23.5° бурчак остида

🇺🇸🇨🇳АҚШ президенти Доналд Трамп Хитой раиси Си Жинпиннинг Қўшма Штатларга ташрифини кутаётганини билдирди

Трамп бу ҳақда Air Force One президент самолётида журналистларга маълум қилган, лекин ташриф санасини очиқламаган.

Журналистлар АҚШ президентидан "Хитой билан янги савдо битими имзоланиши мумкинми?", деб сўрашганда, у бу эҳтимолни рад этмади ва "Бу мумкин" деб жавоб берди

🔥 @burchakostida

🇺🇸Military.com нашрининг маълум қилишича, Илон Маск раҳбарлик қилаётган АҚШ Давлат бошқаруви самарадорлиги департаменти (DOGE) экспертлар гуруҳи Пентагоннинг бюджет харажатларини текширишни бошлади

Мутахассислар АҚШ Мудофаа вазирлигининг ахборот тизимлари ва маълумотлар базасига кириш имкониятини Пентагон раҳбари Пит Ҳегсетнинг ёрдами билан қўлга киритдилар.

🔥 @burchakostida

🇺🇸🇺🇦Reuters: Трамп маъмурияти Украина табиий ресурсларидан фойдаланиш бўйича соддалаштирилган шаклдаги битим тузиш имкониятини кўриб чиқмоқда

Агентлик манбаларининг маълум қилишича, битимнинг соддалаштирилган варианти келишувни тезроқ имзолаш имконини беради, батафсил шартлар эса кейинроқ муҳокама қилинади.

Reuters нашри манбалари Украина Трамп маъмурияти билан табиий ресурслар бўйича битим тузишга тайёр эканлигини билдирган. Агентликнинг яна бир суҳбатдоши битим шартлари талончилик кўринишида бўлмаслиги кераклигини қўшимча қилди. Уларнинг таъкидлашича, Трамп Вашингтон Украинага ёрдам учун сарфлаган маблағларини қайтариб олаётганини АҚШ халқига ошкора эълон қила олиши муҳим ҳисобланади.

Феврал ойи бошида Трамп Украина раҳбарияти билан келишув тузмоқчилигини маълум қилган эди. Унга кўра, АҚШнинг Киевга кўрсатадиган ҳарбий ва молиявий ёрдами Украинадан АҚШга нодир ер элементларини етказиб бериш билан боғлиқ бўлиши керак эди. 12 феврал куни келишув лойиҳаси Володимир Зеленскийга топширилди, аммо у келишувни имзолашдан бош тортди.

🔥 @burchakostida

🇵🇱🇺🇦🇷🇺 Украинада хорижий контингентнинг мавжудлиги тинчликни кафолатламаслиги мумкин — Полша Мудофаа вазири Косинияк-Камиш.

🔥 @burchakostida

🇷🇺🇺🇦🇺🇸NATO'га аъзо давлатлар ҳарбийларининг Украина ҳудудида жойлаштирилиши Россия учун қабул қилиб бўлмайдиган ҳолат — Песков

Песковнинг бошқа баёнотлари:

◾ АҚШнинг аввалги маъмурияти Россияга қарши охирги украиналик қолгунига қадар уруш олиб боришни хоҳлаган ва Киевни молиялаштириш локомотиви бўлган, хозирга келиб бу ёндашув ўзгарган;

◾ Украина можаросини тартибга солиш бўйича аниқ қарор ҳали мавжуд эмас;

◾ Кремл Киев ва Вашингтоннинг янги маъмурияти ўртасида тафовутлар борлигини кўрмоқда;

◾ Зеленскийнинг рейтинги тушиб бормоқда, бу аниқ тенденция;

◾ Кремл АҚШ маъмуриятининг Украинадаги можарони тинч йўл билан ҳал қилиш афзаллиги ҳақидаги фикрига қўшилади.

🔥 @burchakostida

🇩🇪🇷🇺 DW: Россия дезинформацион кампаниялар орқали Германиядаги сайловларга аралашишга ҳаракат қилмоқда

Россия фаол равишда сохта маълумотларни тарқатмоқда. Масалан, канцлерликка номзод Фридрих Мерц ўз жонига қасд қилмоқчи бўлгани ҳақидаги видеолар тарқатилган. Унинг рақиблари – “Яшиллар” партияси вакиллари Роберт Ҳабек ва Клаудия Рот эса коррупцияда айбланган.

"Бундай фейк хабарлар бир хил схема бўйича тайёрланган – унда ёлғон гувоҳларнинг кўрсатмалари ва сохта ҳужжатлар ишлатилган. Аввалига, бу материаллар гўёки ишончли янгиликлар сайтлари кўринишидаги платформаларда эълон қилинади, аммо аслида улар дезинформация", деб ёзади DW.

