Otabekuz | Targeting | Digital-Marketing

🧐 Bu hiylami yoki kuchli strategiya?

"Shoshiling! Chegirma faqat bugun amal qiladi!" – bunday jumlalarni har kuni ko‘ramiz. Lekin ko‘p hollarda ertasiga ham aksiyani davom etayotganini sezamiz.

Yoki "3 ta olsangiz, 1 tasi tekin!" – aslida esa narx avvaldan oshirib qo‘yilgan bo‘lishi mumkin.

Shunga qaramay, nega biz bunday takliflarga tez-tez ilinamiz?

✅ Cheklangan muddat – "chegirma tugaydi" degan fikr bizni tezroq qaror qabul qilishga undaydi.

✅ Ko‘proq sotib olishga majburlash – bitta mahsulot kerak bo‘lsa ham, "foyda qilay" deb 3 tasini olamiz.

✅ Sun’iy narx manipulyatsiyasi – avval 500 ming deb ko‘rsatilgan mahsulot aslida hech qachon bu narxda sotilmagandir, lekin hozir 299 ming ko‘rsatilsa, "arzon"dek tuyuladi.

Bu hiylami yoki marketing strategiyasi?
Haqiqat shuki, bu psixologik jihatdan ishlaydigan kuchli strategiya! Odamlar bunday taktikalarni ongsiz ravishda qabul qilishadi va xarid qilishga moyillik kuchayadi. Hatto mahsulotga ehtiyoji bo‘lmasa ham.

🔍 Endi savol sizga:
Kelasi safar shunday taklifga duch kelsangiz, xarid qilishdan oldin yaxshilab o‘ylab ko‘rasizmi? Yoki yana bu marketing usulining qurboniga aylanasizmi?

Soft skill va Hard skill o’zi nima?

Soft skill – odamlar bilan ishlash, jamoani boshqarish, muzokara qilish va tanqidiy fikrlash kabi qobiliyatlar.

Hard skill – aniq bilim va amaliy ko‘nikmalar, ya’ni ma’lum bir sohada ishlash qobiliyati.

Misol: Siz SMM kursini tamomladingiz

Soft skill:
– Jamoa bilan ishlash
– Loyihalarni boshqarish
– Kreativ fikrlash

Hard skill:
– Kontent-reja tuzish
– Ssenariy yozish
– Target yoqish

Muhim:

Agar faqat texnik bilimga ega bo‘lsangiz, lekin o‘zingizni sotishni bilmasangiz, yaxshi loyihalar topish qiyin bo‘ladi.

Aksincha, faqat gap bilan yurib, amaliy ko‘nikma bo‘lmasa, mijozlar uzoq ishlamaydi.

Soft va Hard skill balansda bo‘lishi muhim!

Ramazon Muborak!
Hurmatli obunachilar, sizlarni eng ulug‘, fayzli va barakali oy – Ramazon bilan tabriklaymiz!
Bu oy – sabr, shukr va mehr-oqibat fasli. InshaAlloh, har birimiz Ramazonning qadrini bilib, qalbimizni poklashga, yaxshiliklar qilishga va duolar bilan umrimizni ziynatlashga harakat qilamiz.
Alloh tutgan ro‘zalarimizni, qilgan ibodat va ehsonlarimizni qabul qilsin. Oila a’zolaringizga sihat-salomatlik, uyingizga fayz va baraka, hayotingizga tinchlik va xotirjamlik tilaymiz!
Ramazon muborak bo‘lsin! 🌙✨

💵 Foydaga chiqdik.
Reklamani to‘xtatamiz(mi?)

Yo‘q, albatta! Ana endi eng muhim qismi boshlanadi. Agar marketingga sarflagan pulingiz foyda bera boshlagan bo‘lsa, bu — muvaffaqiyatga eltadigan yo‘lning birinchi bosqichi, xolos. Raqobat kuchli, mijozlar esa tanlovda erkin. Agar mahsulotingizni eslatib turmasangiz, ular asta-sekin sizni unutib qo‘yishlari mumkin.

