Mikrokreditbank mijozlari huquqlari poymol qilinmoqda: mas’ullarning loqaydligi qachongacha davom etadi?
So‘nggi kunlarda “Mikrokreditbank” mijozlari bankning elektron tizimidagi nosozliklar tufayli jiddiy moliyaviy muammolarga duch kelayotgani haqida murojaatlar ko‘paymoqda. Fuqarolarning bildirishicha, 5 martdan beri bank kredit to‘lovlarini ortiqcha miqdorda, qayta-qayta yechib olmoqda. Eng achinarlisi shundaki, dam olish kunlari hisobga olinsa, bu holat yana bir necha kun davom etib, yuzlab, balki minglab insonlarning shaxsiy mablag‘larini noqonuniy ushlab turishga sabab bo‘lishi mumkin.
Bu nafaqat bank xizmatlarining sifatsizligi, balki iste’molchilar huquqlarining qo‘pol ravishda buzilishidir. Bank rahbariyati bunday jiddiy muammo yuzaga kelganiga qaramay, hali ham aniq izoh bermadi va muammoni bartaraf etish choralarini ko‘rmayapti.
Bankdagi bunday beparvolik shaxsiy mulk daxlsizligiga daxl qilishdan boshqa narsa emas. Fuqarolarning hisobvarag‘idan ularning roziligisiz ortiqcha pul mablag‘lari yechib olinishi nafaqat iste’molchi huquqlari to‘g‘risidagi qonunlarga, balki moliyaviy tashkilotlarning asosiy tamoyillariga ham zid.
Tegishli davlat organlari, jumladan, Markaziy bank va iste’molchilar huquqlarini himoya qiluvchi idoralar bu muammoga e’tibor qaratishi va bankni javobgarlikka tortishi lozim. Chunki bunday holatlar aholining moliyaviy barqarorligiga zarar yetkazadi va ijtimoiy norozilikni kuchaytiradi.
“Mikrokreditbank” rahbariyati tezroq chora ko‘rishi, ortiqcha yechilgan pullarni mijozlarga qaytarishi va kelajakda bunday vaziyatlarning oldini olish uchun aniq mexanizmlar ishlab chiqishlarini talab qilamiz. Aks holda, bunday loqaydlik davom etsa, bank tizimiga bo‘lgan ishonch butunlay yo‘qolishi va mijozlarning keskin noroziligiga sabab bo‘lishi mumkin.
@Shaxnoza_Xolmaxamatova