Har dam to‘lib-toshsa sog‘inchu alam,
To‘kib sol dardingni yolg‘iz Allohga.
Muborak u yerga yetmasa qadam,
Malhamdir, salavot Rosulullohga...

Yupun bo‘lsa egnim, yonmaydi dilim, 
Shukr-la to‘ldirgum ochqagan qornim.
Tomchilab qoldi bu ko‘zdagi selim,
Tilak uchun fido bo‘lsaydi borim...

Xumorni bosolmas suratlar jonsiz,
Qorachiqda yo‘q u qubbaning aksi.
Nahot hayot o‘tar muborak onsiz,
Giryon etib ko‘zni yashil rang bahsi?

Nasib bo‘larmikan afzal mingtadan
Qalb, ruh va tanani bog‘lagan sujud?
Yo‘llar olisligi shunchaki sabab,
Loyiq emas balki gunohkor vujud...

Dilorom Yusupova