Keling, yirik brendlarni misol qilib olaylik. Masalan, Apple, KFC yoki Coca-Cola,  allaqachon mashhurlikka erishgan, lekin baribir mahsulotlarini tinimsiz reklama qilishadi. Nega? Chunki marketingni to‘xtatish — bozordagi o‘rinni boy berish degani.

Marketingni xarajat deb emas, investitsiya deb qabul qilish kerak. Bu — nafaqat bugungi kun daromadi, balki kelajakdagi muvaffaqiyat uchun ham zamin yaratadi.

✔️ To‘g‘ri ishlatilgan marketing strategiyasi har bir sarflangan so‘mni bir necha baravar ortig‘i bilan qaytarishga xizmat qiladi.

❓ Qiyinchiliklarsiz biror sohani o‘rganish mumkinmi?

Ko‘pchilik o‘ylaydi: “O‘zim hamma narsani o‘rganib ketaman, ustoz shart emas.” Ammo noto‘g‘ri yo‘lga yillar sarflagandan ko‘ra, tajribali ustoz bilan ishlash ancha samarali.

Misol uchun: Siz Targeting sohasini o‘rganmoqchisiz, lekin qayerdan boshlashni bilmaysiz. Kurs tanlaysiz, lekin u yerda faqat nazariya. Amalda esa “Reklama ishlamayapti”, “Nima noto‘g‘ri ketdi?” degan savollar ko‘payaveradi. Agar shu jarayonda yaxshi ustoz bo‘lsa, u sizga xatolaringizni ko‘rsatadi va natijaga tezroq erishasiz.

Xulosa shuki, haqiqiy ustoz sizni ortiqcha xatolardan asraydi va tezroq rivojlanishingizga yordam beradi. Tajriba – eng yaxshi o‘qituvchi, lekin uni o‘z xatolaringiz bilan emas, boshqalarning tajribasidan o‘rganib ham qo‘lga kiritishingiz mumkin!

✔️ Bilib qo‘ygan zarar qilmaydi!

Ko‘pchilik shunday o‘ylaydi: “Zo‘r targetolog topsam, mahsulotim sotila boshlaydi”. Lekin aslida hamma narsa targetologga bog‘liq emas.

Agar mahsulotga bozorda talab bo'lmasa, uni qanday reklama qilmang, baribir sotuv sust bo‘ladi. Chunki targetolog odamlarni mahsulotingizni ko'rishga majbur qila oladi, lekin uni sotib olishga majbur qila olmaydi.

☀️ Misol uchun: Siz yozning jaziramasida elektr isitgich (obogrevatel) sotmoqchisiz. Eng kuchli targetologni yolladingiz, lekin odamlar hozir issiqda isitgichga ehtiyoj sezmasa, reklama yordam bera oladimi? Katta ehtimollar bilan, yo‘q!!!

Shuning uchun avvalo mahsulot yoki xizmatga real talab bor-yo‘qligini o‘rganish kerak. Targetolog faqat yaxshi ishlaydigan mahsulotni ko‘proq odamlarga yetkazishga yordam beradi. Talab bo‘lmasa esa, natija ham bo‘lmaydi.

❌ Kursni bitirdim. Mutaxassis bo‘ldim. Lekin hech narsani bilmayman.

(Sizga ham bu holat tanishmi)

Hamma “natijali kurs” izlaydi. Men ham izlaganman.

Reklamalarda “mutaxassis bo‘lasiz”, “katta daromad qilasiz”, “bu sohani bilgan odam doim pul topadi” deyishadi. Kurs boshlanadi. Boshida motivatsiya zo‘r. Lekin keyin… tushunarsiz nazariya, chala tushuntirilgan darslar, tavsiyalar. Kursni bitirganimda o‘zimga savol berdim: Men endi haqiqatan mutaxassismi?

⁉️ Yo‘q.

Tezda ishlashni boshlay olmayman, mijoz bilan qanday ishlashni bilmayman, real loyihalar qanday yurishini tushunmayman. Chunki, kurs menga o‘rgatish uchun emas, shunchaki o‘z mahsulotini sotish uchun yaratilgan edi.

