Ona,
tarovating, mehring beqiyos,
So'zlayin deyman-u so'zimda ta'm yo'q.
Farishta hilqati siyratingga xos,
Kuylayin deyman-u kuyda notam yo'q...

Ona,
hamon yodimdadir qirovli kunlar
Bizga sarflaganding jami pulingni,
"Bolam ko'ngli o'ksib qolmasin", - derding
Biz-chi? Ololmadik hatto ko'nglingni...

Ona, bizni deya yelib yugurding
Esimda, qilganding qarz ham havola,
Hayot tashvishlarin qalbingga ko'mding
Bir-bor bo'lsa ham, qilmading nola.

Tushimga kiribdi tunov kun, ona,
O'zing tikib bergan ajib qo'g'irchoq.
Yoshlik xotirotim uyg'otdi yana
Qo'limda qalam-u ko'zimda munchoq.

Ona, poyingga to'kilsin jamiki gullar
Dunyoga taratsin jannat iforin.
Onajon mehring-la yashnar ko'ngillar,
Sen borsan, har fasl kelar bahorim.

Go'zal Abdisattorova