platforma.uz

Марказий Осиёнинг мажозий "тили"

Шу кунларда минтақа ҳаётига доир иккита муҳим хабар эълон қилинди. Биринчиси, 31 март куни уч қўшни давлат – Қирғизистон, Тожикистон ва Ўзбекистон раҳбарлари тарихда илк бор уч томонлама саммит доирасида Тожикистонда учрашув ўтказади. Иккинчиси, Ўзбекистон, Тожикистон ва Қирғиз Республикаси 2031 йилги Осиё кубогини биргаликда ўтказиш бўйича ОФКга номзодлик таклифини юборди...

Айтиш мумкинки, бугунги геосиёсий толотумлар жараёнида бу ҳаракатлар жуда қийматли қадамлардир. Аввало, "Фарғона ҳавзаси"да узун ва ўта зиддиятли чегараларга эга айни уч қўшни давлат узоқ йиллар ижтимоий-сиёсий келишмовчиликларга юзма-юз келди. Халқона айтганда, минтақани суғорадиган сув манбаларининг бошидаги бу икки давлат билан трансчегаравий дарёлардаги сув ҳажми бўйича ҳам келишмовчиликлар бор эди.

Қолаверса, қирғиз ва тожик қўшниларимиз ўртасида яқин-яқингача чегара ва сув устида қонли можароларга ҳам, афсуски, гувоҳ бўлдик. Яқинда эса икки қўшнимиз ҳукуматлари давлатлараро чегараларни белгилаш ишлари поёнига етганини расман эълон қилишди. Бу катта гап. Бу шунинг учун муҳим масалаки, биринчидан, қўшни халқлар ўртасидаги ноаниқлик, тушунмовчилик барҳам топди. Иккинчидан, баъзи ўйинчи қудратлар қўлидаги минтақада беқарорлик чиқаришда фойдаланадиган муҳим "ричаги" йўқ қилинди.

Қўшнинг тинч, сен тинч, дейди халқимиз. Табиийки, деворингнинг ортида иккитаси уришиб, талашиб ётса бехавотир яшаш қийин. Шу маънода Ўзбекистон саккиз йил илгари бошлаган минтақада яқин қўшничиликни ривожлантиришга қаратилган сиёсатининг самарасини энди-энди амалий натижалар билан кўра бошлади. Футбол мусобақасини биргаликда ўтказишга келишилгани ҳам айни сиёсий ҳаракатлар самараси.

Мен шундай тушундимки, глобал дунёда империячилик васвасаси қайта уйғонаётган, босиб олиш ва эгалик қилишга бўлган тийиқсиз иштиёқ алангаланаётган бугунги кунда бундай қарорлар қабул қилиш ўша қудратларга қаратилган сиёсий бир ишорадир. Яъни, минтақа давлатлари суверенитетларини ҳимоя қила олиши, биргаликда ўз субъектлигини тобора чуқурроқ англаб бораётганини ифода этишга бўлган яхлит бир сиёсий мажоздир.

@platformauzb

3 мартдан ипотека кредитлари учун субсидия олишга аризалар қабули бошланади

Ипотека кредитлари бўйича субсидиялар тўлашнинг тасдиқланган мақсадли кўрсаткичлари доирасида аризаларни 3 март куни соат 09:00дан бошлаб жўнатиш мумкин. Бу ҳақида Иқтисодиёт ва молия вазирлиги хабар берди.

Аризаларни Давлат хизматлари марказлари ёки Ягона портал (my.gov.uz) орқали топшириш мумкин. Бунда ариза берувчи хоҳиши билан унинг даромадлари ҳисоб-китобига яқин қариндошларининг ҳам даромадлари киритилиши мумкин.

Шунингдек, аризачи ёки унинг турмуш ўртоғининг (шу жумладан, кафил сифатида келтирган яқин қариндошлари) ўртача даромади қуйидагича бўлиши керак:

⁃ Қорақалпоғистон Республикаси ва вилоятларда — меҳнатга ҳақ тўлашнинг энг кам миқдорининг 2,7 бараваридан 8 бараваригача (ҳозирда 3,11 млн — 9,24 млн сўм);

⁃ Тошкент шаҳрида — меҳнатга ҳақ тўлашнинг энг кам миқдорининг 2,7−9,2 баравари (ҳозирда 3,11 млн сўм — 10,62 млн сўм).

@platformauzb