Shaxnoza Xolmaxamatova

Bugun 2025-yil uchun O‘zbekiston Respublikasi Davlat budjeti to’g’risidagi qonun loyihasi Qonunchilik palatasining qo‘mitalarida hamda fraksiyalarda muhokama qilindi.

Loyihada jami xarajatlar 480,3 trillion so‘mni tashkil etishi kutilmoqda, bu o‘tgan yilga nisbatan 8,4% ko‘pdir. Ushbu mablag‘larning asosiy qismi ijtimoiy soha (52%) va iqtisodiyot tarmoqlariga yo‘naltiriladi. Ta’lim uchun 84 trillion so‘m, sog‘liqni saqlash uchun 41 trillion so‘m, Pensiya jamg‘armasi uchun esa 18,5 trillion so‘m ajratilishi rejalashtirilgan.

Davlat budjeti xarajatlarining katta qismi energiya subsidiyalariga, infratuzilma rivojlantirishiga va mahalliy byudjetni qo‘llab-quvvatlashga sarflanishi rejalashtirilgan.

@Shaxnoza_Xolmaxamatova

Assalomu alaykum, qadrli do‘stlar!

Xabaringiz bor, avvalgi chaqiriqda Quyi palataning Fan, ta’lim, madaniyat va sport masalalari qo‘mitasida faoliyat yuritdim. Ushbu chaqiriqda esa Parlamentimizning juda muhim yo‘nalishlaridan biri — innovatsiyalarni rivojlantirish va axborot texnologiyalari masalalari qo‘mitasida ish boshladim.

O‘ylaymanki, bu soha bugun har qachongidan ham muhimdir! Sun’iy intellektni joriy etish, sohalarni raqamlashtirish va yangi texnologiyalarga asoslangan huquqiy bazani shakllantirish — bularning barchasi yurtimiz kelajagi uchun katta ahamiyatga ega.

Kuni kecha Prezidentimiz Parlament vakillari bilan o‘tkazgan uchrashuvdagi nutqida ham bu boradagi huquqiy asoslarni shakllantirish zaruriyatini alohida ta’kidlab o‘tdilar.

Hukumatning harakatlar dasturida sun’iy intellektni keng joriy etish masalasi ham belgilangan bo‘lib, ushbu dasturlarni hayotga tatbiq etishda qonunchilik palatasining o‘rni juda katta bo‘ladi, deb ishonaman.

Bu yo‘nalishda ishlash va mamlakatimiz rivoji uchun o‘z hissamni qo‘shish imkoniyatidan juda mamnunman. Har doimgidek, taklif va tashabbuslarga ochiqmiz.


@Shaxnoza_Xolmaxamatova

🇺🇿🇺🇿🇺🇿

@Shaxnoza_Xolmaxamatova

Qonun ijodkorligi zamon talabi darajasiga ko‘tariladi

Prezidentimiz Oliy Majlis Qonunchilik palatasining birinchi majlisida nafaqat parlament faoliyatiga baho berib, dolzarb muammolarni ko‘rsatib o‘tdi, balki ularni bartaraf etish yo‘llarini ham belgilab berdi.

Xususan, qabul qilinayotgan qonunlar sifati, parlament nazorati va saylovchilar bilan uchrashuvlar samaradorligini oshirish zarurligiga e’tibor qaratildi.

Qonunlar loyihalarini puxta ishlab chiqish, ularning hayotiyligi va to‘g‘ridan to‘g‘ri amal qilishini ta’minlash juda muhim. Zero, Prezidentimiz ta’kidlaganidek, mamlakat farovonligiga bir martalik qarorlar bilan emas, faqatgina mukammal qonunlar bilan erishish mumkin.

Haqiqatan ham, bu borada oldimizda turgan vazifalar ko‘p. Biz, deputatlar o‘z ustimizda doimiy ishlash, bilim va malakamizni oshirib borishimiz zarur. Shundagina qabul qilinayotgan qonunlarning sifati va samaradorligini ta’minlashga erishamiz.

Qonunlarni kodifikatsiya qilish bo‘yicha ham vazifalar belgilandi. Saylovoldi tashviqot davrida ham guvohi bo‘ldik, 5 ta siyosiy partiyaning saylovoldi dasturlarida muayyan sohani tartibga soluvchi hujjatlarni birlashtirish va tizimlashtirish orqali yaxlit kodekslarni qabul qilish tashabbuslari ilgari surildi. Endi kelgusi 5 yilda ushbu maqsadlarga erishish uchun astoydil harakat qilamiz.

Prezidentimizning qo‘mitalar faoliyatiga ilmiy tahlil markazlarini jalb qilish tashabbusi ham o‘ta dolzarb va muhimdir. “Aql markazlari” qo‘mita muhokamasiga kiritilayotgan masalalarning ilmiy ekspertizasini o‘tkazadi, qonun loyihalari bo‘yicha asoslangan takliflar beradi.

O‘ylaymanki, bu amaliyot parlament qarorlarining sifati va asoslanganlik darajasini oshiradi, qonunlarning ilmiy va amaliy jihatdan puxta bo‘lishini ta’minlaydi. Shu bilan birga, ilm-fan yutuqlarining qonun ijodkorligi va amaliyotga joriy etilishiga, ilmiy muassasalar bilan parlament hamkorligi mustahkamlanishiga xizmat qiladi.

Davlatimiz rahbari tomonidan aytib o‘tilgan yana bir muhim tashabbus – qo‘mitalar huzurida fuqarolik jamiyati institutlari vakillaridan iborat jamoatchilik kengashlarini tashkil etish. Fuqarolik jamiyati institutlari bilan bunday yaqindan hamkorlikda ishlash masalasi Qonunchilik palatasi kun tartibiga birinchi marotaba chiqarilyapti.

Jamoatchilik kengashlari qo‘mita majlislarida ishtirok etib, muhokama qilinayotgan masalalar yuzasidan fuqarolarning fikr-mulohazalari va takliflarini yetkazadi. Bu amaliyot qonun loyihalarini ishlab chiqish va muhokama qilish jarayonlarining ochiqligi va shaffofligini ta’minlashga, aholi manfaatlarini inobatga olgan holda qarorlar qabul qilinishiga xizmat qiladi.

Davlatimiz rahbarining parlament faoliyatiga oid tavsiyalari qonun ijodkorligini zamon talablari darajasiga ko‘tarishga qaratilgan muhim dasturulamal bo‘ldi.

@Shaxnoza_Xolmaxamatova