Аёлга гул беринг

Аёлга гул беринг, шундай гулларки,
Эркак юрагидан унган гулларни.
Аёлга гул беринг, шундай гулларки,
Эркакнинг меҳридан унган гулларни.

Азизам, онам денг, эъзозга ўранг,
Кўзингизга суртиб этакларини.
Мана шу ҳазрати аёл улғайтган,
Дунёнинг ҳазрати эркакларини.

Балои ишқ дашти биёбонида
Бағри тилинмаган аёл бормикин?
Тақдирнинг бешафқат тошбўронида
Юраги синмаган аёл бормикин?

Аёлга гул беринг, шундай гулларки,
Эркак бардошидан унган гулларни,
Аёлга гул беринг, шундай гулларки,
Эркак кўз ёшидан унган гулларни.

Ҳар битта эркакнинг умр йўлида
Балодан қутқариб қолган аёл бор.
Аждарнинг оғзидан, жар ёқасидан,
Сочи-ла, суғириб олган аёл бор.

Аёлга гул беринг, шундай гулларки,
Эркак қувончидан унган гулларни.
Аёлга гул беринг, мард эpкакларнинг,
Рашкидан, қизғончидан унган гулларни.

Аёлни, ватанни севган насллар,
Асрлар қаъридан этади огоҳ,
Аёлни алдамоқ, онани сотмоқ,
Ватанни сотмоқдек энг оғир гуноҳ.

Аёлга гул беринг, шундай гулларки,
Эркак нафасидан унган гулларни.
Ҳайқириқ, бақириқ, чақриғимас,
Шивиридан, сасидан унган гулларни.

У сизни кечирар мунису муштоқ,
У сизни оқлайди, сиз оппоқ, оппоқ.
Эвазига эса сиздан кутгани,
Тушунмоқ, тушунмоқ, тушунмоқ.

Аёлга гул беринг, шундай гулларки,
Эркак юрагидан унган гулларни.

Зулфия Мўминова, Ўзбекистон Ёзувчилар уюшмаси аъзоси, шоира