Maftuna, izlasam, tun – Oydan
jimliklar muncha ko'p, jim toldim
Vaslingni manzili ayt, qayda?
Dod soldim,
dod soldim
dod soldim.

Maftuna,
o'ylasam, o'y – senmas
xayoling yomg'irdan men oldim
xayoliy muhabbat hech o'lmas
lol qoldim
lol qoldim
lol qoldim.

Maftuna,
sog'insam, ayt netay?
Firoqda yashashlik to'ydirdi...
safarim qaridi, men ketay
Menimi?
Sensizlik o'ldirdi!
Maftuna,
yig'lama, qaysarim
bilaman, meni deb yig'laysan
tushingga kelaman axtarib
har tuni meni deb uxlaysan...

Bu tunda
cheklanmay nur yog'dirar oy
yuzini yashirmay uchar yulduzlar
bizni visollarga atabmi bilmam
kelishga shoshmaydi oppoq kunduzlar.

Bu tunda
ayriliq istar nafaqa 
yelkamga bosh qo'yib yashaysan uzoq
birga termulamiz bizli shafaqqa
cheklab o'tar bizni hijronlar – tuzoq...

Bu tunda
to'xtamay yog'adi yog'du
nigohim uzilmas nigohlaringdan
ko'zlaring ichida yashaydi ohu
kapalak uchadi dudoqlaringdan

Bu tunda
nihoyat topaman taskin
o'zimni hislarga tamom tashlayman
bu tunda ko'ksimni qo'ling-la keskin
shunda men dunyoda yashay boshlayman

Bu tunda
uxlashlik, eng katta gunoh
tonglar qoshimizga keladi uxlab
yer-u ko'k bizlarga eng oliy guvoh
qo'yadi sevgimiz gumbazga mixlab.