Qo‘shtepa tumani hokimligi

“Eshonguzar” mahallasi “Onalarga ehtirom” bayram tadbiri o‘tkazildi

Yaqinlashib kelayotgan “8 mart – Xalqaro xotin-qizlar kuni” bayrami munosabati bilan Qo‘shtepa tumanidagi “Eshonguzar” mahallasi va 49-maktab jamoasi bilan hamkorlikda “Volidam” to‘yxonasida “Onalarga ehtirom” bayram tadbiri o‘tkazildi.

Unda 200 nafarga yaqin tumanimiz taraqqiyoti, turmushimiz obodligi va xalqimiz farovonligini yuksaltirishda hissalarini qo‘shayotgan xotin-qizlar, o‘zlarining kasbiy mahorati va namunali hayot yo‘li bilan barchaga o‘rnak bo‘lgan faxriy ustoz va ayollar, maktab jamoasi hamda mahalla faollari ishtirok etishdi.

Tadbirga tashrif buyurgan har bir ishtirokchiga hurmat va ehtirom ko‘rsatilib, gullar bilan kutib olindi.

Tadbirda so‘z olganlar barcha opa-singillarimizni 8 mart – Xalqaro xotin-qizlar kuni munosabati bilan samimiy muborakbod etdilar.

Shundan so‘ng tuman hokimining o‘rinbosari A.Yusupov ishtirokida opa-singillarimizga esdalik sovg‘alari topshirildi.

Tantanali tadbirda san’atkorlar hamda iqtidorli yoshlar ishtirokidagi badiiy-musiqiy dastur barchaga bayram shukuhini ulashdi. To‘kin dasturxon atrofida munis va moʻtabar ayollarimiz dildan suhbatlashib, yayrab dam oldilar.

Rasmiy munosabat

Ijtimoiy tarmoqlarda Qo‘shtepa tumanidagi “Katta beshkapa” mahallasining Zakovat ko‘chasida yashovchi Sardor Gʻanijonovning Zakovat ko‘chasidagi umumiy foydalanish yo‘lini ochish masalasidagi murojaati e’lon qilindi.

Ushbu murojaat mas’ullar tomonidan o‘rganilganida, murojaatchi tomonidan ta’kidlanayotgan yo‘l Zakovat ko‘chasi, 104-uyda yashovchi fuqaro Davlat Boltaboyev yashab kelayotgan hovli-joy hududidan ochilishi so‘ralganligi ma’lum bo‘ldi.

Xolat bo‘yicha mahalla faollari va arizachi bilan suhbatlashilganida, yo‘l ochib berilishi so‘ralgan hovli joydan muqaddam umumiy foydalanishda bo‘lgan yo‘l mavjud bo‘lmaganligi, biroq mazkur uyda yashovchi Davlat Boltaboyevning marhuma onasi o‘sha davrda agar tomorqa yer berilsa, o‘zi yashash uyi hududidan yer berishi mumkinligini aytib, tomorqa yer maydoni olgan, lekin kelishuv og‘izaki bo‘lgan va xech qanday xujjatlar rasmiylashtirilmagan.

Shuningdek, arxiv xujjatlari o‘rganilganida ham yo‘l ochib berish so‘ralayotgan xovli joydan hozirda fuqaro Davlat Boltaboyev oila a’zolari bilan yashab, foydalayotganligi aniqlandi.

Bundan tashqari ushbu yer maydonini sun’iy yo‘ldoshdan olingan tasvirlarini 2002-2011 yillarga qaytarib ko‘rilganda ham ushbu hududdan muqaddam yo‘l o‘tmaganligini aniqlandi.

Yuqoridagilardan kelib chiqib, murojaat muallifi Sardor Gʻanijonov va bir guruh fuqarolarning murojaatini ijobiy hal etishning imkoni yo‘qligi tushuntirilib, fuqarolar tomonidan murojaatni o‘rganish bo‘yicha hech qanday e’tiroz bildirilmaganligini ma’lum qilamiz.

Qo‘shtepa tumani hokimligi Axborot xizmati.