Derazadan termilar titrab
Yomg'irlardan shalabbo kecha,
Javdirab qaraydi xonaga, ammo
Kirolmaydi chiroqdan cho'chib.


Men-chi, yetolmayman uyquga tomon,
Har kecha ming azob kechib boraman.
Sog'inch - bu tugundir, mutolaa - yechim,
Har kecha ming tugun yechib boraman.


Na kitob yopilar, na yomg'ir tinar,
Kecha tentiraydi, ust-boshi ivib.
Sahar yaqin,
so'nggi varaqda
kipriklarim borar ilinib.


Va nihoyat chirog'im o'chdi,
Sog'inch ko'char tushga o'ksinib.
Kecha kirar xonamga asta,
Tong kelguncha olar isinib.

© Najmiddin Ermatov