***
Siz uxlab qolasiz, bilmaysiz
Qo'ng'iroq jiringlar asabiy.
Samoga sochilar, samoga
Tutunga o'ralib g'azabim.

Siz uxlab qolasiz, bilmaysiz
Ko'nglimda ne o'ylar kechganin.
Yuragim - qip-qizil daryoda
Titroqlar qirg'oqday ko'chganin.

Siz uxlab qolasiz, bilmaysiz
Na shoir, na Majnun odamni.
Bo'salar yuborib havodan
Siz ko'rgan tushlarda bormanmi?

Siz uxlab qolasiz, bilmaysiz
Yarim oy bo'zarib to'lganin.
Siz orom olgan tinch dunyoda
Tongacha nimalar bo'lganim.

Siz uxlab qolasiz, bilmaysiz...