#nazmiy

Sevgimni Sevgingga musharraf etgin ! 🕊

Yuborsang Oʻzingning yoningga yubor,
Chaqirsang Oʻzingning qoshingga chaqir.
Koʻzimdan ketolmay sargashta gʻubor,
Nomingni aytganga najot bor axir.
Yoding-la bandi et sarkash xayolim,
Boshqani oʻylamay, boshqani demay.
Sohibi qudratim, Sohibkamolim,
Oʻzgani Oʻzingday sevdirma – sevmay.
Qoʻrqaman yolgʻondan, qoʻrqaman chindan,
Hayotbaxsh soʻzlarga tilimni boyla.
Tazarru mendandir, magʻfirat Sendan,
Rahm ayla, rahm ayla, yana rahm ayla.
Manglayga Oshiq deb dastxat bitib qoʻy.
Toabad dunyoga ishqim tushmasin.
Muhtojman, bundan-da muhtoj etib qoʻy –
Oʻzingdan boshqaga ishim tushmasin.
Nuqtacha boʻlolmay qotdim qarshingda,
Osiy hislarimni butkul daf etgin.
Vujudim baxshiyda, Ruhim baxshiyda,
Sevgimni Sevgingga musharraf etgin.

✍🏻Behzod Fazliddin
(2010-yil)