AFP агентлигига кўра, бундай хабарларни “Матрёшка” деб номланган кампания орқали қўллаб-қувватламоқда. Ботлар армияси “чалғитувчи ҳужум” уюштирмоқда, улар журналистларга фейкларни текширишни сўраб, гўёки ишончли маълумотларни юборади. Натижада, дезинформация тарқалишда давом этади, фактларни текширувчи экспертларнинг иши эса “блокланади”.

🔥 @burchakostida

🇿🇦🇺🇸 Жанубий Африкада G20 ташқи ишлар вазирларининг учрашуви бошланмоқда, аммо АҚШ давлат котиби унда иштирок этишдан бош тортди

Қўшма Штатлар Давлат котиби Марко Рубио G20 давлатлари ташқи ишлар вазирларининг Жанубий Африкадаги йиғилишида иштирок этмаслигини маълум қилди.

"Менинг вазифам АҚШнинг миллий манфаатларини илгари суришдан иборат, солиқ тўловчиларнинг пулини сарфлаш ёки антиамериканизмга ён босиш эмас", — дея ўз қарорини изоҳлади Рубио.

АҚШ ва Жанубий Африка ўртасида бир қатор масалаларда келишмовчиликлар мавжуд. Бунга асосий сабаб, ЖАР президенти Сирил Рамафоса томонидан 2025 йил январида имзоланган ерларни мусодара қилиш тўғрисидаги қонуни ҳисобланади.

Қўшма Штатлар президенти Доналд Трампнинг фикрича, ушбу қонун Жанубий Африка ҳукуматининг оқ танли аҳолига нисбатан дискриминациясига олиб келади, чунки қонун йирик мулкдорларга тегишли ерларни қора танли аҳолига қайта тақсимлашни кўзда тутади.

Шу билан бирга, Трамп Жанубий Африкага ёрдам дастурларини музлатиб қўйди ва африкаанерларни (ЖАРдаги оқ танли аҳоли) АҚШга кўчириш ташаббусини илгари сурди.

Трампнинг қарорини тадбиркор Илон Маск ҳам қўллаб-қувватламоқда. Маск Жанубий Африканинг Претория шаҳрида туғилган ва 17 ёшигача шу ерда яшаган бўлиб, кейинчалик АҚШга кўчиб ўтган.

🔥 @burchakostida

🇪🇺🇺🇸🇷🇺 Европа Иттифоқи расмийлари АҚШнинг Россияга қарши санкцияларни қўллаб-қувватлашда давом этишига шубҳа қилмоқда — Financial Times.

🔥 @burchakostida

🇺🇸🇳🇵New York Times: Трамп Байден даврида Непалга ажратилган 500 миллион долларлик грантни тўхтатди

Байден маъмурияти Хитойга боғлиқликнинг олдини олиш мақсадида, 2022 йилда Непалга инфратузилмани тиклаш ва янгилаш учун беш йиллик муддатга 500 миллион долларлик грант ажратган, деб ёзади нашр.

Қайд этилишича, орадан уч йил ўтиб, Трамп маъмурияти молиялаштириш ишларини лойиҳанинг ўртасида тўхтатиб қўйди. Непал ҳукумати эса бу ҳолатга нисбатан ҳеч қандай муносабат билдирмаган.

🔥 @burchakostida

🇺🇸🇺🇦🇷🇺 Президент Трампнинг Украинага нисбатан ҳаракатлари Иосиф Сталиннинг "орзу"сини амалга оширишга ёрдам бермоқда

"АҚШнинг Япониядаги собиқ элчиси Рам Эмануел Доналд Трампнинг Украина-Россия уруши борасидаги сиёсатига шундай таъриф берди", деб ёзади Тhe Hill.

Собиқ элчи Россиянинг Иккинчи жаҳон урушидан бери асосий мақсади NATO'ни парчалашдан иборат эканлигини айтиб, Трампнинг бу жараёнга ҳисса қўшаётганини таъкидлади.

"Иосиф Сталин давридан бери бу ягона мақсад бўлиб келган ва Қўшма Штатлар президенти Сталиннинг орзусини рўёбга чиқармоқда", — дея таъкидлади Эмануел.

🔥 @burchakostida

🇺🇸🇺🇦🇷🇺Россия тинчлик келишувларини бузган тақдирда, Украина автоматик тарзда НАТОга аъзо бўлиш имкониятига эга бўлиши мумкин — NBC

АҚШ бундай эҳтимолий сценарийни Украинага хавфсизлик кафолатларидан бири сифатида кўриб чиқмоқда. Бу ҳақда NBC тўрт нафар америкалик мансабдор шахсларга таяниб хабар бермоқда.