Hamma kurslar shunday emas, albatta. Ichida haqiqatdan o‘rgatadiganlari ham bor. Lekin ularni topish qiyin. Ko‘pchilik esa shunchaki kontent tayyorlaydi, kursga odam yig‘adi, lekin sifatli ta’lim bera olmaydi. Sababi oddiy – kurs o‘qitish emas, biznes uchun ishlaydi.

Afsuski, odamlar kurs bitirganidan keyin “Mutaxassis” deb nom oladi, lekin real natija bera olmaydi.

O‘rganish – daromad qilishdan oldin bo‘lishi kerak. Lekin bugun ko‘pchilik faqat sotish haqida o‘ylaydi. Shu sabab hali ham “kurs bitirdim, mutaxassis bo‘ldim” deb o‘ylab yuribmiz, lekin real ishga kirishsak, nima qilishni bilmaymiz.

Hatto o'zim ham bu jarayonni boshdan o'tkazganman…..

Maqsad sari nega tinimsiz harakat qilish kerak?

📈 Ko‘pchilik maqsad sari harakat qilishni boshlaydi, lekin tez orada charchaydi yoki to‘xtaydi. Chunki natija darrov sezilmaydi. Go‘yo joyidan qimirlamayotgandek tuyuladi.

Ammo o‘ylab ko‘ring: tog‘ cho‘qqisiga chiqqan alpinistning har bir qadamida natija sezilmaydi. U har kuni bir necha metr yuqorilaydi, lekin faqat cho‘qqiga yetgandagina ortga qarab, qancha yo‘l bosganini tushunadi. Hayotda ham shunday. Biz har kuni qilayotgan harakatlarimiz natijasini hozir ko‘rmasligimiz mumkin, lekin oradan vaqt o‘tib, katta o‘zgarish seziladi.

Harakat qilgan odam yutqazishi mumkin. Lekin harakat qilmagan odam allaqachon yutqazgan bo‘ladi.

Shuning uchun to‘xtamang. Chunki keyinchalik “qaniydi boshlaganingda davom ettirganingda” degan o‘y afsus bo‘lib qolishi mumkin.

Oylarni tejayman deb yillarni yo'qotamiz...


Bu iqtibosni tag ma'nosini tushunganimdan keyin qilayotgan ishlarim o'zgardi. Ya'ni biron narsa qilishga qaror qabul qilsam. O'ylamasdan boshlab ketaverardim. Aytaylik yangi (2soatlik)kino ko'rmoqchiman. Ko'rishdan avval bu kino 2 soat vaqtni sarflashga arziydimi yo yoqligi haqida. Yoki bitta kitob tanladim va o'qimoqchiman lekin u kitobni oqishdan avval aslida kimlar uchunligi nima haqidaligi haqida ma'lumotni qidirmaslik : "vaqtni tejab qolaman" deb vaqtdan yutqazish hisoblanar ekan.

Aslida bu gapni soatlarni tejayman deb kunlarni, haftalarni yo'qotamiz deb aytsak ham bo'laveradi.


Taffakur qilib ko'rish kerak.

Yozishim kerak!

Haqiqatan ham yozish juda muhim. Fikrlar faqat boshda yursa, ularni tushunish qiyin bo‘lishi mumkin. Lekin yozganimda – hammasi aniqroq ko‘rinadi. O‘zimni yaxshiroq tushunaman, nimani xohlashimni bilib boraman. Yozish – bu o‘zimni anglashning eng yaxshi yo‘li.

Bundan tashqari, yozish orqali boshqalarga ham fikrlarimni yetkazish osonlashadi. Odamlar o‘ylaganlarimni, dunyoqarashimni, hayotga munosabatimni yozganlarim orqali tushunishadi. Balki kim uchundir bu qimmatli bo‘lar? Balki kimningdir hayotiga kichik bo‘lsa ham foyda keltirar?

Shuning uchun yozishni davom ettirishim kerak. Hech bo‘lmasa, o‘zim uchun. Yoki kelajakda bolalar, nevaralar, evaralar uchun. Yozilgan so‘zlar yo‘qolmaydi, ular har doim iz qoldiradi.

Eski keyslarni topib olyabman😃📈

Bu mendagi yangi rekord😅