Қашқадарё вилояти судлари | Расмий канал

YouТube видеохостингида эълон қилинган видеолавҳа юзасидан

Видеолавҳада сўз борган жиноят ишлари бўйича Чироқчи тумани судининг Б. Сармоновга оид ҳукми ҳали қонуний кучга кирмаган, айни вақтда Қашқадарё вилоят суди жиноят ишлари бўйича судлов ҳайъати томонидан апелляция тартибида кўриб чиқилмоқда. 2007 йил 15 январдаги “Оммавий ахборот воситалари тўғрисида”ги Қонуннинг 6-моддасида белгилаб қўйилганидек, ...муайян иш бўйича суд қарори чиқмасдан туриб ёки суднинг қарори қонуний кучга кирмай туриб, унинг натижаларини тахмин қилиш ёхуд судга бошқача йўл билан таъсир кўрсатиш тақиқланади.

Ушбу ҳукмга асосан Б. Сарманов Жиноят кодексининг 97-моддаси 2-қисми “г,л” бандлари ва 219-моддаси 2-қисмида назарда тутилган жиноятларни содир қилганликда айбли, деб топилган. Унга нисбатан тайинланган жазолар Жиноят кодексининг 59-моддасига асосан қисман қўшиш йўли билан жиноятлар мажмуи тариқасида узил-кесил ўташ учун 18 йил муддатга озодликдан маҳрум қилиш жазоси тайинланган.

Жазони умумий тартибли колонияларда ўташ белгиланган. Шунингдек, жабрланувчининг қонуний вакилининг судда сўрови, вилоят прокурорининг даъво аризасига кўра судда аниқланган ҳолатларга асосан судланувчи Б.Сарманов ҳисобидан марҳумнинг қонуний вакили фойдасига 70.000.000 сўм моддий ва маънавий зарар ундирилиши белгиланган.

Юқорида таъкидланганидек, айни кезда апелляция тартибида кўрилаётган мазкур жиноят иши юзасидан Қашқадарё вилоят суди жиноят ишлари бўйича судлов ҳайъати томонидан якунда қонуний ва асосли қарор қабул қилиниши таъминланади.

Сайт | Телеграм

Навбатдаги оммавий сайёр қабул Қарши шаҳрида ўтказилди

Ўзбекистон Республикаси Президенти Администрациясининг сайёр қабуллар ўтказиш ҳақидаги топшириғига асосан бугун Олий судининг судьяси З. Файзиев ва мурожаатлар билан ишлаш бошқармаси бошлиғи С. Хидировлар томонидан навбатдаги суд-ҳуқуқ масалалари бўйича сайёр қабул Қарши шаҳрида ўтказилди.

Суд-ҳуқуқ масалаларида мурожаат қилган 72 нафар фуқароларнинг 22 та жиноят, 41 та фуқаролик, 5 та маъмурий ва 4 та иқтисодий ишлар буйича судларга оид мурожаатлари тингланди. Шундан 51 тасини фуқароларнинг оғзаки мурожаатлари ва 18 тасини ёзма аризалари ва 3 тасини ёзма тушуккурномалар ташкил қилди.

Қабул давомидаги мурожаатларнинг 69 таси бўйича ҳуқуқий тушунтиришлар берилди ва 3 таси ижобий ҳал қилинди.

Шунингдек, жиноят ишлари бўйича судлар томонидан тақдимномалар асосида 29 нафар маҳкум ўталмай қолган ахлоқ тузатиш ишлари ва бошқа жазолардан муддатидан илгари шартли равишда озод қилинди, 6 нафар маҳкумнинг ўталмай қолган жазолари енгилроғига алмаштирилди.

Сайт | Телеграм

Олий суд раисининг ўринбосари Олимжон Исмоилов Қашқадарё вилоятида бўлиб, судлар фаолияти билан танишди

Жумладан, Косон туманида бўлиб, фуқаролик ишлари бўйича туманлараро суди ҳамда Жиноят ишлари бўйича туман суди биноларида фуқаролар, судья ва ходимлар учун яратилган шароитларни кўздан кечирди. Ижро интизоми, ишларнинг ташкил қилиниш ҳолатини ўрганиб, суд архивида сақланаётган фуқаролик ишлари билан танишиб, тегишли йўналишлар берди.

Судья ва ходимлар билан бўлиб ўтган мулоқотларда кейинги йилларда судларнинг чинакам мустақиллигини таъминлаш, моддий-техника базасини яхшилиш борасида кўрилаётган чора-тадбирлар ва уларнинг самараси қайд этилди. Бугун ҳар бир судья ва суд ходими ана шу эътибордан келиб чиқиб ўз ишига масъулият билан ёндашиши кераклиги, коррупция, таъмагирлик каби иллатларга йўл қўймаслиги зарурлиги таъкидланди.

Шунингдек, юқори малакали, чуқур билим ва кўникмаларга эга кадрлар ёрдамида судларнинг чинакам мустақиллигини таъминлаш, уларнинг фаолияти самарадорлиги ва одил судлов сифатини оширишга эришиш мумкинлигини таъкидлади.

Учрашувда одил судловни амалга оширишда адолат ва қонунийликни таъминлаш, суд идорасига нажот истаб келган фуқароларнинг ҳуқуқ ва манфаатларини қонун доирасида ҳимоя қилиш бугун ҳар бир судьянинг энг асосий вазифаси бўлмоғи лозимлиги қайд этилди.

Шунингдек, маънавият ва маърифат масаласига ҳам алоҳида эътибор қаратилиб, судьянинг онгида адолат, тилида ҳақиқат, дилида поклик ҳукмрон бўлиши учун, энг аввало, юксак маънавиятли бўлиши кераклиги таъкидланди.

Сайт | Телеграм