Surxondaryo viloyatida tadbirkorlik muhitini yaxshilash, qatnov jadal yo‘lbo‘yi hududlaridagi bo‘sh maydonlardan samarali foydalanish, savdo va xizmat ko‘rsatishni yo‘lga qo‘yish orqali daromadli ish o‘rinlari yaratish maqsadida bir qator yangi loyihalar amalga oshirilmoqda. Jumladan, xalqaro va davlat ahamiyatidagi avtomobil yo‘llari yoqasida savdo va xizmat ko‘rsatish obyektlari barpo etilmoqda.

Bugun Surxondaryo viloyati hokimi Ulug‘bek Qosimov Bandixon tumani "Obikor" mahallasi hududida chorva mollari hamda poliz mahsulotlari bozorini tashkil etish loyihasi bilan tanishdi. Hozirda yer tekislash ishlari olib borilayotgan bu loyihaning sifatli va o‘z vaqtida amalga oshirilishi, sotuvchi va xaridorlar uchun qulay shart-sharoitlarga ega bozor yaratilishi lozimligi ta’kidlandi.

Shundan so‘ng, Bandixon, Qumqo‘rg‘on va Oltinsoy tumanlari hokimlari hamda tashabbuskor tadbirkorlar ishtirokida 4R-100 "Boysun-Qumqo‘rg‘on-Denov" avtomobil yo‘li bo‘ylab amalga oshiriladigan loyihalar taqdimoti o‘tkazildi. Har bir loyihaning texnik-iqtisodiy asoslarini puxta ishlab chiqish, iqtisodiy samaradorligini oshirish va istiqbolliligini ta’minlash hamda daromadli ish o‘rinlari yaratish yuzasidan aniq vazifalar belgilab berildi.

Surxondaryo.uz | Telegram | Facebook | Instagram | YouTube | X