Манбаларга кўра, бу чора Украина ва Европа Иттифоқининг Россия куч тўплаб, янги ҳужум уюштириши мумкинлиги ҳақидаги хавотирларини бартараф этишга қаратилган. Шунингдек, хавфсизлик кафолатларини таъминлаш бўйича асосий шарт нодир ер металллари бўйича келишув эканлиги таъкидланяпти, бироқ у ҳозирча «номаълум ҳолатда» қолмоқда, деб таъкидлайди NBC манбалари.

🔥 @burchakostida

🇺🇸🇨🇳 Трамп Хитой билан савдо ва хавфсизлик, хусусан, ядровий қуроллар соҳасини қамраб олувчи йирик битим тузишни хоҳламоқда

Бу ҳақда The New York Times АҚШ президенти маслаҳатчиларига таяниб хабар берди.

У Хитойнинг катта сармоялари ва кўпроқ АҚШ маҳсулотлар харид қилиш мажбуриятини ўз ичига олувчи келишувга қизиқиш билдирмоқда. Шу каби битим 2020 йилда имзоланган бўлса-да, Пекин қўшимча $200 миллиардлик товар ва хизматларни сотиб олишни амалга ошира олмаган.

NYT’нинг ёзишича, Хитой “АҚШ миллий хавфсизлигига энг катта таҳдидлардан бири” бўлишига қарамай, йирик савдо ҳамкори ва ядровий хавфсизлик, технологиялар ҳамда пандемияга тайёргарлик каби масалаларда асосий ўйинчи саналади.

Нашр музокаралар жуда оғир кечишини тахмин қилмоқда.

🔥 @burchakostida

🇺🇸🇺🇦 DW: Трампнинг махсус вакили Киевда илк учрашувларини ўтказди, Вашингтон эса Зеленскийни танқид қилишда давом этмоқда

Трампнинг Россия ва Украина масалалари бўйича махсус вакили Кит Келлог Киевда Украина разведкаси ва махсус хизматлари раҳбарлари, Президент офиси раҳбари Андрей Ермак ҳамда Қуролли Кучлар Бош қўмондони Олександр Сирский билан учрашди. Бу ҳақда мамлакат президенти Володимир Зеленский маълум қилди.

Украина президенти Доналд Трампнинг махсус вакилини 20 феврал куни қабул қилиш ниятида эканини айтди.

"Биз учун Қўшма Штатлар вакили билан учрашув ва умумий фаолиятнинг конструктив бўлиши жуда муҳим. АҚШ ва Европа билан бирга дунё янада ишончли бўлиши мумкин, бу бизнинг мақсадимиз", — дея таъкидлади Зеленский.

Бу орада АҚШ Президенти Доналд Трамп яна Зеленскийни танқид қилди. У Киевни нодир ер металлари бўйича келишувни бузишда айблади. Reuters маълумотига кўра, Оқ уй Украинага соддалаштирилган битим таклиф қилиши ва тафсилотларни кейинроқ муҳокама қилишни режалаштириши мумкин. Ушбу масала Зеленский ва Келлог учрашувида кўтарилиши мумкин.

Шу билан бирга, АҚШ Миллий хавфсизлик бўйича маслаҳатчиси Майк Уолц Fox News'га берган интервюсида Киевнинг "кескин риторикаси" дан норозилигини билдирди. Уолцнинг айтишича, Трамп "бундай ҳолатга тоқат қилмоқчи эмас".

🔥 @burchakostida

🇫🇷🇺🇦🇺🇸Макрон ўзини “Украинани қўллаб-қувватлаш кафили” деб атади ва Трампнинг урушни якунлашга бўлган интилишини ижобий баҳолади

Франция президенти Европа етакчиларининг онлайн-саммити якунлари бўйича бир қатор баёнотлар билан чиқди. Ушбу саммитда Украинага тинчликпарвар кучларни юбориш бўйича қарор қабул қилинмади.

"Биз Украинани қўллаб-қувватлаймиз ва Европада тинчлик ҳамда хавфсизликни таъминлаш учун масъулиятни тўлиқ ўз зиммамизга оламиз. Бу Франциянинг фундаментал манфаатидир, мен эса унинг асосий гаранти ҳисобланаман", — деб ёзди Макрон Х ижтимоий тармоғида.

"Шу билан бирга, биз Трампнинг урушни тугатиш мақсадларини қўллаб-қувватлаймиз" — дея таъкидлади президент.

Бундан ташқари, Макрон тинчлик жараёнида қуйидаги учта асосий тамойилга амал қилиш лозимлигини қайд этди:

1. Украина доимо жараёнга жалб қилиниши ва унинг ҳуқуқлари ҳимоя қилиниши керак.

2. Тинчлик мустаҳкам бўлиши ва ишончли кафолатлар билан таъминланиши лозим.

3. Европа хавфсизлиги билан боғлиқ муаммолар инобатга олиниши шарт.

🔥 @burchakostida