчиси ер ости бойликларини тортиб олмоқчи бўлган иккита ҳайбатли очкўз зўравонларга Украина манфаатлари йўлида довюраклик билан қаршилик кўрсатяпти".

🔥@fayzboguz