БОРИГА ШУКУР


Бахтим ҳам саодатим,
Имоним, ҳаловатим,
Соябоним, давлатим,
Отам  борига шукур,
Онам борига шукур.


Ташвиш, ғамга бой ҳаёт,
Ғуссаларинг менга ёт,
Бағрим бутун, кўнглим шод,
Отам борига шукур,
Онам борига шукур.


Бири ой, бири қуёш,
Гўё умримга фаррош,
Кипригимда қувонч ёш,
Отам борига шукур,
Онам борига шукур.


Жон чекиб ўйлагувчи,
Соғинчлар йўллагувчи,
Йиқилсам қўллагувчи,
Отам борига шукур,
Онам борига шукур.


Дунё эмассан бир кам,
Ҳикматларинг бунда жам,
Таъзимлар қалай ҳар дам,
Отам борига шукур,
Онам борига шукур.


Чаманда лоладекман,
Қадди тик қоядекман,
Қирқда ҳам боладекман,
Отам борига шукур,
Онам борига шукур.


Ифтихорим,ривожим,
Табаррук,улуғ ҳожим,
Бошимдаги гултожим,
Отам борига шукур,
Онам борига шукур.



🖋Хуршид Карим

❣️❣️❣️❣️💯❣️❣️❣️

@qadrdonim2021
❤️ҚАДРДОНЛАРИМ❤️